د سپینې ماڼۍ د ملي امنیت ویاند جان کربي د دوشنبې په ورځ وویل چې په تېرو څو ورځو کې غزې ته د بشري مرستو په رسولو کې د پام وړ زیاتوالی راغلی دی او زیاته یې کړه چې متحده ایالات غواړي دا مرستې دوام ومومي.
هغه له MSNBC سره په مرکه کې وویل: "مرسته په تېرو څو ورځو کې په ډراماتیک ډول زیاته شوې ده. دا مهمه ده، مګر دا باید دوام ومومي."
د سپینې ماڼۍ د ملي امنیت ویاند زیاته کړه چې دوه زره لارۍ مرستې غزې تړانګې ته داخلې شوې دي.
د دې میاشتې په پیل کې، د متحده ایالاتو ولسمشر جو بایډن ګواښ کړی و په هغه صورت کې به په غزه کې د اسراییلو د عملیاتو ملاتړ وکړي چې اسراییل د مرستندویه کارکونکو او ملکیانو د خوندیتوب لپاره کوټلي ګامونه پورته کړي.
د امریکا ولسمشر دغه څرګندونې وروسته له هغې وکړې چې د ورلډ سنټرل کیچن په نامه د یوې خیریه موسسې اوه غړي د اسرائیلي پوځ په برید کې ووژل شول.
دا لومړی ځل و چې د امریکا ولسمشر هڅه وکړه له اسراییلو سره د امریکا ملاتړ په جګړه کې د دغه هېواد د پوځیانو په چلند مشروط کړي.
جان کربي زیاته کړه: "لکه څنګه چې ولسمشر بایډن وویل، که موږ د وخت په تېریدو سره د پام وړ بدلون ونه وینو، د غزې په اړه زموږ پالېسي به بدله شي."
په غزه کې د اسراييلو له هوايي او ځمکنيو عملياتو شپږ مياشتې تېرې شوې دي. دا عملیات د اکټوبر په اوومه د اسراییلو پر جنوبي سیمو د حماس ډلې له برید سره پیل شول. حماس د امریکا متحده ایالاتو او اروپايي اتحادیې لخوا د یوه ترهګر سازمان په توګه پېژندل شوی.
د غزې تړانګې زیاتره برخې د اسراییلو په عملیاتو کې ویجاړې شوي او فلسطینیان له پراخې قحطۍ او ناروغیو سره مخامخ دي. د غزې نږدې ټول اوسېدونکي بې کوره شوي دي.
مرستندویه ادارو شکایت کړی چې اسراییل د بشري مرستو لپاره د اړتیا وړ خوراکي توکو، درملو او نورو موادو ته د کافي لاسرسي تضمین نه کوي.
