د جو بایډن د لوړې مراسم او د امریکا له نوي حکومته د افغانانو هیلې!
په داسې حال کې چې ټاکل شوې څو ساعته وروسته د امریکا نوی منتخب ولسمشر جو بایډن د لوړې مراسم پر ځای کړي، یو شمېر افغانان د افغانستان په اړه د امریکا د نوي حکومت پرېکړو ته انتظار باسي.
ښاغلی بایډن به نن چهارشنبه د جنورۍ په ۲۰مه د امریکا د نوي ولسمشر په توګه لوړه وکړي.
په افغانستان کې یو شمېر سیاسي او مدني فعالان وايي، هیله لري چې ښاغلی بایډن به د افغانستان د جګړې د پای ته رسېدو او د تېرو دوو لسیزو لاسته راوړنو ساتلو ته پاملرنه وکړي.
د غزني دوه اوسېدونکي سیفالله او روهینا وايي: "زما په نظر د امریکا د حکومت سیاست د افغانستان پر وضعیت اغېز لري، زه د امریکا له نوي حکومته غواړم چې افغانستان کې د نظام د پیاوړتیا او د بشر حقونو په برخه کې ګټور ګامونه واخلي."
"زه له جو بایډنه هیله لرم چې افغانستان کې د بشري حقونو، د جګړې پای ته رسېدو او د افغانستان اقتصادي پیاوړتیا ته پاملرنه وکړي."
په ورته وخت کې د سیاسي چارو یو شمېر شنونکي هیله لري چې د جو بایډن حکومت به په مسؤلانه ډول له افغانستانه بهرني سرتېري وباسي او د سولې له پروسې به ملاتړ وکړي.
د قومونو په چارو کې د پخواني ولسمشر حامد کرزي سلاکار شهزاده مسعود وايي: "زما په نظر جو بایډن چې تازه د امریکا ولسمشر کېږي اول باید خپل پوځي قوتونه له افغانستانه په مسؤلانه ډول وباسي او نور باید د افغانستان پر سوله تمرکز وکړي ځکه سوله د ټولو افغانانو غوښتنه او هیله ده."
له دې وړاندې افغان ولسمشر محمد اشرف غني ویلي و چې که د امریکا راتلونکی ولسمشر غواړي دې هېواد کې د امریکايي پوځیانو شمېر کم کړي باید دا پروسه د دواړو لورو په همغږۍ ترسره شي.
ښاغلي غني له 'سي.اېن.اېن' ټلوېزیون سره په مرکه کې ویلي و چې له افغانستانه د امریکايي پوځیانو د وتلو طرحه باید د دواړو هېوادونو د ګټو پر اساس جوړه شي.
دغه شان د ښځو د حقونو یو شمېر فعالان افغانستان کې د ښځو د تېرو دوو لسیزو د لاسته راوړنو په ساتلو ټینګار کوي.
د افغان ښځو د ټولنې رئیسه فتانه ګیلاني وايي: "ښاغلی بایډن یو په کار پسې انسان دی، له بله خوا يې مرستیاله یوه مېرمن ده، باید د افغانستان مسئلې ته جدي پام وکړي او دې هېواد کې جګړه پای ته ورسوي، باید د ښځو لاسته راوړنې هېرې نهشي، دغهشان چې افغانستان کې هم نوی حکومت راځي، باید د ښځو حقونو ته لومړیتوب ورکړل شي."
دا غوښتنې داسې مهال مطرح کېږي چې افغانستان کې جګړه روانه ده او ورځ تر بلې تاوتریخوالی زیاتېږي.
که څه هم قطر کې د افغانستان او طالبانو استازي د سولې په خبرو بوخت دي، خو تر دې دمه په دې خبرو کې د پام وړ پرمختګونه نهدي ترسره شوي.
نږدې ۱۰ میاشتې وړاندې د امریکا او طالبانو ترمنځ د سولې هوکړه لاسلیک شوه، خو د افغانستان په جګړه کې سوړوالی رانهغی.
افغان حکومت د امریکا له نوي حکومته خپله غوښتنه مطرح کړه
د افغانستان حکومت د امریکا له نوي حکومته د کابل او واشنګټن ترمنځ د شویو تړونونو د درناوي غوښتنه وکړه.
