د لاسرسي لېنکونه

یکشنبه ۶ کب ۱۳۹۶ کابل ۰۰:۱۸

افغان او ناټو چارواکي: که وسله‌وال مخالفین د سولې لار غوره نه‌کړي وبه وژل شي


افغان امنیتي چارواکو او د نړیوالو ځواکونو عمومي قوماندان د هلمند وسله‎والو مخالفینو ته یو ګډ پیغام ورکړی چې که د سولې لار غوره نه‎کړي، وبه وژل شي.

د ۲۱۵ میوند قول اردو قوماندان ولي محمد احمدزي په هلمند کې له جان نېکلسن سره تر لیدو وروسته ازادي راډیو ته وویل چې دا وروستي فرصتونه دي چې وسله‎وال مخالفین استفاده ترې وکړي او له سولې سره یوځای شي.

نوموړی وايي:

"د دولت مخالفین باید له جګړې لاس واخلي او د سولې له پروسې څخه استفاده وکړي، ځکه دا د هغوی لپاره یو لوی فرصت دی او که داسې ونه‎کړي، ټولو ته معلومه ده چې د افغان امنیتي ځواکونو په عملیاتو کې به له‎منځه یوړل شي."

تر دې وړاندې په افغانستان کې د نړیوالو ځواکونو عمومي قوماندان جنرال جان نېکلسن د دوشنبې په ورځ «۱۳۹۶ کال د مرغومې ۲۵» هلمند ته د سفر پر مهال د دولت مخالفینو ته ورته پیغام ورکړی وو.

جنرال نېکلسن د لښکرګاه په شمال لوېدیځ کې د ښوراب پوځي اډې د مشرتابه د بدلون په مراسمو کې وویل:

"که طالبان د افغانستان له حکومت سره روغه جوړه ونه‎کړي، وبه وژل شي."

په‎دې مراسمو کې په ښوراب اډه کې چې ۳۰۰ امریکایي پوځيان فعالیت لري، دوره‌یي مأموریت تر ۹ میاشتو وروسته د ناټو له یوه قوماندان څخه بل قوماندان ته سپارل کېږي.

جنرال نېکلسن په‎دې مراسمو کې وویل، امریکایي ځواکونه او ناټو به تر هغو په افغانستان کې پاتې شي چې یاغیان په بشپړ ډول له‎منځه نه‎وي تللي.

جنرال نېکلسن
جنرال نېکلسن

نوموړي د افغان ځواکونو تر څنګ درېدو او د هغو پر ملاتړ ټینګار وکړ.

په افغانستان کې د امریکا او ناټو ځواکونو عمومي قوماندان دغه‌راز وویل چې دا مهال د هلمند هېڅ ځای د یاغیانو لپاره خوندي نه‎دی.

د ۲۱۵ میوند قول اردو قوماندان ولي محمد احمدزي ازادي راډیو ته وویل چې په هلمند کې د پراخو عملیاتو د پیل لپاره کار کوي.

هغه زیاته کړه، له جنرال نېکلسن څخه‌یې په همدې اړه ژمنه اخیستې ده:

"د هلمند لپاره چې کوم عملیات په پام کې نیول شوي، د هغه له لوري د افغان ځواکونو د ملاتړ په برخه کې ډاډ ورکړل شو. د دښمن پناه ځایونه او د نشه‎یي موادو د تولید فابریکې به له افرادو سره‌یې یوځای زموږ په دې عملیاتو کې له‎منځه یوړل شي."

ښاغلي احمدزي دا هم وویل چې افغان ځواکونه تېر کال په هلمند کې ښه وځلېدل او وتوانېدل د ناوې ولسوالۍ بېرته له مخالفینو ونیسي.

د ښاغلي احمدزي په وینا اوس‎مهال د هلمند ټولې تدارکاتي لارې د افغان امنیتي ځواکونو په واک کې دي.

طالبان د هلمند په شپږو ولسوالیو کې کنټرول او یا نفوذ لري.

دغه ولایت د افغانستان په سطح د نشه‎یي موادو د تولید یو عمده مرکز بلل کېږي چې په پراخه توګه کوکنار په‎کې کرل کېږي.

په هلمند کې د مخدره موادو پر لابراتوار د امریکایي ځواکونو بمباري
هيله ده انتظار وکړئ

No media source currently available

0:00 0:01:13 0:00

افغان امنیتي ځواکونو د امریکا په هوایي ملاتړ د تېر کال د نومبر په ۱۹مه او ۲۰مه نېټه د طالبانو د مخدره موادو پر تأسیساتو عملیات وکړل چې په نتیجه کې یې د دغې ډلې څو کارخانې او لابراتوارونه له‎منځه یوړل شول.

امریکایې چارواکي اټکل کوي چې د نړۍ ۷۵ فیصده هیروئین د افغانستان په هلمند ولایت کې تولیدېږي.

XS
SM
MD
LG