افغان چارواکو د امریکا نوي ولسمشر جوبایډن ته د مبارکۍ پیغامونو کې څه ویلي؟
جوبایډن تر لوړې وروسته خبرو کې که څه هم د افغانستان په اړه څه ونه ویل، خو د ولسمشر په ګډون بېلابېلو افغان چارواکو هغه ته د دندې د پيل مبارکي ورکړې ده.
ولسمشر محمد اشرف غني پر خپله ټویټرپاڼه لیکلي، دې سختو شېبو کې افغانستان له خپل اصلي شریک- متحدو ایالتونو سره چې د سولې لپاره یې د ملګرتیا د بیا جوړولو هڅې او د ترهګرۍ له څو اړخیزو ستونزو سره نوې مبارزه پيل کړې، څنګ په څنګ دریږي.
ښاغلي غني پرون مازدیګر په ارګ کې د امریکا له شارژدافیر راس وېلسن او د ناټو له قوماندان سکاټ مېلر سره هم لیده کاته کړي دي.
د ارګ په خبرپاڼه کې راغلي چې دې خبرو کې د افغانستان او د امریکا د نوې ادارې پر اړیکو مفصل بحثونه شوي دي.
د بایډن د کار له پيله یوه ورځ مخکې د بهرنیو چارو وزارت لپاره د هغه نوماند وزیر انتوني بلېنکن ویلي، د امریکا او طالبانو د دوحې هوکړه به له سره ارزوي.
بلېنکن د امریکا د سنا جرګې غړو ته ویلي، غواړي پوه شي چې دې تړون کې د څه په اړه خبرې شوي دي؟
دی زیاتوي، که د دې هوکړې له لارې تېرې لاسته راوړنې خوندي نهشي، هېڅ پایله به ونهلري.
په همدې حال کې د افغانستان د ملي مصالحې عالي شورا مشر عبدالله عبدالله هم ښاغلي بایډن او د هغې لومړۍ مرستیالې کمالا هارېس ته مبارکي ورکړې.
ښاغلي عبدالله پر خپله ټویټرپاڼه لیکلي، هیله مند دی چې له خپلو امریکایي ملګرو سره به پر سولې، ثبات، بشري حقونو او د ټولو لپاره په سوکالۍ کار وکړي.
د طالبانو د قطر دفتر ویاند محمد نعیم که څه هم د بایډن د لوړې په تړاو تر بېګا ناوخته څه نه و ویلي، خو په دې اړه یې د ازادي راډیو د یوې پوښتنې په ځواب کې لیکلي: "بایډن ویلي چې د افغانستان جګړه به ختموي او خپل عسکر به باسي."
بایډن داسې مهال سپینې ماڼۍ ته راغلی چې افغانستان کې یې د ځواکونو حضور نژدې شل کلن شو.
په دې وروستیو کې د امریکا د دفاع وزارت اعلان وکړ چې افغانستان کې یې د خپلو ځواکونو شمېر تر ټولو ټیټې کچې ۲۵۰۰ ته رسولی دی.
لا هم معلومه نه ده چې امریکا به له طالبانو سره د ټرمپ د ادارې د هوکړې له مخې له افغانستانه روان کال خپل ټول سرتیري وباسي او که نه؟ خو جوبایډن د خپلو ټاکنیزو منډو ترړو پر مهال ویلي و، که بریالی شي، افغانستان او عراق کې یو شمېر سرتیري پریږدي.
جوبایډن د امریکا د متحدو ایالاتو د شپږڅلوېښتم ولسمشر په توګه لوړه وکړه.
بایډن د پنځوس کلونو سیاسي هلوځلو او ګڼو زیارونو څخه وروسته بالاخره وکولی شول چې د خپل هېواد د واک تر ټولو لوړې څوکۍ ته ځان ورسوي.
د دې لپاره چې بایډن نور هم وپېژنئ، دا ویډیويي راپور وګورئ:
جوبایډن د لوړې له مراسمو وروسته: ډیموکراسي غالبه شوه
جوبایډن ته د امریکا د سترې محکمې قاضي القضات جان رابرټ د انجیل پر هغې نسخې لوړه یا قسم ورکړ چې له ۱۹مې پیړۍ را په دې خوا د ده له کورنۍ سره دی.
