د افغانستان د ټاکنیزو د شکایتونو کمېسیون خپل فعالیتونه، د استېناف غوښتنې د پنځو مواردو پر ارزونې متمرکز کړي چې ۳۰۰ زره جنجالي رايې په کې شاملې دي.
د افغانستان د ټاکنیزو د شکایتونو کمېسیون د سې شنبې له ورځې راهیسې د ولسمشریزو ټاکنو د جنجالي رایو په اړه بحثونه کوي.
په دې کې له ټاکلي وخت نه بهر ۱۰۲ زره راېې، ۱۰۷زره مشکوکې، ۲۴۲۳ محلونه، له یوې نه تر پنځو پورې د بایو میټریک د پاڼو په پایلو کې تفاوت، او له ۶ رایو پورته له اطلاعاتو سره د بایومیټریک په رایو کې تفاوت شامل دي.
د دغه کمېسیون غړی قاسم الیاسي وايي، د دغو پنځو مواردو په اړه د تصمیم نیونې نظریات سره نږدې شوي، او په اړه به یې تر راتلونکو دوو ورځو پورې تصمیم وروستی شي.
هغه زیاته کړه: "ذهنیتونه نږدې شوي، انشاءالله ډیر ژر به د پرېکړو شاهدان اوسو، که پر دغو مواردو پریکړه وشي، ۹۵ فیصده کارونه به مو پای ته ورسېږي، موږ د افغانستان له خلکو سره چې ډیر انتظار یې وایست ژمنه کوو چې له قانوني ڼیتې نه به يې مخکې په اړه پرېکړه وشي."
خو د دغه کمېسیون ځینې سرچینې وايي، پر دغو پنځو مواردو پرېکړه وروستۍ شوې او لاسلیک ته تیار دي.
په ورته وخت کې د دې کمېسیون د ویاند مرستیال محمد رضاء فیاض وایي، د استېناف غوښتنې د دوسیو ډلبندۍ په ۲۱ ولایتونو کې پاې ته رسیدلې او په نورو ولایتونو کې به په نږدې راتلونکې کې پای ته ورسېږي.
هغه زیاتوي: "د وروستیو راپورونو له مخې، ډلبنډي په ۲۱ ولایتونو کې پای ته رسېدلې او په محدودو ولایتونو کې پاتې چې کار پرې نن او سبا دوام لري."
د ټاکنیزو د شکایتونو کمېسیون د میزان یا تلې د ۶ د ولسمشریزو ټاکنو اړوند په ۲۹ ولایتونو کې څه باندې ۶۲۰۰ استېنافي شکایتونو ترلاسه کړي او د ډلبنډۍ بیهر یې تیره اوونۍ پیل شوی دی.
دا په داسې حال کې ده چې، په کابل کې د امریکا د سفارت شارژ دافیر راس ویلسن، د پنجشنبې په ورځ پرخپلې ټویټ پاڼه له ټاکنیزو کمېسیونونو غوښتي چې په همغږۍ او روڼوالي سره کار وکړي چې رایه ورکوونکي د ټاکنو پر پایلو باوري شي.
د افغانستان ولسمشریزې ټاکنې د میزان په شپږمه ترسره شوې.
د دغو ټاکنو لومړنۍ پایلې د درې میاشتي ځنډ وروسته د جدي په لومړۍ نېټه اعلان شوې.
تمه ده وروستۍ پایلې د ټاکنیزو شکایتونو د کمېسیون له پرېکړې وروسته اعلان شي.
