د ایران د ولسمشرۍ د دویم پړاو ټاکنو ګټونکي مسعود پزشکیان ویلي چې هر چا ته د دوستۍ لاس غځوي.
د ایران د ټاکنو د کمېسیون ویاند محسن اسلامي د ایران د دولتي تلوېزیون له لارې اعلان وکړ چې اصلاح غوښتونکي کاندید پزشکیان د ټاکنو د دویم پړاو ۵۳،۷ سلنه رایې ګټلې او د رایو شمیر یې ۱۶ میلیونه او ۳۸۴ زره او ۴۰۳ ته رسېږي او د هغه سیال کاندید سعید جلیلي ۴۴،۳ سلنه رایې خپلې کړي او د رایو شمېر یې ۱۳ میلیونه او ۵۳۸ زره او ۱۷۹ ته رسېږي.
مسعود پزشکیان ویلي چې د خپلې واکمنۍ پر مهال به هر چا ته د دوستۍ لاس وغځوي.
هغه ټینګار کړې چې له خپلو سیاسي مخالفانو سره به د خپل هېواد د پرمختګ لپاره ګډ کار وکړي.
سعودي عربستان، د روسیې ولسمشر ولادمیر پوتین او ځینو نورو هېوادونو پزشکیان ته د ایران د ولسمشرۍ ټاکنو د ګټلو مبارکي ویلې ده.
د ایران د ولسمشرۍ په دوهم پړاو انتخاباتو کې چې پرون جمعه ترسره شول، د رایې ورکولو پر شرایطو د برابرو کسانو له ډلې څه کم ۵۰ سلنو یې خپلې رایې کارولي چې د تېرې جمعې یعنې د ټاکنو د لومړي پړاو پرتله زیات شمېر دی.
د تېرې جمعې په ټاکنو کې د رایې ورکولو پر شرایطو د برابرو کسانو شاوخوا ۴۰ سلنه خپلې رایې کارولې وې.
مسعود پزشکیان له ۲۰۰۸م کال راهیسې د ایران د پارلمان غړی و او له ۲۰۱۶م کاله تر۲۰۲۰م کاله پورې چې کله منځلارو او اصلاح غوښتونکو په پارلمان کې اکثریت درلود، د پارلمان د مرستیال په توګه دنده ترسره کړې ده.
په ایران کې د ولسمشرۍ دغه تر وخت مخکې انتخابات د ایران د پخواني ولسمشر ابراهیم رییسي چې د بهرنیو چارو له وزیر حسین امیر عبداللهیان او ځینو نورو چارواکو سره د مې میاشتې پر ۱۹مه د څرخي الوتکې د نسکورېدو په پېښه کې مړ شو، د ځایناستي د ټاکلو لپاره ترسره شول.
د ایران د ولسمشرۍ د ټاکنو په لومړي پړاو کې مسعود پزشکیان، مصطفی پورمحمدي، سعید جلیلي، علیرضا زاکاني، امیرحسین قاضيزاده هاشمي او محمدباقر قالیباف کاندیدان وو، خو درې کاندیدان علیرضا زاکاني، میر حسین قاضيزاده او محمد باقر قالیباف د جلیلي په ګټه له خپلې کاندیداتورۍ تېر شول.
د ټاکنو په لومړي پړاو کې که څه هم مسعود پزشکیان او سعید جلیلي زیاتې رایې ګټلې وې، خو یو هم د ۵۰ فیصده رایو په خپلولو نه و بریالی شو، ځکه ټاکنې دویم پړاو ته لاړې.
