د لاسرسۍ وړ لېنکونه

تازه خبر
پنجشنبه ۶ لیندۍ ۱۳۹۹ کابل ۱۱:۲۶

سیګار: افغانستان سره د امریکا له ۶۳ میلیارده ډالرو مرستې ۱۹ میلیارده حیف‌ومیل شوي


ارشیف، افغانستان کې د یوه سړک د رغونې چارې

په داسې حال کې چې نړیواله ټولنه له افغانستان سره د مرستو دوام له فساد سره مبارزې او شفافیت پورې تړلې بولي، خو د افغانستان د بیارغونې لپاره د امریکا ځانګړي سرپلټونکي یا سیګار په تازه راپور کې له افغانستان سره د امریکا د میلیاردونو ډالرو مرستو کې له فساد پرده پورته کړه.

سیګار له ۲۰۰۲ تر ۲۰۱۹ کاله د ډسمبر میاشت پورې له افغانستان سره د امریکا ۱۳۴ میلیارده ډالرو مرستو له جملې د امریکا د کانګرس په غوښتنه د ۶۳ میلیارده ډالرو مرستو څرنګوالی څېړلی.

سیګار د ۶۳ میلیارده ډالرو په څېړنه کې موندلې چې ۱۹ میلیارده ډالره ضایع، حیف‌ومیل او یا هم ناوړه استفاده ورنه شوې ده.

د سیګار په راپور کې ویل شوي چې دغه څېړنه د ۲۰۱۸ کال له جنوري پيل او د ۲۰۱۹ کال د ډسمبر میاشتې پورې ترسره شوې ده.

سید اکرام افضلي
سید اکرام افضلي

د افغانستان د شفافیت څار بنسټ رئیس سید اکرام افضلي هم له افغانستان سره په نړیوالو مرستو کې د فساد په اړه د سیګار دغه راپور تأییدوي.

ښاغلی افضلي زیاتوي: "دا راپور ښکاره کوي چې افغانستان او نړیواله ټولنه هغه ښه فرصت چې کولای شوی د افغانستان زېربنا په اساسي بڼه ورغوي او د اقتصاد په جوړولو د دولت ثبات ښه کړي، داسې ونه‌شول. له بده مرغه نن د بهرنیانو د غلط تصمیمونو تأثیرات او د افغانستان له لوري د فرصت ضایع کېدل وینو چې اقتصادي کمزورتیا، د جګړې پراختیا او د خلکو په بې‌وزلۍ کې له ورایه ښکاري."

د سیګار په راپور کې خبرداری ورکړل شوی چې په افغانستان کې اصلي فساد، د ناامنیو پراختیا، د نړیوالې ټولنې په مرستو کې د حساب نه‌ورکړه، په افغانستان کې د پانګې اچونې دوام ضایع او ناوړه استفاده ورنه کېږي.

په راپور کې راغلي، په دغو مرستو کې فساد د سولې بهیر او د افغانستان د حکومت مشروعیت او مؤثریت ګواښي.

د افغانستان جمهوري ریاست د دغه راپور په غبرګون کې د مرستو د حساب ورکړې په وړاندې نړیوالو ته ځان مسؤل بولي.

دوا خان مینه‌پال
دوا خان مینه‌پال

د افغان ولسمشر مرستیال ویاند دوا خان مینه‌پال وايي: "همدا مرستې وې چې افغانستان‌یې تر دې ځایه راورساوه، هرې برخې پراختیا وکړه، افغان حکومت په دې باندې ځان مکلف ګني چې د ټولو مرستو اغېزمنتوب ته زیاته پاملرنه وکړي، موږ نړیوال مرسته کوونکو ته روڼ حساب ورکړو، افغانستان په دې باور دی چې خپلو سرچینو ته پام وکړي او ځان د نړیوالو له احتیاجه خلاص کړي."

د افغانستان د بیارغونې لپاره د امریکا ځانګړي سرپلټونکي د راپور له مخې امریکا او نړیوال مرسته کوونکي د افغانستان په سلو کې ۷۵ عامه لګښتونه تأمینوي.

سیګار لیکي، د نړیوال بانک د وړاندوینې پر بنسټ که سوله هم تأمین شي، افغانستان په کلني ډول لږ تر لږه تر ۲۰۲۴ میلادي کال پورې له ۴،۶ تر ۸،۲ میلیارده ډالرو ته اړتیا لري.

XS
SM
MD
LG