په امریکا کې د هغه تور پوستي د جنازې مراسم ترسره شول چې د پولیسو په توقیف کې یې مړینه د امریکا په عدلي سیستم کې د بدلونونو لپاره د غږ پورته کولو سبب شوه.
دغه مراسم د تکزاس ایالت په هیوسټن ښار کې په داسې حال کې جوړ شوي وو چې د دې وژنې له کبله په نړۍ کې د نژادي تبعیض ضد اعتراضونه روان دي.
خاورو ته د جورج فلوید د سپارلو مراسمو ته پخواني مرستیال ولسمشر جوبایډن په یوه ثبتي وېډيويي پیغام کې وویل، د فلوید مړینه به په ټوله نړۍ کې نژادي برابرۍ ته زمینه برابره کړي.
بایډن د ډونالد ټرمپ په وړاندې د ولسمشرۍ په راروانو انتخاباتو کې د ډیموکرات ګوند احتمالي کاندید ګڼل کېږي.
جورج فلوید د مې میاشتې پر ۲۵مه، د میناسوتا ایالت په مینیاپولیس ښار کې په داسې حال کې چې یوه سپین پوستي پولیسیې پر غاړه زنګون ایښی و، ساه ورکړه.
له هغې راهیسې پر لارو او سړکونو مظاهرو، د پولیسو او د جنايي عدالت په سیستمونو کې د اصلاحاتو راوستلو غوښتنه تقویه کړه.
دې موضوع د امریکا په متحده ایالاتو او نورو هېوادونو کې ګڼ کسان اړ کړل چې پر نژادي بېعدالتیو اعتراض څرګند کړي.
د نړۍ په بېلابېلو برخو کې په لسګونو زره کسان په مظاهرو کې له برخې اخیستو سره، د پولیسو په چلند کې د اصلاحاتو راوستلو له غوښتنې سره خپل غږ ملګری کړ.
په پاریس کې پرون په زرګونه کسانو دا لیکلي شعارونه له ځانونو سره لېږدول "د پولیسو زورزیاتی بند کړئ، د نژادي تبعیض مخه ونیسئ."
دوی د پاریس په پلاس دولا رپبلیک میدان کې په سمبولیک ډول د اتو دقیقو او ۴۶ ثانیو لپاره چوپتیا غوره کړه، دا دقیقاً هغه موده ده چې سپین پوستي پولیس دیریک چاوین د فلوید پر غاړه خپل زنګون ایښی و.
که څه هم فلوید د پولیسو افسر ته همدا خبره کوله چې ساه نهشي اخیستی، خو پولیس خپل زنګون لیرې نهکړ. د دې صحنې وېډیويي تصاویرو په انټرنټ کې هم غوغا جوړه کړه.
په خپله پر چاوین د قتل تور دی او هغه درې نور افسران چې په دې قضیه کې دخیل وو، په قتل کې په همکارۍ تورن شوي دي.
په واشنګټن کې د کانګرس غړو تېره دوشنبه د پولیسو د نظارت او اجرااتو په کړنلارو کې داسې پراخ اصلاحات پېشنهاد کړل چې په تېرو څو لسیزو کې بېساري ګڼل کېږي.
