د لاسرسۍ وړ لېنکونه

تازه خبر
جمعه ۲۵ غبرګولی ۱۴۰۳ کابل ۱۰:۵۳

خبرونه

احمدي نژاد د امريکا سياست د افغانستان د ستونزو سرچينه وګڼله

د ایران ولسمشر محمود احمدي نژاد نن په دوشنبه کې د سیمه ییزې همکارۍ کنفرانس ته د وینا په ترڅ کې په افغانستان کې د امریکا سیاستونه د دې هیواد د ټولو ستونزو سرچینه وبلله.

د احمدی نژاد وینا د دې سبب شوه چې امریکایی هیئت سمدستي له کنفرانسه ووځي.

احمدی نژاد وویل، متحده ایالات د تروریزم په وړاندی د جګړی په پلمه د ۲۰۰۱ کال په وروستیو کې افغانستان ته لاړ او اوس له همدی پلمی څخه له ټولی سیمی د کړۍ راتاوولو لپاره کار اخلي.

په دی کنفرانس کې د افغانستان د ګاونډیو هیوادونو مشران او هم د امریکا د بهرنیو چارو د وزارت د مرستیال رابرټ بلک په مشری یوه امریکایی هیئت ګډون کړی دی.

کله چې احمدی نژاد خپله وینا پیل کړه، د امریکا د هیئت غړي د کنفرانس له تالارڅخه ووتل او کله چې وینا یې پای ته ورسیده، بیرته تالار ته داخل شول.

د سیمه ییزې همکارۍ د دغه کنفرانس هدف د افغانستان په بیارغونه کې سیمه ییزې همکاری ته پراختیا ورکول دي.
دا له ۲۰۰۵ کال راهیسې پنځم ځل دی چې دوشنبه د داډول کنفرانس کوربه دی.

د ورځې تازه خبرونه دلته ولولئ

امیري: د ۱۰۰۰ ورځو خوبونه له خاورو سره خاورې شول او د افغانستان راتلونکی له منځه ولاړه

د افغانستان د ښځو، نجونو او بشري حقونو لپاره د امریکا ځانګړې استازې رینا امیري
د افغانستان د ښځو، نجونو او بشري حقونو لپاره د امریکا ځانګړې استازې رینا امیري

د افغانستان د ښځو، نجونو او بشري حقونو لپاره د امریکا ځانګړې استازې رینا امیري په افغانستان کې له شپږم ټولګي پورته له زده‌کړو د نجونو د محرومیت ۱۰۰۰ ورځو ته په اشارې وايي چې د ځوانانو د زرو ورځو خوبونه له خاورو سره خاورې شول او د افغانستان راتلونکی له منځه ولاړه.

اغلې امیري بېګا په ایکسپاڼه یا پخواني ټویټر همداراز لیکلي، افغانستان په نړۍ کې یوازېنی هېواد دی چې داسې افراطي سیاستونه په‌کې تعقیبېږي او له همدې امله په انزوا کې دی.

وروسته له هغه چې طالبانو د ۲۰۲۱م کال په اګست میاشت کې پر افغانستان واک تر لاسه کړ، دوی د افغان نجونو پر مخ د منځنیو ښوونځیو او لېسو دروازې وتړلې او له هغې راهیسې څه باندې ۱۰۰۰ ورځې ووتې.

طلبان وايي، د نجونو زده‌کړو پیلولو لپاره ترتیب برابروي، خو نیوکه دا ده چې دوی په پلمې جوړوي او نه غواړي څو نجونې زده‌کړې وکړي.

کرکټ نړیوال جام سیالۍ؛ افغانستان د ۸ غوره لوبډلو پړاو ته لار ومونده

افغان لوبغاړي ابراهیم ځدراڼ او رحمن الله ګربز د لوبې پر مهال
افغان لوبغاړي ابراهیم ځدراڼ او رحمن الله ګربز د لوبې پر مهال

د افغانستان د کرکټ ملي لوبډلې پاپوا نیوګینې یا پي‌این‌جي ته ماتې ورکړه او د نړیوال جام د اتو غوره لوبډلو پړاو ته لار یې پیدا کړه.

په نننۍ سیالي کې افغانستان وتوانېد د پاپوا نیوګینې د ۹۶ منډو هدف د درېیو لوبغاړو په اوټ کېدو په څه باندې ۱۵ اوورونو کې پوره کړي.

