د افغانستان په جنوب لوېدیځ کې له پاکستان سره پر پوله پرته د خوست ولایت ځاځي میدان ولسوالۍ کابل ته د پاکستان د صدراعظم تر سفر ۱۰ ورځې وروسته د یکشنبې په ورځ د افغان او پاکستاني ځواکونو ترمنځ د سختې نښتې شاهده وه.
د افغانستان جمهوري ریاست د دغې پېښې په غبرګون وايي، یاد وضعیت د یو هېواد په ګټه هم نهدی.
د افغان ولسمشر د ویاند دفتر سرپرست شاه حسین مرتضوي د دوشنبې په ورځ ازادي راډيو ته وویل، د اړیکو د ښه کېدو په نیت د دواړو هېوادونو ترمنځ د سولې عمل د ګډ پلان تفاهملیک لاسلیک شوی او تمه دا ده چې په عمل کې هم پلی شي.
نوموړی زیاتوي:
"له پاکستان سره تفاهملیک لاسلیک شوی، هڅه کېږي چې د عملي کېدو لپارهيې اصلي مېکانیزمونه او په پلي کېدلو یې څارنه هم تنظیم شي، ځکه روان وضعیت د یو هېواد په ګټه هم نهدی."
ښاغلی مرتضوي وايي، که دغه تفاهملیک په عمل کې پلی شي، د تاوتریخوالي د ورته پېښو مخه نیول کېدای شي.
دا څرګندونې وروسته له هغې کېږي چې د خوست ولایت د امنیتي چارواکو په وینا پاکستاني پوځیانو تېره ورځ د خوست د ځاځي میدان ولسوالۍ په جنډې غر، ځونډي غر او نازو غر سیمو کې لومړی د مخته راتګ هڅه او بیا برید وکړ او دغه شانیې د پکتیا د ځاځیو ولسوالۍ په ځينو سرحدي سیمو هم ډزې وکړې چې افغان ځواکونو او ولسي خلکو یې مخه ونیوله.
د دفاع وزارت د ویاند دفتر سرپرست محمد رادمنش ازادي راډیو ته وویل، پاکستاني پوځیانو پهدې وروستیو کې د افغانستان او پاکستان ترمنځ له شته ټولو تړونونو سرغړونه کړې.
خو د نوموړي په خبره افغان ځواکونو او ولسونو له دغو سرغړونو په کلکه دفاع کړې ده.
د خوست ځايي چارواکي وايي، د تېرې ورځې په نښته کې چې له سهارهیې تر مازیګره دوام وکړ، دوه ملکي افغانان وژل شوي، افغان ځواکونو ته بیا د پاکستاني پوځیانو درې جسدونه پر ځای پاتي او یو تنیې ژوندی نیولی دی.
د پاکستان دغو سرغړونو ته په کتو د افغانستان د سولې عالي شورا وايي، دا پېښې د دواړو هېوادونو پر اړیکو او د سولې په پروسه ناوړه اغېز لري.
د دغې شورا مرستیال عزیزالله دین محمد پهدې اړه ازادي راډيو ته وویل:
"بې له شکه چې دا ډول حرکات په اړیکو، د سولې په پروسې او ډېرو نورو برخو باندې اغېز لري، خو غوره دا ده چې د پاکستان حکومت چې ارادهيې د اړیکو د ښه کېدو او د سولې لپاره ښودلې له دا شان تحرکاتو ځان وساتي، ځکه دا د خلکو احساسات او قهر راپاروي او اړیکې خرابوي."
دی وايي، پاکستان په دا شان هڅو سره د ډیورند کرښې د رسمي کېدو هڅه کوي او غواړي ځينې ستراتېژیکې نقطې تر لاسه کړي.
خو د ښاغلي دین محمد په وینا، د پاکستان دا هڅې به د افغان حکومت او ولس له سخت غبرګون سره مخامخ شي او پهکار ده چې هغه هېواد ورنه لاس په سر شي.
راپور: یوسف خان ځدراڼ
