د لاسرسۍ وړ لېنکونه

تازه خبر
یکشنبه ۱۹ لیندۍ ۱۴۰۲ کابل ۰۹:۵۳

د نورستان والي: سیلابونو ۱۷۳ کورونه لاهو کړي او ۱۱۳ تنه یې وژلي


نورستان کې راوتلي سیلابونه، پېښو ته د رسېدو په چارو کې د دولت وزارت وايي، د سرې میاشتې په ګډون د مرستو رسولو ۵ ټیمونه سیمې ته رسېدلي دي.
نورستان کې راوتلي سیلابونه، پېښو ته د رسېدو په چارو کې د دولت وزارت وايي، د سرې میاشتې په ګډون د مرستو رسولو ۵ ټیمونه سیمې ته رسېدلي دي.

د افغانستان په ختیځ کې د غرني نورستان کامدېش ولسوالۍ کې سېلابونو نه یوازې دا چې لسګونه کورونه په اوبو لاهو کړي، بلکې ځاني زیان یې هم لوړ دی.

د نورستان والي حافظ عبدالقیوم وايي، سېلابونو د کامدېش ولسوالۍ په مېردېش کلي کې لږ تر لږه۱۷۳ کورونه په اوبو لاهو کړي چې له امله یې ۱۱۳ تنه مړه شوي دي.

د ښاغلي عبدالقیوم په خبره، د ځاني زیان ترڅنګ، سېلابونو پراخ مالي زیان هم اړولی دی.

نورستان کې سیلابونو لږ تر لږه۱۷۳ کورونه نړولي دي.
نورستان کې سیلابونو لږ تر لږه۱۷۳ کورونه نړولي دي.

د نورستان والي زیاته کړه: ​"۱۲ کیلومټره سړک په بشپړ ډول اوبو لاندې کړی، ۱۱سوه جریبه ځمکه یې تخریب کړې، د اوبو لس ژرندې یې ویجاړې کړي دي یو جامع جومات او لس دوکانونه یې هم ویجاړ کړي، همداراز د مېردېش د ۶ فرعي پلونو ترڅنګ ۱۰ نور پلونه یې ویجاړ کړي دي."

ښاغلي عبدالقیوم د پېښې له کبله د تلفاتو د زیاتېدو خبره کوي، خو د سېلابونو له امله اوس‌ مهال د ورک شوېو او لا درکه کسانو د شمېر په اړه کره معلومات نه وړاندې کوي.

د نورستان والي وايي، سیمې ته دوی مرستندویه ډلې لېږلي، خو دا چې سېلابونو نږدې ۱۲ کیلومټره سړک هم ویجاړ کړی، له همدې امله د بېړنیو مرستو د رسېدو بهیر ټکنی دی.

ازادي راډیو هڅه وکړه چې په سیمه کې له سېلاب ځپلو سره خبرې وکړي او دوی ته د مرستو او اوسني وضعیت احوال یې واخلي، ټیلیفوني اړیکې یې ورسره روغې نه شوې.

د نورستان والي حافظ عبدالقیوم د سیلابونو له امله د لادرکه شویو په اړه معلومات وړاندې نه کړل.
د نورستان والي حافظ عبدالقیوم د سیلابونو له امله د لادرکه شویو په اړه معلومات وړاندې نه کړل.

په ورته وخت کې پېښو ته د رسېدنې په چارو کې د دولت وزارت وايي، د سرې میاشتې ۵ ټیمونه سیمې ته رسېدلي، څو خلکو ته د لومړینو مرستو د رسولو سربېره، د وضعیت په اړه بشپړ معلومات راټول کړي.

د دې وزارت ویاند تمیم عظیمي ازادي راډیو ته وویل: "متاسفانه سیمه د حکومت د مخالفانو تر کنټرول لاندې ده، زموږ همکاران نه دي بریالي شوي چې هلته ولاړ شي.مخالفانو د توکو د لېږد اجازه نه ده ورکړې، موږ د بشري مرستو رسوونکو همکارانو څخه د مرستې غوښتنه کړې."

ښاغلي عظیمي ډاډ ورکوي چې حکومت به سېلاب ځپلو ته هر ډول مرستې ورسوي او تر خوا یې له مرستندویه او بشري مرسته رسوونکو ادارو غواړي چې د دې پېښې له امله د زیان شویو لاسنیوی وکړي.

نورستان کې راوتلي سیلابونه
نورستان کې راوتلي سیلابونه

که څه هم پېښو ته د رسېدو په چارو کې د دولت وزارت وايي، د حکومت مخالفان یې سیمې ته د ورتګ مانع شوي دي، خو طالب ویاند ذبیح‌الله مجاهد پرون جمعه(د زمري ۸مه) ازادي راډیو ته وویل، ټولو مرستندویانو او د دولت بې‌ وسلې مامورینو ته د مرستو رسولو اجازه ورکوي.

د افغانستان د هوا پېژندنې ملي ادارې وړاندوینه کړې چې د نورستان په ګډون په کونړ، ننګرهار، لغمان، پکتیا، خوست، پکتیکا او لوګر ولایتونو کې د سختو ورښتو او د سېلابونو د راوتلو اټکل شته.

خو پېښو ته د رسېدو په چارو کې د دولت وزارت بیا وايي، له نورستان پرته په بل کوم ولایت کې د ډېر ورښت او د سېلابونو د راوتلو راپور نه دی ورکړل شوی.

XS
SM
MD
LG