په افغانستان کې ځیني فعاله سیاسي ګوندونه وايي، تر کومه چې د دوی ټولې غوښتنې په تېره هم په انتخاباتو کې د بایو مټریک سیستم نه استفاده ونهمنل شي، حکومت به د دوی قناعت تر لاسه نهکړي.
وروسته له هغې چې د انتخاباتو خپلواک کمېسیون اعلان وکړ چې سیاسي ګوندونه کولای شي د انتخاباتو له بهیره څار وکړي، دا ګوندونه ټینګار کوي چې په انتخاباتو کې د شفافیت په خاطر يې باید ټولې غوښتنې ومنل شي.
د ګلبدین حکمتیار په مشرۍ د حزب اسلامي ویاند حشمتالله ارشد د سیاسي ګوندونو په استازیتوب وايي، که د بایو مټریک سیستم نه استفاده ونهشي انتخابات په شفاف ډول نهشي ترسره کېدای.
ښاغلي ارشد د پنجشنبې په ورځ «۱۳۹۷ کال د وږې ۰۸» ازادي راډيو ته وویل، د ګوندونو غوښتنو ته د نهپاملرنې په صورت کې به د دوی اعتراضونه لا پراخ شي.
نوموړي زیاته کړه:
"یوازې بایو مټریک سیستم کولای شي له پراخو او سازمندهي شویو درغلیو مخه ونیسي، ټول ګوندونه پهدې اړه پر خپلو غوښتنو ولاړ دي او تر هغه وخته پورې چې عملي نهشي تاسې به په ټولو ولایتونو کې د سترو لاریونونو شاهد یئ."
د څو سیاسي ګوندونو غړو د چهارشنبې په ورځ «۱۳۹۷ کال د وږې ۰۷» د کابل په څو سیمو کې له دې امله مظاهرې وکړې چې ګوندي غوښتنې يې نهدي پوره شوي، دوی ویل چې د دوی مظاهرې به تر ولایتونو هم ورسېږي.
د انتخاباتي نظام بدلون، د انتخاباتو له ټولو پروسو نه د سیاسي ګوندونو څارنه او په انتخاباتو کې له بایو مټریک ټکنالوژۍ نه استفاده د سیاسي ګوندونو له عمده غوښتنو څخه دي.
په ورته وخت کې د انتخاباتو د خپلواک کمېسیون رئیس ګلاجان عبدالبدیع صیاد د پنجشنبې په شپه ازادي راډیو ته وویل چې له انتخاباتو څارنه د سیاسي ګوندونو مسلم حق دی او شرایطو ته په پام کولای شي له دغې پروسې څارنه وکړي.
د انتخاباتو د خپلواک کمېسیون مرستیال ویاند ذبیحالله سادات بیا وايي چې د انتخاباتو د ترسره کېدو تر نېټې پورې دوی نهشي کولای له بایو مټریک ټکنالوژۍ نه استفاده وکړي.
نوموړی ټینګار کوي چې راتلونکي انتخابات به په خپل وخت او ټاکلي مهالوېش ترسره شي.
ښاغلی سادات زیاتوي:
"پهدې کم وخت کې موږ نهشو کولای د ولسي جرګې په انتخاباتو کې له بایو مټریک سیستم نه استفاده وکړو او ورسره په څنګ کې د انتخاباتي نظام بدلون د انتخاباتو کمېسیون مسؤلیت نهدی، له ګوندونو زموږ همېشنۍ غوښتنه دا ده چې تاسې خپل نظارت پياوړی کړئ او پياوړی نظارت د انتخاباتو پروسې ته شفافیت وربخښي."
په وروستیو څو میاشتو کې سیاسي ګوندونو له حکومت او د انتخاباتو خپلواک کمېسیون سره څو غونډې درلودې او خپلې غوښتنې یې ورسره مطرح کولې، خو حکومت او د انتخاباتو خپلواک کمېسیون ټینګار کوي چې د ځینو غوښتنو عملي کېدو ته لازم وخت نهشته.
په ورته وخت کې د افغانستان د ازادو او عادلانه انتخاباتو بنسټ یا فیفا اجرائیوي رئیس یوسف رشید له دې وړاندې ویلي و چې د سیاسي ګوندونو یو شمېر غوښتنې لکه په راتلونکي انتخاباتو کې له بایو مټریک سیستم نه استفاده ډېر وخت ته اړتیا لري.
راپور: یوسف ځدراڼ