د ننګرهار چارواکي وايي، ډېر هغه وسله وال چې د کوټ په ولسوالۍ کې د داعش په لیکو کې جګړه کوي پاکستانیان دي او د پاکستان د استخباراتي ادارې په قومنده جنګیږي.
افغان چارواکي همدارنګه ادعا کوي چې د داعش وسله وال د پاکستان د پوځي استخباراتي ادارې تر مستقیمې قومندې لاندې په ننګرهار کې فعالیت کوي.
د ننګرهار د والي ویاند عطاالله خوګیاڼي په دې اړه ازادي راډیو ته وویل:
"ډېرکله د اچین په ولسوالۍ، د کوټ په اړوند سیمو او یا په هسکه مېنه کې چې کله د داعش وسله وال وژل کیږي او اسناد ترې تر لاسه کیږي، یا کله چې ژوندي نیول کیږي او اسناد یې څرګندیږي، د کرښې د اغاړې د اورکزیو د ایجنسۍ اوسیدونکي وي.زموږ استخباراتي معلومات هم څرګندوي چې د داعش ډېر وسله وال له پاکستانه را اوښتي او دلته جنګیږي."
پاکستاني چارواکو تل دا تورونه چې ګوندې افغانستان ته د جګړې لپاره وسله وال استوي رد کړي دي.
د ننګرهار د والي ویاند ښاغلي خوګیاڼي دا هم وویل چې په ننګرهار کې د داعش د وسله والو ترمنځ د تاجکستان اتباع هم شته چې په پاکستان کې تر روزنې وروسته افغانستان ته اوښتي دي.
خوګیاڼی: ننګرهار کې د داعش د وسله والو ترمنځ د تاجکستان اتباع هم شته
"له نورو بېلابېلو هېوادونو لکه تاجکستان او نورو څخه لومړی دا سخت دریځې پاکستان ته ځي، هلته د داعش په لیکو کې جذبیږي او تر پوځي روزنې وروسته افغانستان ته راغلي دي."
د ننګرهار د والي ویاند دا څرګندونې په داسې حال کې کوي چې یو شمېر نړیوالو رسنیو هم د ننګرهار د چارواکو له خولې ویلي چې د کوټ ولسوالۍ په سلو کې دیرش سیمې د داعش په واک کې دي.
په نړیوالو رسنیو کې هم د داعش د وسله والو په منځ کې د بهرنیو وسله والو د حضور خبره شوې ده.
یو شمېر رسنۍ د ننګرهار د سیمه ییزو چارواکو له خولې وايي چې د داعش په وسله والو کې د عربي هېوادونو، روسیې، چیچنیا او تاجکستان اتباع شامل دي چې په ننګرهار کې فعالیت کوي.
اخوا په تېرو څو ورځو کې د افغانستان امنیتي ادارې په پرلپسې توګه په ننګرهار کې د پوځي عملیاتو او په عملیاتو کې طالب او داعش وسله والو ته د مرګ ژوبلې د اوښتې راپورونه ورکوي. خو ځايي خلک وايي تراوسه یې د روانو عملیاتو پریکنده اغیزې نه دي لیدلي.
همدارنګه ویل کیږي چې تر پنځه سوو زیاتې کورنۍ په کوټ کې د سختو جګړو له کبله له خپلو کورونو تیښتې ته اړ شوي. خو د ننګرهار د والي ویاند وايي یو شمېر له دې بې ځایه شوېو کورنیو څخه د امنیتي وضعیت په ښه کېدو بېرته خپلو سیمو ته ستانه شوي دي.
که څه هم ښاغلی خوګیاڼي وايي، سیمه ییزو ادارو د بې ځایه شوېو کورنیو سره مرستې کړې خو هغو چې د جګړو له کبله بې ځایه شوي، ازادي راډیو ته یې ویلي چې هیڅ او یا ډیرې کمې مرستې ور رسیدلې دي.
د یادونې وړ ده چې په دې وروستیو کې په ننګرهار کې امنیتي وضعیت کړکیچن دی.
د دې ولایت بېلابېلې ولسوالۍ د داعش او طالب وسله والو د پراخو فعالیتونو شاهدې دي او په جلال اباد ښار کې هم خلک د ناامنیو، وسله والو ګواښونو او امنیتي ستونزو څخه سر ټکوي.