په افغانستان کې د نړیوالو ځواکونو عمومي قوماندان وایي، یو شمېر طالبان او د هغوی مشران د افغانستان له حکومت سره سولې ته لېواله دي او د طالبانو له متوسطې او لوړې کچې کسانو سره ارتباطات ټینګ شوي دي.
جنرال جان نېکلسن پرون چهارشنبه «۱۳۹۷ کال د غبرګولي ۰۹» له کابله په واشنګټن کې د متحده ایالاتو په دفاع وزارت کې خبریالانو ته د وېډیو کنفرانس له لارې وویل چې د خبرو اترو یو لړ چینلونه د سولې د بهیر د بېلابېلو لورو لهخوا پرانیستل شوي، خو دی یې د دې لپاره نوم نهشي اخیستلی چې دا خبرې پټې دي.
جنرال نېکلسن په ورته وخت کې دا هم وویل چې د سولې په خبرو کې یو شمېر نړیوال سازمانونه، بهرني حکومتونه او هغه ډلې هم داخلې دي چې له دې سره دلچسپي لري.
په افغانستان کې روانه جګړه داسې ده، لکه د کمبودیا جګړه.
پهدې برخه کې دې امریکایي جنرال یوازې دومره وویل چې زما ډیپلومات همکاران هم پهکې شامل دي.
طالبانو په خپله تر اوسه د سولې د خبرو په اړه څه نهدي ویلي.
د فبرورۍ په ۲۸مه نېټه کله چې افغان ولسمشر اشرف غني طالبانو ته د سولې پراخ وړاندیز وکړ، طالبانو وویل چې دوی له امریکایانو سره خبرو ته حاضر دي نه د کابل له حکومت سره، خو جنرال نېکلسن وایي چې اوس طالبان په خپلو کې هم د سولې لپاره په جدي خبرو بوخت دي او پر دې بحث کوي چې دا جګړه څرنګه پای ته ورسوو.
د ده په وینا طالبانو ته د سولې په وړاندیزونو کې او د طالبانو د سولې په شرایطو کې ګڼ مشترک ټکي شته.
د سولې هیلې وروسته تر دې د یو شمېر کسانو په باور په افغانستان کې کمې شوې چې طالبانو د غویي میاشتې په لومړۍ اوونۍ کې د الخندق په نوم عملیات پیل کړل، خو جنرال نېکلسن وایي چې سږ کال د طالبانو پسرلني عملیات د تېرو کلونو په پرتله لږ شدید دي.
نېکلسن وویل، په افغانستان کې روانه جګړه داسې ده، لکه د کمبودیا جګړه چې په ورته وخت کې دواړو لورو د سولې خبرې کولې او جګړهیې هم مخته وړه.
دا خبره د امریکا په دفاعي پوهنتون کې استاد او په جرمني کې د افغانستان سفیر علي احمد جلالي هم ازادي راډیو ته وکړه:
"د سولې امکانات خو شته، اما دا د دې معنی نهلري چې جنګ به یو ځل درېږي او د سولې پروسه به شروع شي، تر ډېره به جنګ او د سولې هڅې یو شان روانې وي، تر هغه وخته چې دواړه خواوې دې نتیجې ته ورسېږي چې د سولې لپاره لاره هواره ده او د دوی هغه اهداف چې لري یې د سولې له لارې په بهتر شکل ترلاسه کېدای شي."
طالبانو د الخندق د عملیاتو له اعلان وروسته د افغانستان د یو شمېر ولسوالیو مرکزونه د لنډې مودې لپاره نیولي دي، خو بېرته ترې په شا شوي دي.
جنرال نېکلسن وویل چې افغان ځواکونه اوس د پخوا په پرتله پیاوړي شوي او دا وړتیا یې پیدا کړې ده چې د طالبانو د بریدونو مخه ونیسي.
نېکلسن زیاته کړه چې د طالبانو ۸۰ فیصده بریدونه بېرته شا ته تمبېدلي او ۲۰ فیصده حملې یې هم په لنډ وخت کې خنثی شوې دي.
