د لبنان حزبالله نن سهار وختي د اسراییل په شمال کې پر څو سیمو تر ۱۰۰ زیات توغندي وویشتل.
حزبالله ډلې نن سهار یکشنبې د حیفا بندر په شمول د اسراییل شمالي ښارونه په نښه کړل.
د اسراییل په درېیم لوی ښار او شاوخوا ښارونو کې ښوونځي او ډېر نور عادي ورځني فعالیتونه وځنډول شول.
د اسراییل پوځ ویلي چې حزبالله له منځواټنه توغندو څخه هم کار اخیستی او لسګونه ملکي هدفونه یې ویشتلي دي.
د اسراییل پوځ وایي، په یوه ساعت کې حزبالله ۱۰۰ توغندي ویشتلي دي.
د اسراییل د دفاع وزارت د ویاند په وینا، د حزبالله ډلې توغندیو د اسراییل ملکي وګړي په نښه کړي دي.
اسراییلي رسنیو د خپل هېواد په شمالي برخو کې پر عامه ځایونو د حملو له کبله د زیانمن شویو او ویجاړو شویو کورونو، د لسګونو سوځېدلیو موټرو او د راکټونو د ټوټو عکسونه او ویډیوګانې خپرې کړي دي.
د اسراییل مرستندویه ادارو ویلي چې یو شمېر ملکي کسان ټپیان شوي دي.
ویل کېږي چې زیاتره کسان هغه مهال ټپیان شول چې پناهځایونو ته روان وو.
مګر د هارتص ورځپاڼې پر اساس، له بریدونو وروسته د خطر زنګ ووهل شو او په همدې مهال په یوه ترافیکي پېښه کې یو تن ووژل شو.
په ټپیانو کې یو تن د مسلمان مېشتي ښار "جدیده مکر" اوسېدونکی و.
د اسراییلي پوځ د راډیو د راپور له مخې، د حزبالله د حملو له زیاتېدو سره د اسراییل د شمال یو میلیون اوسېدونکو پناهځایونو او خوندي ځایونو ته پناه وړې ده.
حیفا او د دغه بندر شاوخوا ښارګوټي، کریات بیالیک، یوکنیام، عمک ییزرایل او د لوېدیځ ګالل مېشت ځایونه له هغو سیمو څخه دي چې د حزبالله د راکټي بریدونو لهخوا په نښه شوي دي.
له دې سیمو پرته د طیرات هکارمل او کریات اطا ښاروګیو اکثره ښوونځي او د عامه او خصوصي موسسو فعالیتونه درول شوي دي.
رامبام روغتون، چې په حیفا کې یو لوی طبي کمپلېکس دی او له حیفا دباندې نورو روغتونونو اعلان وکړ چې دوی د درملنې چارې د ځمکې لاندې مرکزونو او خوندي ځایونو ته لېږدوي.
له بلې خوا، حزبالله د یکشنبې په ورځ په خپلو بیانونو کې، پرته له دې چې په حیفا او د اسراییل په نورو شمالي ښارونو کې په ملکي هدفونو باندې بریدونه یاد کړي، ادعا وکړه چې دوی د خپلو کسانو په مخابراتي تجهیزاتو کې د چاودنو په ځواب کې د حیفا بندر په څنډه کې د کرایوت په سیمه کې په رافایل تاسیساتو باندې برید کړی دی.
رافایل د اسراییل د هغو پوځي صنعتونو برخه ده چې په ټول هېواد کې ډېرې فابریکې لري.
حزبالله دا هم ویلي چې د اسراییل له پولې ۵۰ کیلومتره لیرې یې د رامات ډیویډ پر اډې برید کړی دی.
دې ډلې ویلی چې د یکشنبې په ورځ د دوی بریدونه د نورو بریدونو لپاره یو پیل و.