د افغانستام لپاره په توپوهنه کې ډېرې منډې ګلبدین نایب وکړې.

هغه ۴۹ ناسوځېدلې منډې جوړې کړای شوې.

په توپ اچونه کې بیا د افغانستان لپاره فضل الحق فاروقي درې، نوین الحق ۲، نور احمد یوه ویکټه واخیسته او پاتې سیال لوبغاړي رن اوټ شوي وو.

تمه ده افغانستان د اتو غوره لوبډلو په پړاو کې له هند، اسټرالیا او یوه بل ټیم سره چې احتمالاً د ډي ګروپ دویم ټیم به وي مخ شي.

خو تر اتو غوره پړاو مخکې افغانستان د جون په اتلسمه راتلونکې سه شنبه له کوربه ویست اینډیز سره مخ کېږي.

د ازادې اروپا/ازادي راډیو د اذربایجان څانګې د ویبپاڼې بندولو پرېکړه سرغړونه وبلل شوه

ارشیف
ارشیف

د اروپا د بشري حقونو محکمې پرون پنجشنبې په اذربایجان کې د ازادې اروپا/ازادي راډیو د اذربایجاني برخې د ویبپاڼې د بندولو په اړه د اذربایجان د حکومت پرېکړه د اساسي ازادیو او د بشري حقونو د ساتنې د کنوانسیون سرغړونه وبلله.

د ازادې اروپا/ازادي راډیو مشر سټېفن کپوس، په یوه بیان کې د اروپا د بشري حقونو د محکمې د دې اقدام هرکلی وکړ.

ده زیاته کړه: "د ازادي راډیو اذربایجاني څانګه لا هم په خپلو امکاناتو د عامه فساد، سیاسي بندیانو او د انتخاباتي درغلیو په اړه خپلو څېړنیزو راپورونو ته دوام ورکوي."

کپوس دا هم وویل چې د اذربایجان خلک د نورو ځایونو د ولسونو په څېر، له حکومتي پروپاګند څخه لیرې خپلواکو معلوماتو ته د لاسرسي حق لري.

هغه وايي: "موږ دې ماموریت ته دوام ورکوو او په باکو به فشار ته دوام ورکړو چې موږ ته اجازه راکړي چې په آذربایجان کې په ازاد ډول کار وکړو."

د ازادې اروپا/ازادي راډیو د اذربایجاني څانګې دفتر چې په اذربایجان کې د "آزادلیق" په نوم پېژندل کېږي په ۲۰۱۷م کې د باکو د محکمې په حکم وتړل شو.

محکمې ادعا کړې وه چې د راډیو ویبپاڼې داسې مواد خپاره کړي چې "د ډله‌ییزو پاڅونونو د غوښتنې په شمول تاوتریخوالي او مذهبي افراطیت ته تبلیغ کوي."

شل اوریز نړیوال جام؛ افغانستان د پي اين جي پر وړاندې توپ اچونه غوره کړه

افغان کرکټ ملي لوبډله
افغان کرکټ ملي لوبډله

د کرکټ شل اوریز نړیوال جام په ترڅ کې افغانستان خپله درېیمه سیالي د پي‌اين‌جي پر وړاندې پيلوي.

سیالي چې د کابل پر وخت سهار ۵:۰۰ بجې پیلېږي، پچه یې افغان لوبډلمشر راشدخان وګټله او توپ اچونه یې انتخاب کړه.

راشدخان په خپلو خبرو کې وویل چې په دې لوبه کې هم هماغه یولس کسیزه لوبډله لوبه کوي چې په تېرو دوو سیالیو کې یې لوبه کړې وه.

دا په روان ټورنمنټ کې د افغانستان درېیمه سیالي ده چې په ګټلو سره به یې د ۸ غوره لوبډلو پړاو ته ورسېږي.

افغانستان په تېرو دوو سیالیو کې د یوګاندا او نیوزیلینډ لوبډلو ته ماتې ورکړې وې.

