د جرمني په رامشټاین هوایي ډګر کې د اوکراین د دفاع لپاره د تماس ډلې په پرونۍ غونډه کې اوکراین د هوایي دفاعي سیستم او د مهماتو غوښتنه وکړه.
د دې په ځواب کې له اوکراین سره یو لړ ژمنې وشوې.
د ناټو سرمنشي ینس ستولتنبرګ وویل چې، اوکراین له روسي ځواکونو څخه د نورو سیمو د نیولو لپاره احتمالي بریدونو ته چمتو کېږي.
ینس ستولتنبرګ دا خبره په جرمني کې د کییف د نړیوالو ملاتړیو په غونډه وکړه.
دا غونډه د جرمني په رامشتاین هوایي اډې کې وشوه.
د غونډې په ځای کې د ناټو سرمنشي ازادي راډیو ته وویل، چې تر اوسه هم له اوکراین سره د ناټو او د ناټو د متحدانو مرستې اغېزمنې وې.
نوموړي وويل: "زموږ مسوولیت د ناټو د متحدانو او شریکانو په صفت دا دی چې دا ډاډ ترلاسه کړو چې د امکاناتو تر بریده له اوکراین سره د تجهیزاتو مرسته وکړو. دغه ملاتړ د جګړې په ډګر کې ښکاره تغیر رامنځته کړی دی، باید دې ته مو پام وي چې اوکراین توانېدلی دی چې روسیي ځواکونه د کییف له لورې وګرځوي او په شمال کې یې هم په شا کړي."
ستولتنبرګ زیاته کړه چې، دی ډاډه دی چې اوکرایني ځواکونه به نورې سیمې هم له روسیي ځواکونو ازادې کړي.
د اوکراین د دفاع لپاره د تماس ډلې په غونډه کې د اوکرایني ځواکونو د روزنې ژمنې هم وشوې.
د امریکا د متحد ایالتونو دفاع وزیر لوید اسټن د غونډې برخه والو ته وویل چې واشنګتن به ابرامز تانکونه جرمني ته انتقال کړي چې په راتلونکو څو اوونیو کې اوکرایني ځواکونه وروزي.
د ابرامز ټانکونو د روزنې په پروګرام کې به شاوخوا دوه نیم سوه اوکرایني سرتيرې برخه واخلي.
ټاکل شوې ده چې د ابرامز ټانکونو د روزنې په پروګرام کې به شاوخوا دوه نیم سوه اوکرایني سرتيرې برخه واخلي.
د جرمني په پرونۍ غونډه کې د امریکا لوی درستیز مارکي میلي هم برخه اخیستې وه، هغه وویل چې دا ابرامز ټانکونه د روزنې لپاره دي، د جګړې لپاره نهدي.
له اوکراین سره واشنګټن د یو دېرش ابرامز ټانکونو د مرستې ژمنه کړې ده، مخکې داسې راپورونه خپاره شوي و چې دا ټانکونه به تر مني پورې ورکړي، خو د اوکراین د ملاتړیو په پرونۍ غونډه کې امریکایي چارواکو وویل چې دا ټانکونه به ژر اوکراین ته وسپارل شي.
جرمني تر دې مخکې لیوپارډ ټانکونه اوکراین ته ورکړي و او د جرمني دفاع وزیر بوریس پیستوریوس پرون وویل چې، کوم لیپوارډ ټانکونه چې د اوکراین په جګړه کې خراب شوې دي هغه به ډېر ژر په پولنډ کې ترمیم شي او اوکراین ته به انتقال شي.
