په پلازمېنه اسلامآباد او شاوخوا یو شمېر کوچنیو ښارونو کې د تحریک انصاف ګوند د غړیو اعتراضونه او لاریونونه روان دي.
په دې ترڅ کې د پاکستان حکومت له پوځیانو غوښتي چې سر له نن څخه د پلازمېنې په بېلابېلو سیمو کې د امنیت د تامین لپاره ځای پرځای شي.
د پخواني صدر اعظم عمران خان پلویان د شانګهای همکاري د سازمان د غونډې په درشل کې اسلامآباد د خپلو اعتراضونو لپاره غوره کړی دی.
د پاکستان د حکومت په خبرپاڼه کې راغلي چې د پوځیانو د ځای پرځای کېدو هدف د شانګهای همکاري سازمان تر ۱۷مې غونډې مخکې د پلازمېنې امنیت دی.
دغه غونډه د اکټوبر په ۱۵مه په اسلامآباد کې پیلېږي.
د پاکستان امنیتي ځواکونو پلازمېنې ته د عمران خان د زرګونو پلویانو د داخلېدو د مخنیوي لپاره ښار ته غځېدلې لارې تړلي دي، د ټیلیفون زیګنالونه یې بند کړي او د پاکستان د کورنیو چارو وزارت ویلي چې چاته به اجازه ورنه کړي چې د ګډوډیو د جوړېدو لپاره ښار ته داخل شي.
تحریک انصاف ګوند ادعا کړې چې امنیتي ځواکونه په اسلامآباد کې د خیبرپښتونخوا د اعلی وزیر د استوګنې ځای ته ننوتي او وزیر اعلی علي امین ګنډاپور یې نیولی، خو پولیسو دا ادعا رد کړې ده.
بل لور ته د پاکستان دفاع وزیر خواجه اصف پرون په سیالکوټ کې خبریالانو ته د تحریک انصاف د ګوند اعتراضونو ته په اشارې سره وویل چې دا پر اسلامآباد او پاکستان د دښمن ځواکونو د برید په څېر دی.
د امنیتي ځواکونو او لاریون کوونکو ترمنځ د اخ او ډب راپورونه هم خپاره شوي دي.
پاکستاني ورځپاڼو د پاکستان د کورنیو چارو د وزیر محسن نقوي په وینا راپور ورکړی چې ادعا کوي چې د لاریون کوونکو له لوري پر پولیسو اوښکي بهونکي مرمۍ فیر شوي دي.
د پاکستان د بشري حقونو کمېسیون پرون په خپله ایکسپاڼه یا پخواني ټویټر کې یو بیان خپور کړ چې پهکې د پاکستان له حکومت څخه غوښتل شوي څو د تحریک انصاف ډلې له اعتراضونو سره په اسلامآباد، د پنجاب په نورو سیمو او ټول پاکستان کې له زغمه کار واخلي.
په دې بیان کې د پاکستان له حکومته دا غوښتنه هم شوې چې له خپلو سیاسي مخالفانو سره خبرو اترو ته کېني او اختلافات په سولهییز ډول د ټولو لوریو په خوښه حل کړي.
