د لاسرسۍ وړ لېنکونه

تازه خبر
جمعه ۳ غویی ۱۴۰۰ کابل ۰۹:۱۲

یو شمېر امریکايي سناتوران: بایډن دې ایران سره اټمي موافقې ته نه ورستنیږي


د ایران یوه اټمي بټۍ

یو شمېر امریکايي سناتورانو پرون جمعه (د وري ۶مه) د امریکا ولسمشر ته په یوه لیک کې له هغه غوښتي چې له ایران سره د ۲۰۱۵ میلادي کال اټمي موافقې ته بېرته ور ونه ګرځي.

دوی ولسمشر بایډن ته ویلي چې د دې پر ځای له ایران سره د یوې نوې موافقې هڅه وکړي چې نور موضوعات هم په کې راونغښتل شي.

دا لیک چې ۴۳ سناتورانو لاسلیک کړی، د دواړو ګوندونو؛ دیموکرات او جمهوریپال غړي په کې شامل دي.

دوی لیکلي، پر نورو مسئلو تکتیکي اختلافاتو ته له پامه پرته په دې د نظر یووالی لري چې ایران باید پرې نه ښودل شي چې اټمي وسله ترلاسه کړي.

دغو سناتورانو دا هم لیکلي، د ایران له لوري د هغو تروریستي ډلو ملاتړ چې د امریکا دښمنې دي، بالسټیک توغندي او د سیاسي بندیانو مسئله هم باید له ایران سره په خبرو کې مطرح شي.

یو شمېر امریکايي سناتوران وايي، ایران باید پرې نه ښودل شي چې اټمي وسله ترلاسه کړي
یو شمېر امریکايي سناتوران وايي، ایران باید پرې نه ښودل شي چې اټمي وسله ترلاسه کړي

د رویټرز خبري اژانس د راپور له مخې، د دوی اشاره هغو دوه تابعیت لرونکو ایراني – امریکايي بندیانو ته ده چې په ایران کې بندیان دي.

دا لیک اصلاً دیموکرات سناتور رابرټ منندیز او جمهوریپال سناتور لینډزي ګراهام وړاندیز کړی او د ۴۱ نورو سناتورانو ملاتړ یې هم خپل کړی دی.

د لیک اکثره لاسلیک کوونکي هغه سناتوران دي چې په ۲۰۱۵ میلادي کال یې هم له ایران سره د نړۍ د سترو قدرتونو له اټمي تړون سره مخالفت کړی وو.

تردې وړاندې په یوه لیک کې چې یوازې ۱۰ سناتورانو لاسلیک کړی وو، د امریکا له ولسمشر جوبایډن څخه غوښتل شوي وو چې له ایران سره د سترو قدرتونو د ۲۰۱۵ میلادي کال موافقې ته بېرته ور وګرځي.

د امریکا د ولسمشرۍ د انتخاباتو دوو پخوانیو کاندیدانو سناتورې الزابت وارن او برني سندرز په خپل لیک کې چې تېره میاشت یې ولسمشر بایډن ته لېږلی و، لیکلي چې د ډونالډ ټرمپ په حکومت کې د حداعظم فشار د پالیسۍ په چوکاټ کې د ایران پرضد لګول شویو بندیزونو امریکا او ایران د جګړې حالت ته نژدې کړي، سیمه یې بې ثباته کړې او د ایران عام ولس یې ځورولی دی.

اټمي موافقې ته د امریکا د بېرته ستنېدو په ګټه یا مخالفت کې لیکونه په داسې حال کې زیات شوي چې د جو بایډن حکومت په وروستیو ورځو کې په کلکه وویل چې ایران باید د اټمي موافقې د احیا کېدو لپاره لومړني ګامونه پورته کړي.

د امریکا د بهرنیو چارو وزیر انتوني بلېنکن تېره اوونۍ په بروکسل کې د ناټو د غړیو هېوادونو د بهرنیو چارو وزیرانو په غونډه کې وویل چې د ایران پر وړاندې د خبرو او دیپلوماسۍ لاره پرانېستې ده او سپینه ماڼۍ تیاره ده چې د اټمي موافقې له نورو غړیو او ایران سره خبرې وکړي.

ښاغلي بلېنکن په عین حال کې وویل چې د جوبایډن حکومت له ایران سره د لا پیاوړې او اوږدې موافقې په لټه کې دی چې د ایران په اړه نورې مسئلې چې امریکا یې په اړه اندېښنه لري، په کې راونغښتل شي.

XS
SM
MD
LG