د پاکستان حکومت او اپوزېسیون پرون دوشنبه نوي صدراعظم ته دنده وسپارله چې مؤقت حکومت جوړ او انتخابات ترسره کړي.
د پاکستان حکومت او پارلمان اعلان وکړ چې د مؤقت حکومت د جوړولو او پارلماني انتخاباتو د ترسره کولو دنده پخواني قاضيالقضات ناصرالملک ته سپارل شوې ده.
د پاکستان صدراعظم شاهد خاقان عباسي، د پارلمان په ولسي جرګه کې د اپوزېسیون مشر سید خورشید شاه او د ملي اسامبلۍ مشر ایاز صادق پرون دوشنبه په اسلاماباد کې په یوه خبري غونډه کې وویل، مؤظف صدراعظم ناصرالملک به مؤقت حکومت جوړ او د روان کال د جولای په ۲۵مه به انتخابات ترسره کړي.
د پاکستان په ولسي جرګه کې د اپوزېسیون مشر سید خورشید شاه خبریالانو ته وویل چې د مؤقت صدراعظم د غوره کولو پرېکړه د ټولو په خوښه شوې ده.
هغه په دولتي مأموریتونو کې د ناصرالملک د کار ستاینه وکړه:
"هغه نوم چې د مؤظف صدراعظم په توګه غوره شوی، ناصر الملک دی. هغه د پاکستان قاضيالقضات پاتې شوی او خپل تاریخي رولیې لوبولی دی. هیلهمند یم چې خدای به دا جذبه او همت ورکړي چې د ۲۰۱۸ میلادي کال د جولای په ۲۵مه په پاکستان کې د انتخاباتو په ترسره کولو بریالی شي."
۶۸ کلن ناصرالملک د ۲۰۱۴ کال له جولای څخه د ۲۰۱۵ کال تر اګسټ میاشتې پورې د پاکستان قاضيالقضات و.
له هغه مخکې د سترې محکمې لوړ رتبه قاضي او تر هغه هم مخکې په پېښور کې د خېبر پښتونخوا د ایالتي محکمې قاضيالقضات و.
د پاکستان حکومت او د اپوزېسیون ګوندونو له څه باندې دوو میاشتو راهیسې د مؤقت صدراعظم د غوره کولو لپاره بحثونه پیل کړي وو.
د پاکستان حکومت او اسامبلیو د کار دوره د روانې مې میاشتې په ۳۱مه نېټه پای ته رسېږي.
د ۲۲۴ میلیونه وګړو او اټمي وسلو لرونکی پاکستان له کلونو راهیسې له سیاسي بحران سره لاس او ګرېوان دی او په تېرو شپږو لسیزو کې د دې هېواد په لنډ تاریخ کې ډېری حکومتونه د خپلې پنځه کلنې دورې په پوره کولو نهدي بریالي شوي.
پاکستان د پوځي کودتاګانو هېواد دی او نواز شریف د دې هېواد وروستی صدراعظم هم تېر کال د فساد په تور د سترې محکمې له حکم سره سم له واکه لیرې شو.
خو د نواز شریف ګوند چې په مسلم لیګ نواز مشهور دی تر اوسه په واک کې دی.
