د امریکا په مشرۍ ائتلاف چې له اسلامي دولت ډلې یا داعش سره جګړه مخته وړي، د سوریې د سرحدونو د امنیت لپاره د ۳۰ زره کسیزه پوځ په جوړولو کار کوي.
دغه ائتلاف پرون یکشنبه «۱۳۹۶ کال د مرغومې ۲۴» وویل، دا پوځیان به د سوریې ډموکراتیک پوځ تر کنټرول لاندې سرحدي سیمو کې ځای پر ځای شي.
د سوریې ډموکراتیک پوځ له کُرد جنګیالیو او عربانو جوړ دی.
د ائتلاف په خبره د دې پوځ په لومړۍ مرحله کې ۲۳۰ تنه په زدهکړو بوخت دي.
د دغو ۳۰ زره پوځیانو ډله به نیمايي له کُردانو جوړوي.
دغو پوځیانو تر اوسه پورې د سوریې د ډموکراتیک پوځ په چوکاټ کې د امریکا د هوایي بریدونو، سلا مشورو او وسلو په مټ داعش سختدریځي د سوریې له شمال او ختیځو سیمو ایستلي دي.
د سوریې ډموکراتیک پوځ له کُرد جنګیالیو او عربانو جوړ دی.
د سوریې ډموکراتیک پوځ اوس وخت له ترکیې سره په سرحد کې شمالي سیمې او له عراق سره نږدې د سوریې ختیځې سیمې په کنټرول کې لري.
خو اخوا ترکیې له نیمايي کُرد د دې جوړېدونکي پوځ کلک مخالفت وکړ.
د ترکیې د ولسمشر رجب طیب اردوغان ویاند ابراهیم کالین وویل، دا کار د یوه ترورېستي سازمان فعالیتونه توجیه کوي.
ترکیه د کُرد «YPG» جنګیالي د «PKK» له ډلې سره تړلي بولي.
د کُردانو کارګر ګوند له څو لسیزو راهیسې د ترکیې په نارامه کولو تورن دی.
د سوریې د ولسمشر بشار الاسد رژیم پرون شپه تر ناوخته هم د امریکا په مشرۍ د ائتلاف لهخوا د سوریې د سرحدي سیمو د امنیت د ساتلو په هدف د جوړېدونکي پوځ په اړه کوم عکسالعمل ونهښود.
راپور: صفيالله ستانکزی