د بایډن تر لوړې مخکې د هغې لومړۍ مرستیالې کمالا هاریس لوړه وکړه او نوموړې لومړنۍ مېرمن او بیا لومړنۍ تور پوستې ده چې د لومړۍ مرستیالۍ څوکۍ ته رسیږي.
د لوړې دا مراسم د کرونا وبا تر سیوري او تر کلکو امنیتي تدابیرو لاندې ترسره شول.
بایډن له لوړې وروسته ولس ته په وینا کې وویل: "یووالي د مخته تګ یوازنۍ لاره ده" او زیاته یې کړه چې "ډیموکراسي غالبه شوه."
بایډن وویل، دا د امریکا، ډیموکراسۍ، تاریخ، هیلو، نوي والي او حل لارو ورځ ده.
بایډن د امریکا له پولو بهر خلکو ته هم پيغام درلود او ويې ویل، له نورو ملتونو سره یووالی به بېرته ورغوي.
ده وویل: "موږ به بېرته یووالی ورغوو، له نړۍ سره به یو ځل بیا یوځای شو، نه یوازې د پرونیو ستونزو د حل په خاطر، بلکې د نن او سبا د ننګونو لپاره."
د لوړې په دغو مراسمو کې ډونالډ ټرمپ ګډون نه و کړی. دا په تېرو ۱۵۲ کلونو کې لومړی ځل دی چې د امریکا یو ولسمشر د خپل ځای ناستي د لوړې مراسمو کې برخه نه اخلي.
دغو مراسمو کې د امریکا درېیو پخوانیو ولسمشرانو جورج ډبلیو بوش، بېل کلېنټن او بارک اوباما ګډون کړی وو.
د امریکا بل پخوانی ولسمشر جیمي کارتر چې ۹۶ کاله عمر لري، نه دی توانیدلی چې دغو مراسمو کې ګډون وکړي.
د ټرمپ لومړي مرستیال مایک پنس او یو شمېر نورو جمهوري پال قانون جوړونکي بیا د لوړې مراسمو کې حاضر وو.
ټرمپ پرون د امریکا په وخت سهار ۸ او ۱۵ دقیقې له سپینې ماڼۍ ووت او په یوې هليکوپټره کې هغو مراسمو ته ولاړ چې د ده د خدای پاماني په هدف جوړ شوي وو.
ټرمپ که څه هم خپلو خبرو کې د جوبایډن نوم یاد نه کړ، خو نوې ادارې ته یې د ښو چارو هیله وښوده.
ده ویلي:" د پام وړ کارونو بنسټ یې تر شا پریښی دی."
د خدای پامانۍ له مراسمو وروسته ټرمپ، مېرمن او د کورنۍ نورغړي یې د هوایي ځواک په الوتکه کې فلورېډا ته ولېږدول شول چې هلته بېرته د امریکا د یوه ځانګړي اوسېدونکي په توګه خپل ژوند پيل کړي.
بایډن ته قاضي القضات جان رابرت په کانګرس کې قسم ورکړ
عکسونه؛ ولسمشر جو بایډن لوړه وکړه
جو بایډن د امریکا د ۴۶م ولسمشر په توګه لوړه وکړه او له دې سره د ډونالډ ټرمپ د واک څلور کلنه دوره پای ته ورسېده.
۷۸کلن بایډن ته د امریکا د سترې محکمې قاضي القضات جان رابرت د کانګرس په انګړ کې قسم ورکړ.
بایډن د انجیل پر هغې نسخې قسم یاد کړ چې له ۱۸۹۳ کال راهیسې د ده له کورنۍ سره دی.
نوموړي په ۲۰۰۸ او ۲۰۱۳ کال کې هم د انجیل پر همدې نسخې هغه مهال قسم خوړولی و چې د امریکا د ولسمشر د مرستیال په توګه یې دنده پيلوله.