د افغانستان د ټاکنو خپلواک کمېسیون وايي، ښايي د میزان ۶مې د ولسمشریزو ټاکنو ابتدايي پایلې پر خپل وخت اعلان نهشي.
په پام کې وه چې کمېسیون د راروانې شنبې په ورځ (میزان ۲۷مه) ابتدايي پایلې اعلان کړي.
د افغانستان د ټاکنو کمېسیون یوه ویاند عبدالعزیز ابراهیمي ازادي راډیو ته وویل: "امکان شته چې د ابتدايي پایلو اعلان وځنډېږي. موږ هڅه کوو چې تورې او سپینې رأیې، بایومټریک شوې، قرنطین شوې او غیر بایومټریک رأيې سره جلا کړو."
ښاغلي ابراهیمي وویل چې د بایومټریک معلوماتو د ثبت له دستګاوو څخه سرور یا د معلوماتو د ثبت مرکزي سیستم ته د معلوماتو د انتقال پروسه بشپړه شوه، خو د انټرنټ د کمزورتیا له امله دا پروسه هم په ځنډ بشپړه شوې ده.
ابراهیمي وویل چې اوسمهال سرور ته د قرنطین شویو بایومټریک معلوماتو پر انتقال کار روان دی.
هغه زیاته کړه: "د انتخاباتو د ۲۲۵۸۸ محلونو د بایومټریک معلوماتو پر اساس، موږ تر اوسه یو میلیون او ۷۳۷۸۷ رأیې ګڼلې دي، خو د ۳۹۰۰ محلونو رأیې پاتې دي چې باید تصفیه شي او بیا به د رأیې ورکوونکو دقیق شمېر اعلان شي."
- د ټاکنیزو شکایتونو کمېسیون د ځینو وزیرانو په ګډون سلګونه کسان څارنوالۍ ته ورپېژندلي
- د ټاکنو کمېسیون مرکزي سرور ته د بایومټریک معلوماتو انتقال لاهم نهدی بشپړ شوی
د ابراهیمي په وینا، د بایومټریک معلوماتو پر اساس ثبت شوې رأیې هم تصفیې ته اړتیا لري چې دا هم ښايي د ابتدايي پایلو په اعلان کې ځنډ پېښ کړي.
د ټاکنو پر پایلو په کورنیو او بهرنیو سیاسي کړیو کې تاوده بحثونه روان دي.
د افغانستان لپاره د اروپايي اتحادیې خاص استازي رولاند کوبیا پرون په ارګ کې له ولسمشر محمد اشرف غني سره پر ټاکنو غږېدلی دی.
د ارګ د خبرپاڼې په حواله، د اروپايي اتحادیې استازي ویلي چې د افغانستان ټاکنیزو کمېسیونونو دا وار زیاته هڅه کړې چې ښه انتخابات وشي.
- نبیل: د ټاکنو کمېسیون سیستم ته د یو میلیون تقلبي رأیو د داخلېدو مخه ونیول شوه
- یوناما: افغانستان کې د ولسمشریزو ټاکنو په بهیر کې ۸۵ تنه ملکیان وژل شوي
په کابل کې د ملګرو ملتونو د عمومي منشي ځانګړي استازي، تدامیچی یاماموتو هم پرون د جمهوري ریاست لپاره له کاندیدانو سره په کتنه کې، د افغانستان د ټاکنیزو کمېسیونونو د بېپرې او شفاف کار پر اهمیت ټینګار کړی.
