جمهور رئیس غني د سولې او جګړې په اړه خپل دریځ روښانه کړ.
ښاغلی غني وايي، ده خپل انتخاب کړی، او اوس وار د طالبانو دی چې باید له سولې او جګړې یو وټاکي.
ښاغلي غني نن دوشنبه «۱۴۰۰ کال د زمري ۱۱» د ملي شورا په فوقالعاده غونډه کې وویل، د هېڅ ويجاړوونکې ډلې پر وړاندې به تسلیم نهشي او که طالبان جګړه غوره کړي، د جګړې په ډګر کې به هم ماته ورکړي.
هغه وویل: "یا د سولې خبرو په واقعي مېز زنګون په زنګون کېنوو، یا یې د جګړې په میدان کې زنګنونه ماتوو. موږ خپله ټاکنه کړې، طالبان او ملاتړي دې خپل انتخاب وکړي."
جمهور رئیس غني افغانستان له یرغل سره مخ وباله او له ټولو یې وغوښتل چې د دې تجاوز پر ضد ودرېږي.
د افغانستان جمهور رئیس د طالبانو روانه جګړه فتنه وبلله او پر افغانانو يې د یووالي غږ وکړ. هغه د ملي شورا له غړو هم وغوښتل چې د روانې جګړې پر ضد خلک بسیج کړي.
جمهور رئیس غني طالبان تورن کړل چې سولې ته لېوال نهدي او د دې بهیر لپارهیې د افغان حکومت له ښه نیت ناوړه استفاده وکړه.
ښاغلی غني زياتوي: "موږ ډېره نرمي وښوده او داسې ګامونه مو واخیستل چې د نړۍ په هېڅ کونج کې یې حکومت د پورته کولو جرأت نهلري، خو زموږ دښمن نهیوازې د سولې خوا ته ګام وانهخیست، بلکې زموږ اخلاص او صداقتیې کمزوري وګڼله او تاسې شاهد یاست چې جنګیې پر موږ تحمیل کړ."
د افغانستان جمهور رئیس طالبان د تېر په پرتله خونړي یاد کړل او دا یې هم وویل چې له بهرنیو ترهګرو سرهیې د اړیکو د پرېکون پر ځای، دا اړیکې لا ټینګې کړې دي.
خو طالبان بیا د جمهور رئیس غني تور ردوي او ویاند یې ذبیحالله مجاهد وايي، نهیوازې دا چې بهرنیو ترهګرو سره اړیکې نهلري، بلکې سولې ته هم ژمن دي.
ښاغلي غني د افغانستان روان وضعیت ته هم اشاره وکړه او ویېویل، د بهرنیو عسکرو له وتو وروسته د مدیریتي ضعف له امله یوه تشه جوړه شوې چې اوس په ډکېدو ده.
هغه زیاته کړه، تر راتلونکو ۶ میاشتو به وضعیت بدلون وکړي او د دې بدلون لپارهیې هر اړخیز پلان جوړ کړی چې اوس د عملي کېدو په حال کې دی.
د ملي شورا په فوقالعاده غونډه کې د ولسي جرګې رئیس میر رحمان رحماني هم له افغان امنیتي او دفاعي ځواکونو د ملي شورا په ملاتړ ټینګار وکړ او ویېویل، د ولسي پاڅون کوونکو ملاتړ د دې ځواکونو روحیه لا پیاوړې کړې ده.
ښاغلي رحماني له طالبانو وغوښتل چې جګړه پرېږدي، ځکه په خبرهیې دا لاره ګټونکی نهلري.
ښاغلی رحماني زياتوي: "طالبان باید پوه شي جګړه او د تاوتریخوالي دوام یوه بایلونکې لوبه ده چې هېڅ ګټونکی نهلري او زیانمنونکي یې زموږ عادي خلک او بېوزلې ټولنه ده. ملي شورا به د دولت د یوه مهم رکن په توګه د هېواد د ملي ګټو پر بنسټ، له اجرائیه قوې سره ودرېږي."
د ملي شورا په فوقالعاده غونډه کې د دواړو جرګو لهخوا یوه اعلامیه هم خپره شوې چې پهکې له جمهوریت، امنیتي او دفاعي ځواکونو او په هېواد کې د تلپاتې او رښتينې سولې څخه غوڅ ملاتړ اعلان شوی دی.
جمهور رئیس غني داسې مهال د ملي شورا په فوقالعاده غونډه کې د سولې او جګړې په اړه وینا وکړه چې همدا اوس د افغانستان په ډېرو ولایتونو کې د افغان ځواکونو او طالبانو ترمنځ نښتې روانې دي او هره ورځ ترې د مرګژوبلې خبرونه خپرېږي.
