د اسراییل دفاعي ځواکونه وايي قطعات یې د غزې تړانګې د جنوبي ښار خان یونس په شا و خوا کې خپل روان پوځي عملیات پراخوي.
دغو ځواکونو پرون جمعه په ایکس شبکه (پخواني ټویټر) کې دا خبر ورکړی، خو نور تفصیلات یې نه دي ورکړي.
د اسراییل د دفاعي ځواکونو په وینا، د دوی پوځیانو په هوايي حملو، د نښه ویشتونکو او ټانکو په ډزو ګڼ تروریستان ختم کړي دي.
د جرمني خبري اژانس په لیکنه، ګومان کېږي چې د حماس افراطي ډلې رهبران به په خان یونس کې پټ وي چې د اسراییل دفاعي ځواکونو په کې خپل پوځي عملیات متمرکز کړي دي.
د امریکا متحد ایالتونه او اروپايي ټولنه د حماس افراطي ډله یو تروریستي سازمان ګڼي او اسراییل د دې ډلې د ختمولو ژمنه کړې ده.
اسراییل د حماس ډلې د ختمولو ژمنه کړې ده.
په غزه کې دا جګړه وروسته له هغې پیل شوه چې لومړی د حماس افراطي ډلې د اکتوبر میاشتې پر اوومه پر اسراییل په حملې سره ۱۲۰۰ کسان ووژل او ۲۴۰ نور کسان یرغمل کړل.
د حماس افراطي ډلې تر ولکې لاندې د غزې روغتیا وزارت د اسراییل په تازه حملو کې یوازې پرون د ۱۸۷ کسانو د وژل کېدو خبر ورکړی دی.
دغه وزارت پرون جمعه ویلي چې ۳۱۲ نور فلسطینیان په دغو حملو کې ټپیان شوي دي.
د غزې روغتیا وزارت وايي، په ټوله کې په غزې تړانګه کې د وژل شویو کسانو شمېر ۲۱زره ۵۰۷ ته زیات شوی، هغه ارقام چې خپلواکو سرچینو تایید کړي نه دي.
خو ملګرو ملتونو او نړیوالو څارونکو بنسټونو ویلي، چې د غزې د روغتیا وزارت مخکنۍ شمېرې کره وې.
دغه جګړه چې څه کم ۱۲ اوونۍ یې کېږي، د فلسطینیانو د کلابند شوي قلمرو د ویجاړۍ سبب شوې ده.
