په کابل کې د امریکا سفیر یو ځل بیا پر خپل وخت د افغانستان د ولسي جرګې او ولسوالیو شوراګانو د انتخاباتو پر ترسره کېدو ټنیګار کوي.
جان بس له ازادي راډیو سره په ځانګړې مرکه کې ویلي هغه مرستې او امکانات چې افغان حکومت ته برابر شوي باید د ولسي جرګې او ولسوالیو شوراګانو انتخابات پر خپل وخت ترسره شي.
نوموړي زیاته کړه:
"د افغانستان د ولسي جرګې، ولسوالیو شوراګانو او د جمهوري ریاست انتخابات باید پر خپل وخت ترسره شي ځکه هغه مرستې چې موږ یې له افغان حکومت سره کوو ډاډه یو چې پر خپل وخت انتخابات ترسره کېدلای شي."
په ورته وخت کې له انتخاباتو نه د ملاتړ ډله چې د امریکا په ګډون یو شمېر هېوادونهیې غړیتوب لري، په خپله یوه ګډه اعلامیه کې په افغانستان کې پر خپل وخت د ولسي جرګې او ولسوالیو د شوراګانو پر انتخاباتو ټینګار کړی دی.
د دغې ډلې غړو دغهشان ویلي چې د انتخاباتو په سیستم کې د هر ډول بدلون له امله کېدای شي دغه چاره په ۲۰۱۸ کال کې ترسره نهشي.
دا په داسې حال کې ده چې یو شمېر افغان سیاسي ګوندونو د انتخاباتي سیستم د بدلون غوښتنه کړې ده.
د افغانستان د انتخاباتو خپلواک کمېسیون د روان کال د سرطان میاشتې ۱۶مه نېټه د ولسي جرګې او ولسوالیو د شوراګانو د انتخاباتو لپاره ټاکلې وه، خو شااوخوا دوه اوونۍ وړاندې د دغه کمېسیون مرستیال وویل چې ښايي د انتخاباتو نېټه وځنډېدیږي چې ولسي جرګې یې په وړاندې غبرګون وښود.
د ولسي جرګې رئیس عبدالرؤف ابراهیمي د تېرې دوشنبې په ورځ د دغې جرګې په عمومي غونډه کې وویل چې د ولسي جرګې او ولسوالیو د شوراګانو د نېټې بیا بدلول دوی ته نور د منلو نهدی او د انتخاباتو د خپلواک کمېسیون مسؤلین باید په دې اړه ځواب ووايي.
د بودجې نشتوالی، ناسم امنیتي وضعیت او یو شمېر نور موارد پر خپل وخت د انتخاباتو د ترسره کېدو عمده لاملونه ښودل شوي دي.
د انتخاباتو د خپلواک کمېسیون رئیس ګلاجان عبدالبدیع صیاد په دې اړه د پنجشنبې په ورځ ازادي راډیو ته وویل چې کار روان دی، خو ښايي په دغو انتخاباتو کې دوه میاشتې ځنډ راشي.
ښاغلي صیاد زیاته کړه:
"د رأی ورکوونکو د نوم لیکنې د کتاب د بستهبندۍ کار روان دی او ولایتونو ته استول کېږي، موږ د سرطان میاشت د انتخاباتو لپاره ټاکلې وه، خو دا چې وخت مو له لاسه ورکړی، ښايي دوه میاشتې وځنډېږي، خو دا په دې معنی نهده چې انتخابات په ځنډ سره ترسره کېږي."
خو د افغانستان د ازادو او عادلانه انتخاباتو د بنسټ «فیفا» رئیس یوسف رشید وايي چې که چېرې په انتخاباتي سیستم کې بدلون راشي، د نورو ستونزو تر څنګ به دا چاره هم د انتخاباتو د ځنډېدو لامل وګرځي.
ښاغلی رشید وايي، که داسې وشول نو سیاسي کړکېج به زیات شي چې ښه پیغام نهلري.
راپور: اجمل تورمان
