ټاکل شوې چې د ملګروملتونو سرمنشي د سه شنبې په ورځ مسکو ته ولاړ شي څو د روسیې له ولسمشر او د بهرنیو چارو له وزیر سره د اوکراین د جګړې په اړه خبرې وکړي.
د ملګروملتونو سرمنشي وايي، هیله لري چې مسکو ته د ده سفر او د روسیې له جګپوړو چارواکو سره لیده کاته به اوکراین ته سوله راولي.
ټاکل شوې چې انتونیوګوتېریش د سه شنبې په ورځ د اپریل په ۲۶مه مسکو ته د سفر پرمهال له ولسمشر ولادیمیرپوتین او د بهرنیوچارو وزیر سیرګي لاوروف سره وګوري.
د سرمنشي مرستیال ویاندې ایري کانیکو د ګوتېرېش د سفر د اجنډا جزییات پرون په نیویارک کې له خبریالانو سره شریک کړل.
کانیکو زیاته کړه: "څه چې تردې دمه په اجنډا کې دي، د روسیې د بهرنیو چارو له وزیر سره لیدنه او غرمنۍ ده. بیا به په همدې ورځ د ملګروملتونو سرمنشي له ولسمشر پوتین سره وګوري. څرنګه چې پوهېږئ ښاغلي ګوتېریش دواړو ولسمشرانو ته لیکلي دي چې دی تمه لري په اوکراین کې د سولې د سمدستي ټینګښت په اړه له دوی سره خبرې وکړي."
ښاغلي ګوتېریش په دې وروستیو کې په ملګروملتونو کې د روسیې او او کراین ماموریتونو ته لیکونه سپارلي وو.
د سرمنشي دفتر وايي، د اوکراین له حکومت سره هم خبرې روانې دي څو کییف ته د ګوتېریش د سفر نېټه وټاکل شي.
له سیاسي هڅو سره سره په اوکراین کې د جګړې ډګر په تېره د دې هېواد په جنوب کې لاهم تود دی.
د روسیې یوه جګپوړي چارواکي ویلي دي چې هېواد یې غواړي د اوکراین په جنوب کې پر دونباس او همداراز پر ځینو جنوبي سیمو بشپړه ولکه ټینګه کړي.
د روسیې د مرکزي سیمو د پوځي قرارګاه سرپرست قوماندان رستم مینیکایف پرون وویل، د اوکراین پر جنوبي سیمو ولکه به د مالدووا ترانسدینستر سیمې ته چې د روسیې پلوي ده د مسکو لاسرسی آسانه کړي.
د اوکراین دفاع وزارت په یوه ټویټ کې ویلي چې روسیه د دې هېواد پر جنوبي سیمو له ولکې وروسته غواړي مالدووا هم ونیسي.
مالدووا له اوکراین او رومانیا سره چې د ناټو غړی هېواد دی ګډه پوله لري.
سبا د اپرېل په ۲۴مه پر اوکراین د روسیې د یرغل دوه میاشتې پوره کېږي خو د اوربند او ډيپلوماسۍ لپاره هڅو تراوسه نتیجه نه ده ورکړې او برعکس په تېره یوه اونۍ کې د اوکراین په ختیځ او جنوب کې جګړو زور اخیستی.
