د لاسرسي لېنکونه

چهارشنبه ۵ غویی ۱۳۹۷ کابل ۰۵:۱۴

ټرمپ وايي «FBI» یې د شخصي مدافع وکیل پر دفتر چاپه وهلې


راپورونه وايي چې د امریکا د فدرالي تحقیقاتو د ادارې «FBI» اجنټان پرون د ولسمشر ډونالد ټرمپ د شخصي مدافع وکیل مایکل کوهن «Michael Cohen» دفتر ته ننوتل او بېلابېل اسناد یې له ځان سره یووړل.

دې کار د ولسمشر ټرمپ تند غبرګون وپاراوه.

ټرمپ په سپینه ماڼۍ کې د خبرو پر مهال دا پر متحده ایالاتو او هغو ارزښتونو برید وباله چې امریکایان د هغه لپاره مبارزه کوي.

ښاغلي ټرمپ پر «FBI» تور ولګاوه چې د ده د مدافع وکیل پر دفتر یې چاپه وهلې ده.

ټرمپ پر ځانګړي مفتش رابرت مولر چې د امریکا د ولسمشرۍ په انتخاباتو کې د ټرمپ د انتخاباتي کمپاین او روسیې د اړیکو په اړه تحقیقات کوي هم تند انتقاد وکړ.

له دې سره هغه اوازې بیا تودې شوې چې ویل کېدل ټرمپ ښايي له دندې د مولر د لیرې کولو هڅه وکړي.

مولر د «FBI» د مشر جېمز کومي پر ځای چې مخکې یې د امریکا د ولسمشرۍ په انتخاباتو کې د روسیې د لاسوهنو په اړه د تحقیقاتو مشري کوله، تېر کال په دې اړه د څېړنو د ځانګړي مفتش پر دنده وګومارل شو.

XS
SM
MD
LG