د پاکستان سترې محکمې حکم ورکړ چې د دغه هېواد پخوانی صدراعظم شاهد خاقان عباسي کولی شي د پاکستان د راتلونکې میاشتې په پارلماني انتخاباتو کې ګډون وکړي.
د پاکستان سترې محکمې د جمعې په ورځ د یوې انتخاباتي محکمې هغه پرېکړه رد کړه چې ویلي یې وو د پاکستان پخوانی صدراعظم شاهد خاقان عباسي نشي کولی د دغه هېواد په راتلونکو انتخاباتو کې ګډون وکړي.
په دې سره د سترې محکمې پرېکړې د پاکستان د مسلم لیګ پر ګوند چې د تېر کال له جولای میاشتې راهیسې له بحران سره مخامخ وو، د یوه بل ګوزار مخه ونیوله.
شاهد خاقان عباسي په دوو حوزو کې په انتخاباتي کمپاین بوخت وو چې محکمې په اسلام آباد کې د هغه له کور سره نېږدې په انتخاباتي حوزې کې د نوموړي ګډون منع کړی وو.
عباسي په دې حوزه کې د پاکستان د یوه بل سیاستوال او پخواني کرکټ لوبغاړي عمران خان سره سیالي کوله.
د ښاغلي عباسي مدافع وکیل خواجه طارق رحیم رویټرز خبري آژانس ته وویل:
"موږ له سترې محکمې څخه د ممنوعیت د تعلیق حکم ترلاسه کړ."
د کاندیدانو د صلاحیت ردول «په انتخاباتو کې د ګډون ممانعت» یوه له هغو ستونزو ده چې د نواز شریف مسلم لیګ ګوند د جولای د ۲۵ تر انتخاباتو دمخه ورسره مخامخ دی.
نواز شربف نور په ټاکنو کې برخه نشي اخیستی
د پاکستان سترې محکمې د پنجشنبې په ورځ د دغه هېواد یو پخوانی وزیر دانیال عزیز چوهدري چې د مسلم لیګ ګوند غړی دی، په راتلونکو انتخاباتو کې له ګډون څخه له دې کبله منع کړ چې پر سترې محکمې یې انتقاد کړی وو.
د پاکستان ستره محکمه
دانیال عزیز د یوه ساسیتوال په توګه د نواز شریف د حذفولو له کبله پر سترې محکمې انتقاد وکړ چې محکمې دا کار سپکاوی وباله.
نواز شریف استدلال کوي چې د پاکستان پوځ د قضایي قوې له لوړ پوړو چارواکو سره په ګډه د هغو پرېکړو پلوي کړې چې دی یې د تل لپاره له سیاسته لېري کړ.
د سترې محکمې پرونی حکم یوه ورځ وروسته له هغه صادر شو چې یوې پاکستانۍ انتخاباتي محکمې وویل چې شاهد خاقان عباسي د خپلې شتمنۍ په اړه جزئیات نه دي شریک کړي.
خو عباسي دغه تورونه ردويؤ هغه ویلي:
"ما ټوله هغه شتمني چې زما پلار په ۱۹۴۷کال کې اخیستې وه، ثبت کړې ده."
شاهد خاقان عباسي د نوازشریف د ګوند یو عمده مشر وو چې د شریف تر سلب صلاحیت کېدو وروسته د هغه ځای ناستی شو.