د لاسرسي لېنکونه

یکشنبه ۲۹ تله ۱۳۹۷ کابل ۰۳:۱۴

چین: پاکستان دې د چینايي وګړي بریدګر ژر تر ژره د قانون منګولو ته وسپاري


کراچۍ کې يو چينايي وګړی وژل شوی
هيله ده انتظار وکړئ

No media source currently available

0:00 0:00:43 0:00

چین د پاکستان پر حکومت غږ کړی چې هغه وسله‌وال دې ژر تر ژره ونیسي او د قانون منګولو ته دې وسپاري، کومو چې په کراچۍ کې پر چینایانو برید کې یو چینايي وواژه او د پېښې له ځایه وتښتېدل.

دا په داسې حال کې ده چې نامعلومو موټرسایکل سپرو وسله‌والو د دوشنبې په ورځ د سند ایالت مرکز کراچۍ په کلېفټن سیمه کې پر دوو چینایانو برید وکړ چې د چارواکو په وینا، د دغه برید په نتیجه کې یو تن چې پر سر لګېدلی و، په روغتون کې یې ساه ورکړه او بل ټپي لا هم په روغتون کې تر درملنې لاندې دی.

د چین د بهرنیو چارو وزارت ویاند جینګ شوانګ د سې شنبې په ورځ «۱۳۹۶ کال د سلواغې ۱۷» په خپلې خبري غونډه کې په پاکستان کې له چینایانو سره په روان تاوتریخوالي اندېښنه ښودلې او له پاکستاني حکومته‌یې غوښتي چې د کراچۍ د پېښې عاملین دې ژر تر ژره د قانون منګولو ته وسپاري.

د چین د بهرنیو چارو وزارت ویاند جینګ شوانګ
د چین د بهرنیو چارو وزارت ویاند جینګ شوانګ

نوموړي په دې اړه د یوې پوښتنې په ځواب کې ویلي:

"په کراچۍ کې د چین د جنرل قونسل چارواکي تر پېښې سمدستي وروسته روغتون ته ورغلي وو، پر ډاکترانو یې د پېښې د ټپیانو د درملنې ټینګار او له پولیسو یې غوښتي وو چې پر چینایانو د برید معامله په بېړنۍ توګه حل او بریدګر د قانون منګولو ته وسپاري."

د راپورونو له مخې د وسله‌والو په برید کې وژل شوی چینايي له تېرې څه مودې راهیسې په کراچۍ کې په یوې چینایي کمپنۍ کې کار کاوه.

د چین د بهرنیو چارو وزارت ویلي چې پیکنګ په پاکستان کې د خپلو کارکوونکو د امنیت په اړه اندېښمن دی، خو زیاتوي چې د ترهګرۍ پر ضد جګړې او د عامو خلکو د خوندیتوب په برخه کې د پاکستان د امنیتي ادارو هڅې د ډاډ وړ دي.

چین پر پاکستان غږ کړی چې هغه وسله وال دې ونیسي کومو چې پر چینایانو برید کړی.
چین پر پاکستان غږ کړی چې هغه وسله وال دې ونیسي کومو چې پر چینایانو برید کړی.

په کراچۍ کې د وسله‌والو په برید کې د دغه چینايي تر وژنې مخکې د تېر ۲۰۱۷ میلادي کال په مې میاشت کې هم دوه چینایان په کوټه ښار کې وتښتول شول چې بیا وروسته‌یې په جون میاشت کې مړي د بلوچستان ایالت په مستونګ سیمه کې وموندل شول.

د یادونې وړ ده چې که څه هم تر دې دمه لا کومې وسله‌والې ډلې په کراچۍ کې د چینايي وګړي د وژنې مسؤلیت په غاړه نه‌دی اخسیتی، خو تېر کال په مستونګ کې د دوو چینایانو، یوې ښڅې او یوه سړي د تښتوونې او وژنې مسؤلیت داعش وسله‌والې ډلې منلی و.

XS
SM
MD
LG