د روسیې حکومت نن د جون ۲۴مه، په دوهمه نړیواله جګړه کې د بري ورځ لمانځي.
دوهمه نړیواله جګړه په ۱۹۴۵میلادي کال کې د نازي جرمني ځواکونو له ماتې سره پاي ته ورسېده.
په دوهمه نړیواله جګړه کې پر نازي جرمني د بري د لمانځلو لپاره پوځي پرېډ او نور ځانګړي مراسم په دودیز ډول د مې میاشتې په ۹مه ترسره کېدل.
خو سږکال د کرونا ویروس د خپرېدو له کبله، د روسیې ولسمشر ولادیمیر پوتین زړه نا زړه پرېکړه وکړه چې دا مراسم د جون ۲۴مې ته وځنډول شي.
هغه مهال، په دې ورځ په جګړه کې د پخواني شوروي ځواکونو د بري پوځي پرېډ کړی و.
خو دا مراسم د روسیې د ولسمشر ولادیمیر پوتین لپاره له یوه بله اړخه هم ډېر اهمیت لري ځکه ټاکل شوې چې د جولای په لومړۍ نېټه په روسیه کې د اساسي قانون پر تعدیل چې ډېر بحثونه یې پارولي دي، د خلکو رایې واخیستل شي.
که چیرې د روسیې په اساسي قانون کې د تعدیل پلان تائید شي، ولادیمیر پوتین ته به تر ۲۰۳۶میلادي کاله په قدرت کې د پاتې کېدو لپاره قانوني لاره پیدا کړي.
دا رایګیري هم باید د اپرېل په ۲۲مه شوې وای خو د کرونا ویروس د خپرېدو له کبله د جولای لومړۍ نېټې ته وځنډول شوه.
ولادیمیر پوتین په وروستیو دوو لسیزو کې په روسیه کې د جمهور رئیس یا صدراعظم پر چوکۍ کار کوي.
په دې موده کې، هغه هڅه کړې چې د پخواني شوروي او د پخوانۍ روسیې سمبولونه را ژوندي کړي او د روسیې په خلکوکې نشنلیزم یا د ملت پالنې احساس پیاوړی کړي.
د مسکو پر سره میدان به د یارلس هېوادونو ۱۳ زره عسکر، ۷۵ الوتکې او ۲۰۰ پوځي زغره وال موټر په پوځي پرېډ کې برخه لري.
خو دا مراسم د کرونا ویروس د وبا تر سیوري لاندې دي.
د روسیې حکومت د کرونا ویروس د لا خپرېدو د مخنیوي لپاره د لګولو بندیزونو په نرمولو پیل کړی او هره ورځ په اوسط ډول ۷۰۰۰ نوې پېښې ثبتوي.
په روسیه کې د پوځي پرېد لپاره ټول ترتیبات د کرونا ویروس د وبا ګواښ ته له پام سره نیول شوي دي.
د مسکو پر سره میدان به د مراسمو پر مهال محدود کسان پوتین ته دور نږدې کېدو اجازه لري.
پوتین په وروستیو څو اونیو کې له مسکوه د باندې، له خپله استوګن ځایه کار کوي.
هغه عسکر چې په پوځي پرېډ کې برخه لري د تمرین په موده کې قرنطین شوي وو.
هر هغه وګړی به چې په پوځي پرېډ کې برخه لري، د کرونا ویروس معاینه ورکوي.
د مسکو ښاروال له خلکو غوښتنه کړې چې دا مراسم له خپلو کورونو او پر ټلوېزیون وګوري.
د روسیې په ډېرو ښارونو کې چې پخوا به یې د دې ورځې په مناسبت واړه مراسم جوړول له دې کاره ډډه شوې ده.
د نړۍ دزیاتو هېوادونو لکه فرانسې، چګ جمهوریت، چین او کرویشیا ولسمشرانو مخکې ویلي و چې ګډون کوي خو وروسته یې دخپل ګډون پلان لغو کړ خو د تاجکستان، سربیا، ازبکستان ، ملدوا ، قزاقستان او قرغزستان ولسمشرانو ویلي چې برخه اخلي.
په روسیه کې د کرونا ویروس ۶۰۰ زره مثبتې پېښې ثبت شوې چې په نړۍ کې دریم لوی شمېر دی.
سره له دې چې روسي چارواکي د کرونا وبا له کبله د ۸۰۰۰ کسانو د مړینې خبر ورکوي، یو شمېر څارونکي باور څرګندوي چې ريښتنی شمېر ښایي تر دې زیات وي.
د جون په ۱۴مه نېټه هم د روسیې وسله والو ځواکونو له مسکوه د باندې د دوهمې نړیوالې جګړې د پاي ته رسېدو د ۷۵ مې کلیزې په مناسبت مراسم د (لویه وطني جګړه) تر نوم لاندې جوړ کړی وو.
په دې جګړه کې تر شل ملیونه زیات روسي عسکر په کې وژل شوي وو.