افغان چارواکي وايي چې د کابل په نوي امنيتي پلان کې د پلازمېنې د امنیتي کمربندونو او د استخباراتي معلوماتو پر پیاوړي کولو ټینګار شوی.
په ارګ کې د ولسمشر اشرف غني په ګډون د وسلهوالو ځواکونو د اعلی سرقوماندانۍ په غونډه کې هغه امنیتي پلان تأیید شو چې پرون یکشنبه د کورنیو چارو وزارت، جمهوري ریاست ته وسپاره.
په کابل کې له خونړیو ترورېستي حملو وروسته چې چارواکي یې په مخنیوي کې په پاتې راتلو تورن شول، د کورنیو چارو وزارت پرون وویل چې د پلازمېنې د نوي امنیتي پلان طرحهیې جمهوري ریاست ته سپارلې ده.
د کابل ګارنېزیون عمومي سرپرست قوماندان ډګر جنرال افضل امان ازادي راډیو ته وویل، په غونډه کې د دې طرحې په اړه له بحث وروسته د کشفي او استخباراتي ارګانونو ترمنځ د همغږۍ د پیاوړتیا او د کابل د امنیتي کمربند د غښتلي کولو پر اړتیا ټینګار وشو.
ښاغلی امان وايي:
"د ولسمشر ټول هدایتونه مخصوصاً د همغږۍ په اړه وو او دا چې امنیتي ارګانونه باید خپل پلانونه نوي کړي او په نويو پلانونو کې د کابل د امنیتي کمربندونو پر پیاوړي کولو ټینګار شوی او بل د امنیتي چارو مسؤلان په تېره د کشف او استخباراتو چارواکو ته دنده سپارل شوې چې له دې وروسته باید تر پخوا ډېر جدي واوسي او خپل پلانونه نوي کړي."
ارګ په یوه خبرپاڼه کې وايي، د کابل د امنیت نوې طرحه چې پرون د وسلهوالو ځواکونو د اعلی قوماندانۍ په غونډه کې له بحثونو وروسته په اصولو کې تأیید شوه، د کابل د مسؤلو امنیتي ادارو ترمنځ د همغږۍ او د کشف او استخباراتو، د امنیتي او دفاعي ځواکونو د پیاوړتیا او په امنیتي سکټور کې د هر اړخیزو اصلاحاتو پر اړتیا ټینګار کوي.
وسلهوالو مخالفینو په تېرو څو میاشتو کې په کابل او د هېواد په نورو سیمو کې خپلو حملو ته زور ورکړی، خو د روانې سلواغې میاشتې له پیله په کابل کې د خونړیو حملو په لړۍ کې له ۱۵۰ نه د زیاتو ملکي وګړو مړینې او د ګڼ شمېر نورو ټپي کېدو پر افغانستان د وېرې او وحشت فضا خوره کړه.
خلک د دې حملو ژر تر ژره مخنیوی غواړي.
د ارګ په خبرپاڼه کې راغلي دي چې ولسمشر په پرونۍ غونډه کې مسؤلو چارواکو ته لارښوونه وکړه چې د پلازمېنې کابل د امنیتي پلان د عملي کولو پر جزئیاتو کار په ۱۰ ورځو کې بشپړ کړي.