پاپ فرانسیس د جي۷ په سرمشریزه کې د یو شمېر هېوادو له مشرانو سره ګوري

 د نړۍ د کاتولیکانو مشر پاپ فرانسیس
د نړۍ د کاتولیکانو مشر پاپ فرانسیس

واتیکان د پنجشنبې په ورځ د جوزا په ۲۴مه اعلان وکړ چې د نړۍ د کاتولیکانو مشر پاپ فرانسیس به په ایټالیا کې د جي۷ G7 په سرمشریزه کې د متحدو ایالتونو او اوکراین له ولسمشرانو جو بایډن او ولودیمیر زیلینسکي او د هند له صدراعظم نریندرا مودي سره وګوري.

فرانسیس د ایټالیا د صدراعظم جیورجیو میلوني له لوري سرمشریزې ته بلل شوی چې نن جمعه د مصنوعي ذهانت په اړه وینا وکړي.

د فرانسې خبري آژانس د راپور له مخې، تمه ده چې ۸۷ کلن پاپ فرانسیس په یو لړ دوه اړخیزو غونډو کې د غزې او اوکراین پر جګړو خبرې وکړي.

د راپور له مخې فرانسیس به د فرانسې له ولسمشر ایمانویل مکرون، د کاناډا له صدراعظم جسټن تروډو او د پیسو د نړیوال صندوق له مشرې کریستالینا جورجیوا سره هم وګوري.

بریتانیا، کاناډا، فرانسه، جرمني، ایټالیا، جاپان او امریکا د جي۷ غړي دي.

د دې ډلې سرمشریزه د پنجشنبې په ورځ د ایټالیا په کوربه‌توب پیل شوه.

اسیايي ملتونو فوټبال جام؛ د افغانستان د ۲۰ کلنو او ۱۷ کلنو لوبډلو سیالې لوبډلې څرګندې شوې

ارشیف
ارشیف

د اسیايي ملتونو د فوټبال جام په مقدماتي پړاو یا سرلوبو کې د افغانستان د ۲۰ کلنو او ۱۷ کلنو لوبډلو سیالې لوبډلې څرګندې شوې.

د افغانستان د فوټبال فدراسیون پرون د پنجشنبې په ورځ د جوزا په ۲۴ مه په خپل فېسبوک کې لیکلي چې د هېواد د ۲۰ کلنو فوټبال ملي لوبډله به په ډي D ګروپ کې د سعودي عربستان، اسټرالیا او مکاو له ۲۰ کلنو فوټبال ټیمونو سره مخامخ شي.

دا سیالۍ به د روان کال د سپټمبر له ۲۱مې تر ۲۹مې د سعودي عربستان په کوربه توب ترسره شي.

د افغانستان د فوټبال فدراسیون د معلوماتو له مخې، د هېواد د فوټبال د ۱۷ کلنو ملي لوبډله د ۲۰۲۵ کال د اسیايي ملتونو جام په سرلوبو کې په بي ګروپ کې د بنګله دېش، کمبودیا، فلیپین او مکاو له ۱۷ کلنو ملي لوبډلو سره لوبېږي.

د اکټوبر له ۱۹ څخه تر ۲۷ پورې به کمبوډیا د دې سیالیو کوربه وي.

ملګري ملتونه: ایټالیا له افغانستان سره درې میلیونه او سل زره ډالره مالي مرسته کړې

د ایټالیا بیرغ
د ایټالیا بیرغ

د افغانستان لپاره د ملګرو ملتونو ځانګړي وجهي صندوق اعلان وکړ چې ایټالیا له افغانستان سره درې میلیونه او سل زره ډالره مالي مرسته کړې ده.

دغه صندوق پرون، پنجشنبې پر خپله ایکسپاڼه یا پخواني ټویټر لیکلي چې په دې مرستو به د ښځو د پیاوړتیا لپاره کار واخیستل شي او د دې ترڅنګ به له اقلیمي بدلون سره مبارزه او د بې ځایه شویو او راستنیدونکو لپاره د دوامداره حللارو د موندلو هڅې پیاوړې شی.

دا له افغانستان سره د دغه صندوق له لارې د ايټاليا لومړۍ مالي مرسته ده.

د دې اونۍ په پیل کې د افغانستان لپاره د ملګرو ملتونو ځانګړي وجهي صندوق له افغانستان سره د ډنمارک د ۷ میلیونه او ۲۹ زره ډالري مرستې خبر ورکړی و.

