د خوړو نړیوال پروګرام یا "ډبليوایفپي" وايي، په افغانستان کې په هرو سلو کسانو کې ۴۷ یې د ژوندي پاتې کېدو لپاره بشري مرستو ته اړتیا لري.
"ډبليوایفپي" په افغانستان کې د خلکو د ستونزمن اقتصادي وضعیت په اړه د اندېښنو په دوام وايي چې په افغانستان کې د ژوندي پاتې کېدلو لپاره له هرو سلو کسانو څخه ۴۷ يې بشري مرستو ته اړتیا لري.
د خوړو نړیوال پروګرام په خپله ایکسپاڼه لیکلي، دا جوته کوي چې د افغانستان د نږدې ۴۳ میلیونو وګړو له درېیمې برخې څخه ډېر کسان له بېوزلۍ او لوږې سره مخ دي.
یاد سازمان زياتوي چې د هرې ورځې په تېرېدو سره په افغانستان کې د بشري وضعیت او په دغه هېواد کې د بشري مرستو د کمښت په اړه اندېښنې مخ په ډېرېدو دي.
یو شمېر کورنۍ، چې له سخت اقتصادي وضعیت سره مخ دي، شکایت کوي چې د خوړو او ژوند کولو لپاره څه نه لري او د مرستو غوښتنه کوي.
په کابل کې د یوې کورنۍ چلونکې ګیتي وايي چې مېړه یې مړ شوی او په کور کې د لاسي توکو د لارې د خپل ځان او ماشومانو لګښتونه په ترلاسه کوي.
هغې وویل: "زه پخپله بې سرپرسته یم، درې ماشومان لرم، مشر زوی مې ناروغ دی او ستونزه لري، اوسمهال بهر کار نهشم کولى، په کور کې همدا ښيښه دوزي او خامک کوم، خو لګښتونه پوره کولى نهشم، د کور خرڅ نه لرم، زه د کور کرایه نه شم ورکولی، زه په کور کې هېڅ نه لرم او چې هر څه وکړم يوازې زه د پنځو وچو ډوډۍ لپاره پیسې پیدا کوم، بس."
د کونړ ولایت یوه مېرمن مدینه، چې دا هم د خپلې کورنۍ سرپرستي پر غاړه لري له ورته ستونزو سره مخ ده.
هغه وايي: "له ما د کور درې نیم زره کرایه اخلي، د درېیو میاشتو کرایه مو نه ده ورکړې، زه يې له کوره ايستلم، زما ټول کالي يې بېرون واچول. يو زوى مې کڅوړې او موشنګ خرڅوي ۳۰ یا ۵۰ افغانۍ ګټي، ترکاري پرې اخلو او د کور کرايې ته يې ټولوو."
دوی ټینګار کوي چې مرستې ته اړتیا لري او د ملي او نړیوالو مرستندویه بنسټونو بشري مرستو ته سترګې په لار دي.
د خوړو نړیوال پروګرام تر دې مخکې خبرداری ورکړی و چې له مې میاشتې وروسته به له افغانستان سره د خوراکي توکو د مرستو لړۍ ودروي.
د دې موسسې د ویاند مرستيال ضیاالدین صافي ازادي راډيو ته وویل چې د بودیجې د سخت کمښت له امله به د خوړو نړیوال پروګرام به وتوانېږي چې په مې میاشت کې له ۲.۵ میلیونو کسانو او د جون په میاشت کې نیم میلیون کسانو ته مرستې ورسوي.
بل خوا د ملګرو ملتونو د بشري چارو د همغږۍ دفتر یا اوچا د یکشنبې په ورځ په خپل تازه راپور کې ویلي چې د روان کال د اپرېل او جون میاشتو ترمنځ به د بودیجې کمښت د دې لامل شي چې د سرپناه، روغتیا او تغذيې، خونديتوب او پوهنې په برخو کې مرستې بندې شي.
په افغانستان کې د طالبانو له بيا ځلي واکمنۍ وروسته بېوزلي او بېکاري په بېساري ډول زياته شوې ده.
د اوچا د شمېرو له مخې سږ کال په افغانستان کې ۲۳.۷ میلیونه خلک بشري مرستو ته اړتیا لري.
