د لاسرسۍ وړ لېنکونه

تازه خبر
شنبه ۹ کب ۱۳۹۹ کابل ۰۷:۲۲

د کرونا ضد واکسین تطبیق کې مخکښ هېواد؛ اسرائیل کې فایزر-بایو اېن تیک مؤثریت لرلی


د اسرائیل صدراعظم بنیامین نتانیاهو د فایزر-بایو اېن تیک کرونا ویروس ضد واکسین د بستې د ترلاسه کولو پر مهال

په اسرائیلو کې د فایزر-بایو اېن تیک واکسین د 'کووېډ-۱۹' څخه د شدیدې ناروغۍ او مړینو په مخنیوي کې ۹۹ فیصده مؤثر وو.

دا خبره د دې هېواد د روغتیا وزیر د هغو کسانو چې دا واکسین ورته شوي د معلوماتو پر بنسټ کړې ده. اسرائیل غواړي د مارچ تر پای د دې هیواد ټول لویان واکسین کړي.

دغه هېواد هغه سیالۍ کې چې هېوادونه غواړي خپل وګړي د کرونا په وړاندې واکسین کړي، د نړۍ مخکښ دی. د ۹ ملیونه وګړو لرونکي دې هېواد کې نږدې نیمايي کسانو ته د فایزر-بایو اېن تیک واکسین یو دوز ورکړل شوی دی. نږدې درې ملیونه اسرائیلیانو ته بیا دوه دوزه چې د کرونا ویروس په وړاندې د واکسین پشپړ رژیم بلل کېږي، عملي شوي دي.

د دې هېواد د روغتیا وزارت وايي، معلومات‌یې ښيي چې واکسین له کرونا څخه د مړینو په مخنیوي کې ۹۸،۹ مؤثر دي. همدارنګه په هغو کسانو کې چې دوه دوزه واکسین ورته شوي، د 'کووېډ-۱۹' څخه د شدید ناروغه کېدو په مخینوي کې ۹۹،۲ فیصده مؤثر دی.

د اسرائیلو د روغتیا وزارت راټول کړي معلومات ښيي، هغو کسانو کې چې دوه اوونۍ مخکې یې د فایزر-بایو اېن تیک واکسین دوهم دوز اخیستی، د هغو کسانو په مقایسه چې واکسین ورته نه‌دي شوي، په کرونا د اخته کېدو چانس په سلو کې ۹۵،۸ راکم شوی دی.

د کرونا ویروس ضد فایزر بایو اېن تیک واکسین
د کرونا ویروس ضد فایزر بایو اېن تیک واکسین

اسرائیل غواړي د مارچ تر پای پورې خپل ټول هغه وګړي چې عمرونه‌یې له ۱۶ کلنۍ پورته دي د کرونا ویروس په وړاندې واکسین کړي. دا به په نړۍ کې د کرونا د مخنیوي لپاره د واکسین په عملي کېدو کې د یو هېواد له خوا مهم پرمختګ وي.

پر دې سربېره هم د اسرائیلو په هغو وګړو کې چې لا د 'کووېډ-۱۹' په وړاندې واکسین شوي نه‌دي، دا ناروغي په خپرېدو ده، خو دا چې په دې هېواد کې د واکسین عملي کېدل په پراخېدو دي، چارواکي یې ورو ورو د کرونا په خاطر لګولي بندیزونه کموي.

سر له نن ورځې (فبروۍ ۲۱) څخه په اسرائیلو کې لوی پلورنځایونه، مغازې، جېمونه، یو شمېر متوسط ښوونځي او ځیني نور عامه خدمات د محدودو کسانو لپاره پرانیستل کېږي.

د اسرائیلو صدراعظم بنیامین نتانیاهو د جمعې په ورځ د بندیزونو د کمولو ځیني هغه پلانونه په ډاګه کړل. دا پلانونه هغو کسانو ته چې د کرونا ویروس په وړاندې واکسین شوي اجازه ورکوي چې په کلتوري مجلسونو کې برخه واخلي، له هېواد بهر سفر وکړي او جېمونو او رسټورانټونو ته ولاړ شي.

د اسرائیل صدراعظم بنیامین نتانیاهو د فایزر-بایو اېن تیک کرونا ویروس ضد واکسین د بستې د ترلاسه کولو پر مهال
د اسرائیل صدراعظم بنیامین نتانیاهو د فایزر-بایو اېن تیک کرونا ویروس ضد واکسین د بستې د ترلاسه کولو پر مهال

بل ځای، بریتانیا چې د 'کووېډ-۱۹' څخه‌یې تر اوسه ۱۲۰ زره مړینې ثبت کړي، په چټکۍ په خپلو وګړو کې د واکسین پروسه پر مخ وړي.

د دې هېواد صدراعظم بورېس جانسون د جمعې په ورځ ژمنه وکړه چې ټولو لویانو ته به د جولای میاشتې تر پای پورې د کرونا ضد واکسین وشي.

تر ۱۷ ملیونه زیاتو بریتانویانو ته تر اوسه د کرونا ضد واکسین لومړی دوز ورکړل شوی چې د دې هېواد نږدې هر درېیم لوی (بالغ) کس په‌کې راځي.

تمه کېږي چې د دوشنبې په ورځ به د بریتانیا صدراعظم په دې هېواد کې د کرونا له کبله د بندیزونو د تدریجي کمېدو یو پلان هم اعلان کړي.

د بریتانیا صدراعظم بورېس جانسون
د بریتانیا صدراعظم بورېس جانسون

د بالکان په هېوادونو کې مونته‌نګرو د ګاونډي صربیا په مرسته د 'کووېډ-۱۹' پر ضد د روسیې د (Sputnik-V) سپوتنیک-وي واکسین عملي کول پیل کړي دي. چارواکي یې وايي چې پلان لري د واکسین نورې بڼې هم ترلاسه کړي.

استرالیا هم نن د 'کووېډ-۱۹' په ضد د واکسین عملي کول پیل کړل او په دې هېواد کې د لومړي کس په توګه صدراعظم سکاټ مورېسن ته واکسین وشو.

دا هېواد په رسمي توګه نورو وګړو ته د دوشنبې له ورځې د فایزر-بایو اېن تیک واکسین پیلوي.

XS
SM
MD
LG