پهداسې حال کې چې د طالبانو حکومت د پاریس د المپیک په سیالیو کې د کیمیا یوسفي ګډون په رسمیت نه پېژني، خو هغه د افغانستان په استازولۍ سیالۍ کوي.
یوسفي چې د المپیک د ځغاستې په رشته کې سیالۍ کوي، تر خپلې لوبې یې وړاندې له ازادي راډيو سره په خبرو کې وویل، دا ځل یې ټول تمرکز پهدې دی چې د افغانستان د ښځو استازولي وکړي.
نوموړې وويل: "د المپیک پهدې پړاو کې مې ټول تمرکز په ځانګړې توګه د افغانستان د ښځو او نجونو په استازولۍ دی. هغه ښځې او نجونې چې له تېرو درې کلونو راهیسې له خپلو لومړنیو حقوقو بېبرخې دي. پهدې سیالیو کې د افغانستان د ښځو له هیلو استازولي کوم او نړۍ ته وایم چې افغانې جونې هېرې نهکړي. افغانې جونې په افغانستان کې ستاسې ملاتړ ته اړتیا لري."
کیمیا یوسفي د هغه شپږ کسیزې ورزشي ډلې غړې ده چې د افغانستان په استازولۍ یې د پاریس د المپیک په سیالیو کې ګډون کړی دی.
د طالبانو حکومت ویلي دي چې، د المپیک په سیالیو کې د انجونو ګډون په رسمیت نهپېژني.
کیمیا یوسفي د دې سیالیو د لارموندنې د پړاو په درېیم ګروپ کې د نیکاراګوا، پاپوا نیوګیني، قطر، سوریه، واناتو، بولیویا او ګینه هېوادونو د لوبغاړو پر وړاندې سیالي کوي.
د دوی سیالي به نن داګست په دویمه نېټه د کابل پر وخت تر غرمې وروسته یوه بجه د پاریس د استاد دو فرانس په لوبغالي کې پیل شي.
دا درېیم ځل دی چې کيمیا یوسفي د المپیک په سیالیو کې د افغانستان استازولي کوي.
هغې په لومړي ځل د ۲۰۱۶ ز کال د برازیل او په ۲۰۲۰ کال د توکیو د المپیک په سیالیو کې هم ګډون درلود.
کیمیا یوسفي وروسته له هغې چې په ۲۰۲۱ ز کال طالبانو د افغانستان حاکمیت ترلاسه کړ، له هېواده ووته او په اسټرالیا کې یې د مهاجرت ژوند پیل کړ.
