د لاسرسي لېنکونه

یکشنبه ۵ غبرګولی ۱۳۹۸ کابل ۰۳:۳۲

د امریکا د ستراتېژۍ په اړه راپور: په افغانستان کې د پرمختګ نښې کمې دي


د امریکا د دفاع او بهرنیو چارو د وزارتونو او د نړیوال پرمختګ د ادارې مفتشانو په یوه نوي راپور کې په افغانستان کې د امریکا د نوې ستراتېژۍ د عملي کېدو په اړه یو تیاره تصویر ورکړی.

د امریکا د دفاع او بهرنیو چارو د وزارتونو د عمومي تفتیش ادارو او د امریکا د نړیوال پرمختګ ادارې د دې هېواد کانګرس ته یو نوی راپور وړاندې کړی چې وايي، د ولسمشر ډونالد ټرمپ د نوې ستراتېژۍ له مخې په افغانستان کې د پرمختګ نښې کمې دي.

ډونالد ټرمپ
ډونالد ټرمپ

په راپور کې ویل شوي دي چې د روان کال په لومړیو درېیو میاشتو کې د طالبانو او نورو وسله‌والو مخالفو ډلو حملې پراخې شوې دي، دې ډلو په پلازمېنه کابل او د افغانستان په نورو سیمو کې خونړۍ حملې کړي او لا یې هم زیاتې سیمې په ولکه کې دي.

وسله‌والو طالبانو د دوشنبې په ورځ د کابل اوسېدونکو ته خبرداری ورکړ چې پر دې ښار یې پراخې حملې پلان کړې دي او له خلکو یې غوښتي دي چې د تلفاتو د مخنیوي لپاره باید له پوځي مرکزونو څخه لیرې واوسي.

د ولسمشر ټرمپ ادارې تېره میاشت څرګنده کړه چې د وسله‌والو طالبانو پر ضد پوځي عملیات به زیات کړي څو طالبان پوه شي چې د جګړې په ډګر کې نه‌شي بریالي کېدای او په نتیجه کې به‌یې د خبرو مېز ته کېني.

خو په راپور کې راغلي چې ډېرې لږې نښې نېښانې لیدل کېږي چې دې کار به د پام وړ اغېز کړی وي یا به‌یې پر طالبانو فشار زیات کړی وي.

راپور همداراز یادونه کوي چې د جګړې په ډګر کې هم لاسته راوړنې هومره زیاتې نه‌دي چې ووایو، افغان ځواکونو د امریکايي قواوو په مرسته تر خپلې ولکې لاندې سیمې پراخې کړې دي.

افغان ځواکونو طالبان تر فشار لاندې راوستي.
افغان ځواکونو طالبان تر فشار لاندې راوستي.

راپور زیاتوي چې پر پاکستان د امریکا هغه فشارونه هم چندان اغېزمن نه‌وو چې هدف‌یې د پاکستان هڅول و څو د وسله‌والو ډلو له ملاتړ څخه لاس واخلي.

راپور یادونه کوي چې دا حملې د هغو ډلو له‌خوا چې پټنځایونه‌یې په پاکستان کې دي لا هم په ډېر شدت سره روانې دي.

په راپور کې راغلي دي چې پاکستان ته د امریکا له‌خوا د دوه نیم میلیارده ډالره مالي مرستې له بندېدو سره سره اسلام‌آباد په پاکستان کې د ترورېستانو د پټنځایونو پر ضد اغېزمن ګامونه نه‌دي اخیستي.

د امریکا د دفاع او بهرنیو چارو د وزارتونو او «USAID» د تفتیش د ادارو ګډ راپور همداراز د افغانستان د ولسي جرګې او ولسوالیو د شوراګانو د انتخاباتو په اړه شک څرګند کړی.

دا انتخابات په جولای کې په پام کې و، خو اوس اکټوبر میاشتې ته ځنډېدلي دي.

راپور یادونه کوي چې د وسله‌والو طالبانو دریځ دا دی چې افغان حکومت د امریکا لاسپوڅی دی، نو دې ته په پام سره آیا داسې انتخابات چې د امریکا په مرسته ترسره کېږي په وسله‌والو مخالفینو کې د افغان حکومت اعتبار او مشروعیت هومره زیاتولای شي چې هغوی پخلاینې ته چمتو شي؟

راپور همداراز افغانستان ته د اضافي پوځي مشاورینو د استولو د مؤثریت په اړه شک څرګندوي.

د دې درېیو ادارو مفتشانو ویلي دي چې د وسله‌والو طالبانو پر ضد د افغان ځواکونو او د امریکا د پوځ تهاجمي عملیات د ملکي تلفاتو خطر زیاتولای شي.

دوی د افغان ملي، دفاعي ځواکونو د وړتیا لوړېدل تأییدوي خو له دې سره سره د عامو خلکو د امنیت د ټينګښت په برخه کې پرمختګ ډېر کم بولي.

د راپور له مخې د افغانستان د محاربو ځواکونو شمېر اوس‌مهال ۳۱۳ زرو ته رسېږي په داسې حال کې چې دا شمېره تېر کال ۳۳۱ زره وه او دا په دې معنی ده چې د افغان ځواکونو عمومي شمېر له هغې اندازې څخه چې په پیل کې پلان شوی و، په ۱۰۰ کې ۱۱ کم شوی دی.

خو د امریکا دفاع وزارت ویلي چې په افغانستان کې په یوه وخت کې هم ګډوډي او هم پرمختګ ممکن دي.

د دفاع وزارت ویاند ډګروال راب مننګ وايي، په افغانستان کې پرمختګ شوی دی او په دې لړ کې دی، په فراه ولایت کې د افغان هوايي او ځمکنيو ځواکونو ترمنځ همکارۍ ته اشاره کوي او وايي د همدې همکارۍ په مټ پر فراه د طالبانو پراخه حمله په شا وتمبول شوه.

XS
SM
MD
LG