د طالبانو مشر په یوه نوي فرمان کې امر کړی چې ټولې پرېکړې دې د اسلامي شریعت له مخې ترسره شي او د بشر له خوا جوړ شوي قوانین دې نه پلي کېږي.
هغه ادعا کړې، چې په تېرو شلو کلونو کې په جمهوري نظام کې د اسلامي نظام او شریعت پر ضد ډېر تبلیغات شوي دي.
خو د جمهوري نظام د اساسي قانون په درېیمه ماده کې چې د افغانستان د ټولو قوانینو اساس دی، راغلي چې په افغانستان کې هېڅ قانون به، د اسلام د سپېڅلي دین د ارشاداتو او احکامو خلاف نه وي.
د طالبانو مشر ملا هبت الله اخندزاده په قندهار کې له والیانو سره په کتنه کې په ټولنه کې د شرعی احکامو په تطبیق ټینګار وکړ.
په دې اړه په هغه اعلامیه کې چې د طالبانو ویاند ذبیح الله مجاهد په خپله ټوېټر پاڼه خپره کړې راغلي، د دوی مشر ټینګار کړی چې قوانین باید د اسلامي شریعت پر بنسټ پلي شي او د انسانانو په لاس جوړ شوي قوانین نهشي پلي کېدلی.
د دغې اعلامیې په یوه برخه کې راغلي دي: "په تېرو شلو کلونو کې د اسلامي نظام او شریعت پر ضد ډېر تبلیغات شوي او پر ځای یې جمهوریت ته تبلیغ شوی دی."
په اعلامیه کې راغلي، د اسلامي امارت په واکمنۍ کې د الله تعالی فرمانونه پلي کېږي، قوانین د خلکو په خوښه نه جوړیږي.
په اعلامیه کې دا هم ویل شوي، چې ټولې پرېکړې باید د اسلامي شریعت پر بنسټ وشي او هېڅ ډول اعتراض یې هم باید په وړاندې ترسره نهشي.
حقوق پوه وحید فرزه يي له ازادي راډیو سره په خبرو کې وویل، طالبان په دې باور دي چې بانکي قوانین، د ښځو پر وړاندې د تاوتریخوالي د منع قانون او د بشري حقونو کمېسیون له اسلامي شریعت سره په ټکر کې دي.
نوموړی وايي: "زما په نظر د طالبانو حکومت پر داسې قوانينو بحث کوي چې د دوی په باور د اسلامي شريعت خلاف دي، لکه د ښځو پر وړاندې د تاوتريخوالي د منع قانون، د بشري حقونو قانون، د بشري حقونو کمېسيون او داسې نور."
د افغانستان رسمي دین اسلام دی.
يو شمېر افغانان طالبان تورنوي، چې له اسلامي شریعت نه په اخیستنې سره په افغانستان کې د سختو قوانینو په عملي کولو بوخت دي.
د کابل او سېدونکې او د ښځو د حقونو فعاله قمر نیازۍ په دې اړه ازادي راډيو ته وويل: "الحمدالله مونږ مسلمانان وو او یو، له شرعي قوانینو انکار نه کوو او نه هم دا وایو، چې اسلامي قوانین نه منو، خو د ټولنې د پرمختګ، نړیوالو سره د سیالیو او د خلکو د اسانه ژوند لپاره باید په ټولنه کې فرهنګي او ټولنیز قوانین نافذ وي."
دغه راز د ننګرهار اوسېدونکی اجمل وايي: "خلکو سره جوړ راشئ څو په زړونو کې یې ځای پیدا کړئ، یوازنی مورد دی، چې مونږ له شریعت پرته ورته اړتیا لرو."
پر افغانستان د طالبانو په واکمنېدو سره د دوی له خوا د شرعیت پر بنسټ په بېلابېلو پرېکړو کې تر ټولو زیات افغان نجونې او ښځې اغیزمنې شوي.
په دغه هېواد کې له شپږم ټولګي پورته د نجونو زده کوونکو ښوونځي ظاهراً په دې نوم تړل شوي، چې د نجونو زده کوونکو لباس سم نه دی او د ټلوېزیونو په ښځینه کارکوونکو یې مخونه هم پټ کړي دي.
خو تازه، د طالبانو حکومت د بهرنیو چارو وزارت مرستیال شیرمحمد عباس ستانکزي پرون د کجکي بند د دوهم فاز په پرانیست غونډه کې وویل، چې د ټولو افغانانو پر مخ د زدهکړو دروازې پرانیستل یو جهاد دی، چې په خبره یې د دوی حکومت به ډېر ژر دا کار وکړي.
په افغانستان د طالبانو له واکمنېدو له یولسو میاشتو زیات وخت تېرېږي او په دې ټوله موده کې دوی ټینګار کړی، چې قوانین به د شریعت پر بنسټ پلی کوي، خو د افغانستان اوسېدونکي اندېښمن دي، چې د طالبانو اخیستنه له شریعت څخه ډېر ټولیز او په ورته وخت کې سخت دريځي پهکې ده، چې د دوی د سرپرست حکومت له خوا به د قوانینو وضع کول سختۍ لا زیاتې کړي، هغه موضوع چې طالبانو تل رد کړې ده.
