جمهوري رياست وايي د بين الافغاني خبرو د پيل لپاره د طالب بنديانو د بښنې او خوشې کېدو فرمان د ولسمشر محمد اشرف غني له خوا لاسليک شوى دى.
د جمهوري رياست وياند صديق صديقي تېره شپه په ټويټر کې ليکلي، د کب یا د حوت مياشتې له ٢٤ مې به د پروان له زندان او توقيف ځايونو د ١٥٠٠ بنديانو د خوشې کېدو پروسه پيلېږي.
د ښاغلي صديقي په خبره د ورځې به ١٠٠ تنه بنديان د هغوى عمر، روغتیايي وضعيت او د بند مودې ته په پام سره خوشې کېږي.
دا فرمان چې تېره شپه ناوخته لاسلیک شوی څلور مادې لري.
ولسمشر غني د دوشنبې په ورځ د لوړې په مراسمو کې ويلي وو، چې د طالب بنديانو د خوشې کېدو په اړه به د سې شنبې په ورځ فرمان صادر کړي.
دا فرمان چې تېره شپه ناوخته لاسلیک شوی څلور مادې لري.
په لومړۍ ماده کې لیکل شوي، د دې فرمان تر مخه چې کوم طالب بندیان له بنده خوشې کېږي، لیکلې ژمنه به کوي چې بېرته به د جګړې ډګر ته نه ستنېږي.
د فرمان تر مخه، د بایومټریکي معلوماتو له ثبت وروسته به د طالب بندیانو د خوشې کولو لړۍ پیلېږي.
په دویمه ماده کې لیکل شوي، چې په لومړي ګام کې به د پروان له زندانه، ۱۵۰۰ تنه طالب بندیان خوشې شي، چې لړۍ یې د کب په ۲۴مه یعنې راتلونکې شنبه پیلېږي او هره ورځ به ۱۰۰ تنه بندیان، د عمر، روغتیایي وضعیت او د بند پاتې مودې ته په پام خوشې کيږي.
په درېیمه ماده کې لیکل شوي، نور ۳۵۰۰ تنه طالب بندیان به د افغانستان اسلامي جمهوریت او طالبانو ترمنځ د مذاکراتو له پیلېدو وروسته او د مذاکراتو په ترڅ کې خوشې کېږي.
په هرو دوو اوونیو کې به ۵۰۰ تنه طالب بندیان خوشې شي او په دې شرط چې تاوتریخوالی پام وړ کم شي.
د فرمان په څلورمه ماده کې لیکل شوي، چې د ملي امنیت شورا د دې فرمان عملي کولو مسوولیت لري او نورې اړوند ادارې به همکاري کوي.
طالبانو د بين الافغاني مذاکرو تر پيل مخکې د خپلو ٥٠٠٠ بنديانو د خوشې کېدو غوښتنه کړې ده.
بل پلو د افغانستان د سولې لپاره د امریکا ځانګړي استازي ډاکتر زلمي خلیلزاد په خپل ټویټر ویلي: "د پرمختګ د دغو نښو سربيره، د طالبانو لخوا د تاوتریخوالي کچه لوړه پاتې شوې ده، موږ له طالبانو تمه لرو چې خپلو ژمنو ته ټینګ پاتې شي چې تاوتریخوالی لږ شي تر څو د بندیانو خلاصون په سمه پلی شي او د سولې بهیر بریالی شي."
طالبانو ويلي چې دوى به هم هغه ١٠٠٠ بنديان چې افغان پوځيان او ملکي مامورين په کې شامل دي خوشې کوي.