د امریکا متحده ایالاتو نوی ولسمشر جو بایډن نن چهارشنبه په داسې حال کې د ۴۶م ولسمشر په توګه لوړه کوي چې په افغانستان کې د امریکايي پوځیانو شمېر په تېرو دوو لسیزو کې تر ټولو ټیټې سطحې یعنې ۲،۵۰۰ ته رسول شوی دی.
د افغانستان د ولسمشر لومړی مرستیال امرالله صالح وايي کابل د امریکايي ځواکونو د شمېر کمېدلو ته اندېښنه نهلري.
ښاغلي صالح د بي بي سي له نړیوال سرویس سره په خپله تازه مرکه کې ویلي، کابل او واشنګټن په خپلو کې د بېلابېلو همکاریو تړونونه لري: "موږ به له هغوی غوښتنه وکړو هغو موافقو ته درناوی وکړي چې له موږ سرهیې لاسلیک کړي دي. دوی له موږ سره د ستراتېژیک شراکت تړون او دوه اړخیزه موافقه لاسلیک کړې ده. د هغو پر اساس دې دوی افغان حکومت ته اطلاع ورکړي او د ځواکونو د مناسب او منظم اخراج په باب دې له افغان حکومت سره کار وکړي."
تر دې مخکې ولسمشر محمد اشرف غني هم د امریکايي ځواکونو د شمېر کمېدو په برخه کې د کابل او واشنګټن ترمنځ پر همغږۍ ټینګار کړی و.
خو وسلهوال طالبان بیا د امریکا له ټاکلي ولسمشر جو بایډن څخه غواړي هغې موافقې ته ژمن پاتې شي چې دې ډلې له امریکا سره د فبرورۍ پر ۲۹مه په قطر کې لاسلیک کړې ده.
ذبیحالله مجاهد چې ځان د وسلهوالو طالبانو ویاند معرفي کوي، پرون سې شنبه له ازادي راډیو سره په خبرو کې د جو بایډن له ادارې وغوښتل: "د جو بایډن حکومت هم باید دې ټکي ته جدي متوجې وي چې د دوحې تړون عملي کړای شي چې ورسره د امریکا دا اوږده جګړه پای ته ورسېږي او ورسره د افغانستان خلک هم له دغو بدمرغیو او جګړې راووځي."
جو بایډن د خپلو ټاکنیزو کمپاینونو پر مهال په افغانستان کې د امریکا د پوځي مأموریت او د دغه مأموریت د راتلونکي په اړه زیاتې څرګندونې نهدي کړي.
خو په واشنګټن ډي. سي کې د نړیوالو چارو د انستیتوت مشر هاشم وحدتیار فکر کوي چې د جو بایډن د ادارې او کابل ترمنځ به سیاسي شراکت بهتره شي.
ښاغلی وحدتیار زیاتوي: "سیاسي مشارکت به د جو بایډن په اداره کې بهتره شي، خو دا به یو څه شرایط ولري. لومړی دا چې د جو بایډن د ادارې لپاره په امریکا کې دننه ډېر لومړیتوبونه شته چې له چین، روسیې او نورو سره مسایل دي چې دا به وخت ونیسي. دوهمه خبره دا ده چې اوس هم د واشنګټن او کابل ترمنځ اړیکې ډېرې ښې نهدي. په ځانګړي ډول د قطر پروسې د کابل یو څه شکونه ولاړ کړي دي. کابل باید اوس په واشنګټن کې یوه ډېره قوي ډیپلوماتیکه دستګاه فعاله کړي."
د افغانستان حکومت د جو بایډن له ادارې د کابل او واشنګټن ترمنځ شویو موافقو ته تعهد غواړي طالبان بیا په قطر کې له امریکا سره لاسلیک شوې موافقې ته د ژمن پاتې کېدو غوښتنه لري.
د امریکا ټاکلی ولسمشر جو بایډن ښايي په راروانو ورځو کې د افغانستان په باب د خپلې ادارې د پالېسۍ جزئیات په ډاګه کړي.
