په افغانستان کې د ملګرو ملتونو مرستندویه اداره (یوناما) وايي، د میزان ۶مې ولسمشریزو انتخاباتو په ورځ د طالبانو په حملو کې ۲۸ ملکیان وژل شوي دي.
د یوناما د راپور موندنې ښيي چې د تېرو ولسمشریزو ټاکنو په بهیر کې بیا د طالبانو په حملو کې ۸۵ ملکیان وژل شوي چې له درېیو یوه برخه یې ماشومان دي. په راپور کې راغلي چې په همدې ورځ ۳۷۳ تنه ټپیان شوي دي.
- کورنیو چارو وزارت: طالبانو غوښتل چې انتخابات ۶۸ ځایه ګډ وډ کړي
- یوناما او په کابل کې د امریکا سفارت د افغانانو زړورتیا وستایله
وړاندې په اعلامیه کې د افغانستان لپاره د ملګرو ملتونو د سرمنشي ځانګړي استازی تدامیچي یاماموتو له قوله ویل شوي، طالبانو غوښتل چې انتخابات وننګوي او افغانان د رایې له حق څخه محروم کړي.
د ښاغلي یاماموتو په وینا پر ملکي وګړو پراخ یا سیستماتیک بریدونه ممکن د بشریت په وړاندې جنایت وبلل شي او له شک پرته ملګري ملتونه دا غندي.
خو د کورنیو چارو سرپرست مسعود اندرابي په همدې ورځ په کابل کې یوې خبري ناستې ته وویل، د انتخاباتو په ورځ او له هغه وړاندې دوی پر طالبانو فشارونه زیات کړي و.
"امنیتي او دفاعي بنسټونه ډاډه و چې دوی به ملکي برخو باندې فشار راوړي او په دغه ورځ دوی هیڅ کار ونشو کړای."
د نوموړي په وینا طالبانو غوښتل چې د جمهوري ریاست انتخابات ګډوډ کړي، خو دولتي ځواکونو یې امنیت ټینګ کړ او هغوی بریالي نه شول.
د جمهوري ریاست د انتخاباتو د امنیت د تېنګښت لپاره د دولتي ځواکونو چمتووالی په ملي او نړیواله کچه وستایل شو.
په پام کې ده د تېر ولسمشریزو ټاکنو لومړنۍ پایلې د راتلونکې اونۍ د شنبې په ورځ اعلان شي.
