په داسې حال کې چې د پاکستان د ونډو او پیسو ارزښت مخ په ښکته کېدو دی، د دغه هېواد مرکزي بانک تمه کوي چې راتلونکې اوونۍ به له بهره پاکستان ته ډالر ورسیږي او نه یوازې د روپیو د ارزښت د کمېدو مخه به ونیول شي بلکې د وارداتو لپاره به د ډالرو د کموالي ستونزه حل شي.
د سهشنبې په ورځ د پاکستان د ونډو ارزښت ۱۳۸۸ پواینټه ولوېد او ورسره جوخت د نورو اسعارو په وړاندې د پاکستانۍ روپۍ ارزښت نور هم ټیټ شو.
شنونکي وايي، د زیاتو پورونو ترڅنګ سیاسي بېثباتۍ د پاکستان اقتصاد ته سخت ګوزار ورکړی دی.
ویل کېږي چې د پاکستان د بودجې ډېره برخه پر پوځي چارو لګول کېږي.
خبریال او شنونکی شمیم شاهد پر دې سربېره پوځ ته د ډېرې بودجې د اختصاص کېدو یادونه هم کوي.
ویل کېږي چې د پاکستان د بوديجې ډېره برخه پر پوځي چارو لګول کېږي.
د پنجاب ایالتي جرګه یا صوبايي اسمبلي منحل شوې او د خیبر پښتونخوا د ایالتي جرګې د ماتېدو غوښتنه شوې ده.
د پاکستان د ونډو ارزښت له دوو میاشتو راهیسې مخ په ځوړ دی.
دا په داسې حال کې ده چې د پیسو له نړیوال صندوق یا آیایمایف سره د پور په اړه د پاکستان د مالیې وزارت خبرې ځنډېدلي او ګومان نه کېږي چې په راتلونکې فبرورۍ کې هم وشي.
د پاکستان د مرکزي بانک د معلوماتو پر اساس، اوس د دغه هېواد اسعاري زېرمه څلور اعشاریه ۳ میلیارد ډالره ده چې دا په تېرو څو لسیزو کې تر ټولو کمه اندازه ده.
سره لهدې چې ډېری پاکستاني اقتصادپوهان اندېښنه ښېي چې هېواد یې د اقتصادي سقوط لور ته روان دی، د دغه هېواد د مالیې وزیر اسحاق ډار وايي چې پاکستان به دېوالیه نهشي.
د پاکستان د مرکزي بانک رئیس جمیل احمد د چهارشنبې په ورځ د خپل هېواد د سوداګرۍ خونو غړیو ته په وینا کې ومنله چې د هېواد اسعاري زېرمې یې خورا کمې شوي خو ځینې پلانونه لري چې دا ستونزه تر یوه حده کمه کړي.
ده وویل، د دې لپاره چې د پیسو نړیوال صندوق او دوستو هېوادونو ډالري مرستې ونه کړې، د پاکستان اسعاري زېرمه څه باندې ۴ میلیارد ډالرو ته راښکته شوه.
د ده په وینا دا له ۲۰۱۴ راوروسته د پاکستان تر ټولو کمه اسعاري زېرمه ده.