بورکینافاسو د تروریستي پېښو له پلوه تر افغانستان وړاندې شو

ارشیف: بورکینافاسو کې له یوې پېښې وروسته امنیتي ځواکونه د پلټنو پر مهال
ارشیف: بورکینافاسو کې له یوې پېښې وروسته امنیتي ځواکونه د پلټنو پر مهال

بورکینافاسو د تروریستي پېښو له پلوه تر افغانستان وړاندې شو او په نړۍ کې له تروریزم څخه تر ټولو ډېر اغېزمن شوی هېواد وپېژندل شو.

تېر کال په بورکینافاسو کې نژدې دوه زره کسان ووژل شول.

دا خبره د اقتصاد او سولې انسټیټیوټ (IEP) په نوي راپور کې راغلې او ویل شوي چې په ۲۰۲۴م کې یې په نړۍ کې په تروریستي پېښو کې د ۱۹۰۷ تنو وژل کېدا او د ۴۴۲ تنو ژوبلېدا ثبت کړې ده.

له ۲۰۱۴ کال راهیسې د ترهګرۍ له امله مرګ ژوبله هر کال په پرله پسې توګه زیاته شوې ده.

د اسلامي دولت سختدریځه ډله په بورکینافاسو کې هم د افغانستان په شان په بریدونو کې لاس لري.

دې ډلې په دغه افریقايي هېواد کې فعالیت ډېر کړی.

تېر کال یې دوه بریدونه کړي وو، خو سږ کال یې تراوسه د ۷ حملو مسوولیت منلی دی.

د افغانستان په اتو ولایتونو کې د بارانونو، بادونو او سېلابونو د راوتلو اټکل شوی

په بغلان کې وروستیو سېلابونو خلکو ته درانه زیانونه اړولي دي.
په بغلان کې وروستیو سېلابونو خلکو ته درانه زیانونه اړولي دي.

د طالبانو د ټرانسپورټ او هوايي چلند وزارت د هوا پېژندنې ادارې اټکل کړی چې نن جمعه به د هېواد په اتو ولایتونو کې سخت بارانونه واوري او ښايي په یو شمېر سیمو کې د سېلابونو د راوتلو سبب شي

دې ادارې پرون پنجشنبې په یوه خبرپاڼه کې وویل چې په بدخشان، نورستان، بغلان، پروان، کونړ او میدان وردګ ولایتونو کې د سخت باران، تېزو بادونو او سېلابونو وړاندوینه کوي.

د اورښت اټکل په مختلفو سیمو کې له ۱۵ څخه تر ۲۵ میلي مترو پورې، او د باد سرعت په هر ساعت کې له ۵۰ څخه تر ۸۰ کیلومترو پورې اټکل شوی دی.

تېره میاشت د افغانستان په شمال، شمال ختیځ او لوېدیځو سیمو کې سېلابونو نژدې ۵۰۰ تنه مړه، سلګونه نور ژوبل کړل او دغه راز یې ډېر مالي تاوانونه واړول.

د افغانستان په اتو ولایتونو کې د اورښتونو، تالندې برښنا، بادونو او دوړو اټکل شوی

ارشیف: په پروان کې د باران ورېدو یو انځور
ارشیف: په پروان کې د باران ورېدو یو انځور

د طالبانو د ټرانسپورټ او هوايي چلند وزارت د هواپېژندنې ادارې سبا جمعه د افغانستان په اتو ولایتونو کې د نسبتاً تېزو اورښتونو، تالندې برښنا، بادونو او دوړو اټکل کړی دی.

دغې ادارې نن په یوه اطلاعیه کې ویلي په بدخشان، نورستان، کونړ، سمنګان، بغلان، پروان، کابل او میدان وردګ کې به د باران اندازه له ۱۵ څخه تر ۲۵ ملي مترو پورې وي.

په اطلاعیه کې ویل شوي چې په لوېدیځو ولایتونو کې به تېز بادونه، خاورې او دوړې وي چې د بادونو سرعت به په یوه ساعت کې له ۵۰ تر ۸۰ کیلومترو وي.

تېره میاشت د افغانستان ختیځ، شمال، شمال لوېدیځ او لوېدیځ ولایتونه د سختو اورښتونو او سېلابونو شاهدان وو چې خلکو ته یې د درنې مرګ ژوبلې اړولو تر څنګ سخت مالي زیانونه هم واړول.

نور راوښيه

XS
SM
MD
LG