د کندهار په سپینبولدک او شاه وليکوټ ولسوالۍ کې د پولیو دوه نوې پېښې ثبت شوې دي.
چارواکي وايي چې په دې سره په کندهار کې د پولیو د مثبتو پېښو شمېر ۹ ته لوړ شو چې شپږ يې په شاه وليکوټ ولسوالۍ دوهيې په سپینبولدک ولسوالۍ او یوهيې په کندهار ښار کې ده.
د کندهار د عامې روغتیا ریاست د کتلوي معافیت امر ډاکتر عبدالشکور نصرت د سې شنبې په ورځ ازادي راډیو ته وویل چې د پولیو دغه تازه پېښې د سپينبولدک ولسوالۍ په محمد نبي کلي او د شاه وليکوټ ولسوالۍ د چنارتو په شملزو کلي کې ثبت شوې دي.
د نصرت په خبره دغه فلج شوي ماشومانو چې یو هلک او بله نجلۍ ده، شااوخوا دوه دوه نیم کاله عمر لري.
دی وايي:
"د سپینبولدک فلج شوی هلک فرید احمد نومېږي چې ۳۱ میاشتې عمر لري او شاه وليکوټ کې فلج شوې نجلۍ ده چې نادیه نومېږي او ۲۱ میاشتې عمر لري."
نصرت وايي، د سپینبولدک فلج شوي ماشوم درې دورې واکسین اخیستي وو، خو د شاه وليکوټ پېښه په هغې سیمه کې رامنځته شوې، چېرې چې د تېرو شپږو میاشتو راهیسې د وسلهوالو طالبانو لهخوا د واکسین پر کمپاین بندیز لګول شوی وو.
د چارواکو په وینا په کندهار کې د پولیو د پېښو د زیاتوالي لاملونه د غير معیاري تشنابونو زیاتوالی، د څښاک لپاره د پاکو اوبو نشتوالی، د ماشومانو د تغذیې ناسم وضعیت، د لاسونو مطلق نهپرېمینځل او په ټولهییزه توګه ککړ چاپېریال دي.
راپور : محمد صادق رښتینی
