افغان حکومت وايي، د سولې د مذاکرو مالک دی او بل چا ته په دې کې د مداخلې حق نه ورکوي.
د جمهوري ریاست مرستیال ویاند دواخان مينه پال بېګا، ازادي راډیو ته وویل چې حکومت هېڅ لوري ته اجازه نه ورکوي چې د افغانستان د سولې پر برخلیک او د افغانانو د راتلونکې په اړه خبره وکړي.
د افغانستان لپاره د روسیې د ولسمشر ځانګړي استازي او د هغه هېواد د بهرنیو چارو وزارت د اسیايي چارو مرستیال ضمیرکابلوف پرون جمعه انټرفکس خبري اژانس ته ویلي چې د وسله والو طالبانو له دې وړاندیزه ملاتړ کوي چې بهرني ځواکونه باید له افغانستانه ووزي.
خو د جمهور رئیس مرستیال ویاند وايي، د وسله والو طالبانو له لوري روان تشدد په افغانستان کې د بهرنیو ځواکونو پاتې کېدو ته زمینه برابره کړې ده.
دواخان مینه پال.
دواخان منیه پال وویل:
"په افغانستان کې د ټولو تروریستي ګرپونو لامل او د هغوی لپاره زمینه همدې وسله والو طالبانو برابره کړې ده، په افغانستان کې اوس شل تروریستي ډلې فعالیت کوي او د دې ټولو ډلو لپاره طالبانو د فعالیت زمینه برابره کړې ده، طالبان دي چې دلته یې دناټو او نورو قواوو پاتې کېدو ته زمینه مساعده کړې ده."
د افغانستان لپاره د روسیې د ولسمشر ځانګړي استازي ضمیرکابلوف له انټرفکس سره په مرکه کې له حکومت او طالبانو غوښتنه کړې چې خبروته سره کښېني او پر عادي افغانانو د جګړې د تپلو پرځای، جګړه پای ته ورسوي.
ضمیر کابلوف
وسله والو طالبانو هم د کوچني اختر په مناسبت په خبرپاڼه کې چې پرون رسنیو ته استول شوې، ویلي چې امریکا په افغانستان کې د جګړې پر دوام بری نه شي ترلاسه کولائ.
په خبرپاڼه کې له امریکا غوښتنه شوې چې "حقایق درک کړي" او "د جګړې غوښتونکې" کړنلاره بدله کړي.
داپه داسې حال کې ده چې د امریکا د متحدو ایالاتو دفاع وزارت د افغانستان لپاره د جګړې پر نوې کړنلاره غور کوي.
داسې ګڼل کېږې چې د امریکا نوی دفاع وزیر افغانستان ته د زرګونو عسکرو پر استولو کار کوي.
په همدې حال کې، امریکايي چارواکو ویلي چې په نوې کړنلاره کې به یوازې پوځي اقدام نه بلکې سیاسي هلې ځلې هم شاملې وي.
د امریکا د دفاع وزارت یوه لوړ رتبه چارواکي، په دې اړه واشنګټن پوست ورځپاڼې ته د خپل هویت د پټ پاتې کېدو په شرط ویلي چې په نوې کړنلاره کې به پرپاکستان د فشارونو زیاتول شامل وي څو هلته د تروریستي ډلو ځالې اومالي سرچینې بندې شي.