د ډونالد ټرمپ د خدای پامانۍ وینا: پر خپلو کارونو ویاړم
د امریکا تلونکي ولسمشر ډونالد ټرمپ د خدای پامانۍ وینا وکړه.
ټرمپ وویل پر خپلو کارونو او هغه څه ویاړي چې د ده په دوره کې ترلاسه شوي.
هغه دا خبره د امریکا د ۴۵م ولسمشر په توګه د خپل کار د پای ته رسولو په مناسبت په خپله وینا کې وکړه.
ډونالد ټرمپ زیاته کړه: "دا چې زه د متحده ایالاتو د ۴۵م ولسمشر په توګه خپله دنده پای ته رسوم، ستاسو په وړاندې ولاړ او په هغه څه واقعاً ویاړم چې موږ او تاسو په ګډه لاسته راوړل. موږ هغه څه وکړل چې په خاطر یې دلته راغلي او نور ډېر څه."
{External Media}
Youtube
۷۴ کلن ټرمپ جمهوريپال دی او یوازې یوه دوره ولسمشر پاتې شو.
هغه په خپله وروستۍ وینا کې نوې ادارې ته پرته له دې چې د خپل ځای ناستي منتخب ولسمشر جو بایډن نوم واخلي د بریا هیله وکړه: "موږ به د نوې ادارې پرانیسته ولرو، زه د امریکا د امنیت او هوساینې ساتلو کې ورته د بریا لپاره دعا کوم. موږ ډېرې ښې هیلې ورته لرو. هیلهمن یو چې یو ښه قسمت ولري هغه کلمه چې دېره مهمه ده."
د امریکا تلونکي ولسمشر ډونالد ټرمپ په ولسمشرۍ ټاکنو کې چې تېر نومبر وشوې د ډیموکراټ جو بایډن په وړاندې ماته وخوړه.
د امریکايي الکتروانو ۳۰۶ رایې جو بایډن وګټلې او ۲۳۲ هم ټرمپ.
ټرمپ ټاکنې له درغلیو ډکې وبللې او تر ډېرهیې هڅه وکړه چې د ټاکنو پایلې لغوه کړي هغه څه چې نتیجهیې ورنهکړه.
د تلونکي ولسمشر ډونالد ټرمپ ګڼو پلویانو هم د ټاکنو د پایلو په وړاندې ډېر وخت په امریکا کې مظاهرې وکړې.
یوه مظاهره هم د جنورۍ په شپږمه په تاوتریخوالي او بلوا واوښته.
ښاغلي ټرمپ وویل: "ټولو امریکایانو په کنګرې باندې له یرغله وحشت وکړ. سیاسي تاوتریخوالی په هغو ټولو شیانو باندې برید دی چې موږ ته د امریکایانو په توګه د درناوي وړ دي. هېڅکله به ونهزغمل شي."
د امریکا ولسمشر د همدې وروستۍ پېښې په تړاو د کانګرس استازو جرګې لهخوا د دوهم وار لپاره استیضاح شو. تمه ده سنا جرګه هم په راتلونکو ورځو کې د ډونالد ټرمپ محاکمې او استیضاح ته رسیدهګي وکړي.
د جو بایډن دوه سپيان له څلورو کلونو وروسته بېرته سپينې ماڼې ته ستنېږي
د امریکا متحده ایالاتو منتخب ولسمشر جو بایډن دوه سپيان مېجر او چمپ به له څلورو کلونو وروسته بېرته سپينې ماڼې ته ستانه شي.
مېجر او چمپ کله چې جو بایډن د پخواني ولسمشر بارک اوباما مرستیال و کلونه په سپینه ماڼۍ کې تېر کړي وو.
مېجر او چمپ دواړه د جرمن شپهرد له نسله دي. دا ډول سپیان غښتلي او اکثر ژغورندویه دي چې له پولیسو سره هم وي.
د امریکا اکثرو ولسمشرانو په سپينه ماڼۍ کې کورني حیوانات اهلي سپيان او واړه پاپیان یا پېشوګانې ساتلې دي.
ډونالد ټرمپ ښايي په څه باندې یوه نیمه پېړۍ کې واحد ولسمشر و چې سپينه ماڼۍ کې یې سپی یا پېشو نهساتله.