د افغانستان دفاع وزارت نن سهار وختي نږدې دوه بجې د کابل په حامد کرزي هوايي ډګر کې د هوايي مدافعې نوی لګول شوی سیستم فعال کړ.
دا د راکټونو او توغندیو د شنډولو لپاره ثابت شوی ګټور سیسټم دی او ځکه فعالېږي چې پر جګړهییزو احضاراتو مثبت اغېز ولري.
د امنیتي او دفاعي سکټور ویاند جنرال اجمل عمر شینواری د یکشنبې په ورځ «۱۴۰۰ کال د چنګاښ ۲۰» له ازادي راډیو سره په خبرو کې دا سیستم یو پرمختللی او مهمه وسله بولي او وايي، دا سیستم د بهرنیو همکارانو لهخوا افغان حکومت ته ورکړل شوی، د راکټونو او توغندیو د شنډولو لپاره ثابت شوی ګټور سیستم دی او ځکه فعالېږي چې پر جګړهییزو احضاراتو مثبت اغېز ولري.
ښاغلی شینواری زیاتوي: "دا سیستم موږ ته د بهرنیو همکارانو لهخوا راکړل شوی دی. دا یو لوی ویاړ او د امنیتي او دفاعي سکټور لپاره ډېر مهم تجهیزات دي. اوسمهال مو هم بهرني همکاران له موږ سره په دې برخه کې همکاري کوي، څو موږ د دې وسلې څخه د ګټې اخیستو وړتیا ترلاسه کړو."
ښاغلي شینواري په دې اړه نور ډېر جزئیات د نظامي اسرارو په توګه یاد کړل.
تېره شپه د ملي دفاع وزارت په یوه خپره کړې خبرپاڼه کې د دې وسلې په اړه ولیکل چې دا د توغندیو او میزائیلو د دفعې لپاره په نړۍ کې د تجربې پر بنسټ، خورا ګټور ثابت شوی سیستم دی.
په خبرپاڼه کې زیاته شوې، امنیتي او دفاعي ځواکونه د خپلو خلکو او خاورې د دفاع لپاره چمتو دي او دا سیستم د همدې موخې لپاره دی چې پر جګړهییزو احضاراتو به مثبت اغېز ولري.
د کابل د حامد کرزي هوايي ډګر کې د هوايي مدافعې دا سیستم داسې مهال فعالېږي چې ترکیې هم اعلان کړی چې د دې هوايي ډګر د امنیت ساتنې مسؤلیت پر غاړه اخلي.
ترکي رسنیو د دې هېواد د جمهور رئیس رجب طیب اردوغان له قوله لیکلي، له ناټو او امریکا سره خبرو کې دې پایلې ته رسېدلي چې دوی به د کابل د حامد کرزي نړیوال هوايي ډګر د امنیت مسؤلیت اخلي او په ښه ډول به دا چارې مخ ته وړي.
راپورونه دا هم وايي چې ترکیه به د دې مسؤلیت د مخ وړلو لپاره افغانستان ته ډرون الوتکې، دفاعي تجهیزات او نور سرتېري هم استوي، خو ترکیې وړاندې ویلي و چې د نورو سرتېرو د استولو اړتیا نهلیدل کېږي.
ترکیې د دې هوايي ډګر د امنیتي مسؤلیت د منلو چاره مشروطه کړې او له ناټو او امریکا یې په لوجیستیکي او مالي برخه کې د مرستو غوښتنه کړې ده.
خو ښکاري چې ناټو او امریکا دواړو سره په دې برخه کې هوکړه شوې ده.
له دې وړاندې د ترکیې جمهور رئیس په دې برخه کې له پاکستان سره هم د همکارۍ خبره کړې وه، خو په افغانستان کې یې دې غوښتنې تند غبرګونونه راپورته کړي و.
افغان حکومت د ترکیې لهخوا د کابل حامد کرزي د هوايي ډګر د امنیت ساتلو هرکلی کړی، خو دا یې هم ویلي چې افغان ځواکونه چمتو دي چې د خپلو خلکو او خاورې ساتنه وکړي.
خو طالبانو بیا لا له وړاندې له دې کار سره مخالفت ښودلی دی.
طالبانو ویلي، د دوحې د هوکړې پر بنسټ، هېڅ یو بهرنی عسکر باید افغانستان کې پاتې نهشي او که چېرې پاتې شي د بدو پایلو مسؤلیت بهیې په خپله غاړه وي.
دا په داسې حال کې ده چې په دې وروستيو کې په افغانستان کې جګړو زور اخیستی او نږدې هره ورځ څو ولسوالۍ د افغان حکومت او طالبانو ترمنځ لاس په لاس کېږي.
دغه تاوتریخوالی او جګړې د مې له لومړۍ نېټې له افغانستانه د بهرنیو ځواکونو په وتلو سره زیات شوی دی.
ټاکل شوې چې له دغه هېواده د بهرنیو عکسرو د وتلو پیل شوی بهیر د سپټمبر میاشتې تر ۱۱مې نېټې بشپړ شي.
