د لاسرسۍ وړ لېنکونه

تازه خبر
دوشنبه ۲۴ زمری ۱۴۰۱ کابل ۰۶:۰۹

د کانګریس طرحه؛ پنټاګون په افغانستان کې له هر ډول مرستې منع کېږي


د امریکا کانګریس

ټاکل شوې ده، چې د امریکا د کانګریس د استازو جرګه د دفاع وزارت یا پنټاګون د ۲۰۲۳ کال دفاعي بودیجه تصویب کړي او ورسره جوخت پنټاګون افغانستان ته د هر ډول مرستې له ورکولو منع کړي.

په پام کې ده، چې د امریکا د استازو جرګه د دغه هېواد د ۲۰۲۳ کال ۸۳۹ میلیارد ډالري بودیجه ژر تصویب کړي او ترڅنګ یې هغه طرحه تایید کړي چې پر اساس یې د امریکا دفاع وزارت افغانستان ته د هر ډول مرستې له ورکولو منع کېږي.

خو په کانګریس کې مسلمان استازی الهان عمر د دې طرحې په اړه اندېښنه لري.

ده پر خپله ټویټرپاڼه کښلي: "افغانستان د مځکې پر مخ له یوه تر ټولو وحشتناک بشري بحران سره مخامخ دی. موږ باید افغانانو ته د بشري مرستو د رسولو لپاره له خپل ټول توانه کار واخلو، نه دا چې د هغې مرستې لپاره چې کولی یې شو، بې ځایه محدودیتونه ولګوو."

د دې طرحې په باب، چې په کانګریس کې یې دواړه ګوندونه (جمهوریپال او دیموکرات) ملاتړ کوي، ویل شوي چې پنټاګون د طالبانو تر واک لاندې افغانستان ته له هر ډول خوراکي، طبي او نورو مرستو منع کوي.

په پکتیکا او خوست ولایتونو کې د تېر جون میاشتې له سختې زلزلې وروسته د امریکا د بهرنیو چارو وزارت افغانستان ته د ۵۵ میلیون ډالرو بشري مرسته اعلان کړه او ویې ویل چې دا مرسته به د امریکا د نړیوالې پراختیا ادارې له لوري زلزله ځپلیو ته ورسول شي.

په همدې منځ کې د کانګریس د استازو جرګې غړي الهان عمر هڅه وکړه، چې په وړاندې شوې طرحه کې بدلون راشي.

د امریکا ولسمشر جوبایډن
د امریکا ولسمشر جوبایډن

ده وړاندیز کړی و، چې د ولسمشر بایډن حکومت دې په هغه صورت کې افغانستان ته د نغدو پیسو پر انتقال بندیز نه لګوي چې په افغانستاان کې بشري مرستو ته فوري اړتیا وي خو د ده پر وړاندیز هېڅ غور ونه شو.

دا طرحه به د امریکا د راتلونکي مالي کال له بودیجې سره، چې ۸۳۹ میلیارد ډالره ده، یوځای د استازو جرګې له لوري تصویب شي.

وروسته به سنا جرګې ته وړاندې شي او د ولسمشر جو بایډن له لوري به توشیح شي.

ډېر کم داسې شوي چې ولسمشر یې ویټو یا رد کړي.

XS
SM
MD
LG