د لاسرسۍ وړ لېنکونه

تازه خبر
جمعه ۱۰ وری ۱۴۰۳ کابل ۱۲:۰۵

هاشمي: په پام کې ده د ولسمشرۍ ټاکنې د راتلونکې کال د حمل پر۱۶مه وشي


د افغانستان د انتخاباتو خپلواک کمېسیون وايي، د ولسي جرګې او ولسوالیو شوراګانو د انتخاباتو په چارو کې د بوختیا سربېره یې د جمهوري ریاست انتخاباتو ته هم چمتووالی نیولی دی.

کمېسیون وايي، د جمهوري ریاست د انتخاباتو لپاره احتمالي نېټه د راتلونکې کال د حمل د میاشتې شپاړسمه په پام کې نیول شوې ده.

د انتخاباتو خپلواک کمېسیون په دې برخه کې د دغه کمېسیون د کمېشنر سید حفیظ الله هاشمي په مشرۍ یوه کمیټه جوړه کړې او ټاکل شوې چې د ولسمشر په ځانګړي حکم د انتخاباتي چارو شپږ تنه متخصیصین انتخاب او په دغه کمېټه کې وګمارل شي.

ښاغلي هاشمي د یکشنبې په ورځ په دې اړه ازادي راډیو ته وویل:

سید حفیظ الله هاشمي
سید حفیظ الله هاشمي

"له نېکه مرغه هماغه امر لاسلیک شو او کله چې موږ ته راورسېږي موږ به دغه بهیر اعلان کړو او شپږ تنه به د ازاد رقابت له لارې وګمارو، د دغه کمېټې چارې زه مخ ته وړم او په دې اړه به تخنیکي بحثونه وکړو څو وکړای شو چې د راتلونکې کال د حمل په شپاړسمه د ولسمشرۍ ټاکڼې ترسره کړو."

ښاغلی هاشمي دغه شان وايي، د انتخاباتي چارو شپږ تنه مختصیصین چې تمه ده وګمارل شي کمېسیون ته به سلا مشورې ورکوي.

د نوموړي په خبره که د جمهوري ریاست انتخابات د حمل د میاشتې پر شپاړسمه نېټه ترسره شي مهال وېش به یې روان لمریز کال کې اعلان شي.

د اساسي قانون پر بنسټ د ولسمشر دنده د راتلونکې کال د جوزا د میاشتې پر لومړۍ نېټه پای ته رسېږي.

د اساسي قانون په ۶۱ ماده کې راغلي چې انتخابات باید د نوي ولسمشر د ټاکلو لپاره له ۳۰ او ۶۰ ورځو په منځ کې ترسره شي.

د انتخاباتو خپلواک کمېسیون په داسې حال کې د جمهوري ریاست د انتخاباتو لپاره د چمتووالي خبره کوي چې دا مهال د ولسي جرګې او ولسوالیو شوراګانو په انتخاباتي چارو بوخت دي.

د افغانستان د شفافو انتخاباتو د بنسټ رییس محمد نعیم ایو زاده د یکشنبې په ورځ ازادي راډيو ته وویل چې که حکومت سیاسي اراده ولري نو د ولسي جرګې له انتخاباتو څخه وروسته د جمهوري ریاست انتخابات ترسره کول سخت کار نه دی.

په ورته وخت کې د اجرائیه ریاست مرستیال ویاند امید میثم ازادي راډیو ته وویل چې حکومت پر خپل وخت د جمهوري ریاست له انتخاباتو ملاتړ کوي.

امید میثم
امید میثم

نوموړي زیاته کړه:

"د جمهوري ریاست د انتخاباتو نېټه د انتخاباتو په خپلواک کمېسیون پورې اړه لري، د کمېسیون اماده ګیو ته په کتو نېټه معلومېږي، خو موږ په ټوله کې د ولسي جرګې، ولسوالیو شوراګانو او جمهوري ریاست له انتخاباتو ملاتړ کوو."

بل خوا د افغانستان د انتخاباتو د خپلواک کمېسیون رئیس عبدالبدیع صیاد د یکشنبې په ورځ د دغه کمېسیون په یوه ناسته کې وویل چې کمېسیون د جمهوري ریاست انتخاباتو ته هم بشپړ تیاری لري.

د ښاغلي صیاد په خبره له تېرې یوې میاشتې راهیسې تخنیکي کارکونکو په دې برخه کې خپل کار پیل کړی دی.

راپور: محمد حدیث پردیس

XS
SM
MD
LG