افغان چارواکي وايي يو مشترک پلاوی له دفاع وزارت څخه د افغانستان د زندانونو د چارو د تنظيم ادارې ته د بګرام زندان د سپارلو مسئله ارزوي او دغه اداره بهیې مسؤلیت په خپله غاړه واخلي.
د افغانستان د زندانونو د چارو د تنظيم ادارې ته د بګرام زندان د سپارلو مسئله وروسته له هغې راپورته کېږي چې بګرام نظامي اډه دا مهال په بشپړه توګه د افغان ملي اردو په کنټرول کې ده او ټول بهرني سرتېري ترې وتلي دي.
د بګرام په پوځي اډه کې د دې زندان مسؤلیت لا په ۲۰۱۳ م کال کې په بشپړه توګه د افغانستان دفاع وزارت ته سپارل شوی و.
بګرام زندان کې له زندانیانو سره په ځینو مواردو کې د ناسم چلند ادعاوې هم پر دې زندان هم د امریکا د پوځ او هم د افغان ملي اردو د کنټرول پر مهال راپورته شوې دي.
د افغانستان د زندانونو د چارو د تنظيم ادارې وياند صفيالله جلالزي ازادي راډیو ته وویل: "په همدې خاطر د افغانستان د زندانونو د چارو د تنظيم ادارې يو هيئت د دفاع وزارت هيئت سره يوځای د زندانيانو د اړتياوو د معلومولو لپاره او د زندانيانو د وضعيت د کتلو لپاره بګرام ته تللی څو ستونزې او ننګونې وپېژني او د رفع کولو لپارهيې مسؤلينو ته لازمې مشورې ورکړي."
د بګرام پوځي اډه چې د کابل شمال ته په ۲۵ کیلومترۍ کې پرته ده، په ۱۹۵۰ م لسیزه کې د پخواني شوروي په مرسته جوړه شوه. پر افغانستان د شوروي د یرغل پر مهال د شوروي ځواکونو د مهمو پوځي اډو څخه وه.
په ۲۰۰۱ م کال کې چې کله امریکايي ځواکونو د طالبان رژیم ړنګ کړ او د یو نړیوال ائتلاف په مشرۍ یې سرتېري افغانستان ته ورغلل، بګرام د امریکايي ځواکونو پر لوی مرکز بدل شو. امریکايي پوځیانو دغلته یو زندان هم جوړ کړ چې په جګړه کې نیول شوي وسلهوال طالبان، د بهرنیو شبکو لکه القاعده او داعش غړي یې به ساتل.
د افغانستان د زندانونو د چارو د تنظیم د ادارې ویاند وايي، دا مهال په بګرام زندان کې ۴،۵۵۱ تنه بندیان ساتل کېږي.
اوس چې امریکايي ځواکونه په بشپړه توګه له بګرام وتلي، په بګرام کې د زندانیانو د ساتلو په اړه هم اندېښنې زیاتې شوې دي.
طالبانو په یو بیان کې په بګرام کې د زندانیانو د وضعیت په اړه اندېښنه ښودلې ده او وايي دغلته بندیان په وروستیو کې له برېښنا او اوبو هم بېبرخي دي، هغه څه چې افغان چارواکو رد کړي دي.
