د طالبانو یو لوړ پوړی پلاوی د قطر پلازمېنې دوحې ته رسېدلی، څو د افغانستان د ۵ هوايي ډګرونو د تخنیکي برخو د تړون په اړه خبرې اترې وکړي.
طالبان هیله ښيي چې قطر ته د تللي پلاوي د سفر په پایله کې به یې هغه ستونزې پای ته ورسېږي چې د کابل حامد کرزي او ۵ نورو هوايي ډګرونو د تخنیکي چارو مدیریت یو نړیوال شرکت ته سپاري.
قطر ته د کابل د هوايي ډګر د مدیریتي چارو د قرارداد د سپارلو په اړه د طالبانو د رییس الوزرا د لومړي مرستیال عبدالغني برادر له امر وروسته، یاد پلاوی دوحې ته رسېدلی.
د دې پلاوي مشري د طالبانو د ټرانسپورټ او هوايي چلند سرپرست وزیر حمیدالله اخندزاده کوي او په کې د بهرنیو چارو وزارت سرپرست امیرخان متقي، د اطلاعاتو و فرهنګ وزارت سرپرست خیرالله خیرخوا او د ملي دفاع وزارت مرستیال مالي خان شامل دي.
د طالبانو ویاند ذبیحالله مجاهد د شنبې په ورځ ازادي راډیو ته وویل، دا پلاوی به له قطري چارواکو سره پر ټولو هغو ستونزو خبرې وکړي چې د هوايي ډګرونو د تخنیکي مدیریت په برخه کې پاتې دي.
ذبیح الله مجاهد
هغه وویل: "پر دې یو جدي بحث ته اړتیا وه، د همدې لپاره زموږ پلاوی تللی دی. هیله ده چې دا ستونزې به نهايي او یو حل به ورته پیدا شي. د هوايي ډګرونو هغه تخنیکي چارې چې اړینې دي د یوه معتبر شرکت لهخوا به هغه تنظیم، نهايي او توافق به پرې وشي. کوښښ روان دی او د همداسې یو بحث لپاره مسوولین تللي دي."
د ۱۴۰۰ کال د سلواغې په اوومه د قطر د بهرنیو چارو وزارت وویل، قطر، ترکیې او طالبانو په پلازمېنه دوحه کې په خپله درې اړخیزه غونډه کې د کابل د هوايي ډګر د مدیریت او ترې د ګټنې په اړه په "څو کلیدي موضوعاتو" هوکړه کړې.
خو تر اوسه دا روښانه نه ده چې دا کلیدي موضوعات کوم موارد را نغاړي.
له دې وړاندې د د طالبانو د ټرانسپورت او ملکي هوايي چلند ادارې ویاند امامالدین احمدي ازادي راډیو ته ویلي و، د پنځو هوايي ډګرونو د امنیتي څرنګوالي، ځمکنیو خدماتو او هوايي حریم باندې بحثونه شوي.
ښاغلي احمدي زیاته کړې وه، ترکیه او قطر به په هوايي ډګرونو کې د ماشینونو او سکېنرونو په برخه کې له افغانانو سره مرسته وکړي.
وړاندې داسې راپورونه او ویډیوګانې هم خپرې شوي چې په کې ادعا وشوه، قطري ځواکونه د کابل په هوايي ډګر تمرینات کوي، خو طالبانو دا راپورونه رد کړل.