د بلخ د نوي والي د معرفي کېدو په تړاو د سیمهییزو ارګانونو د خپلواکې ادارې څرګندونې د جمعیت اسلامي ګوند له غبرګون سره مخ شوي.
د دغه ګوند مرستیال ویاند ذبیحالله فطرت د سې شنبې په ورځ «۱۳۹۶ کال د مرغومې ۰۵» ازادي راډیو ته وویل، د جمعیت ګوند مقابل لوری ارګ دی، نه د سیمهییزو ارګانونو خپلواکه اداره.
ښاغلی فطرت وايي، عطا محمد نور د بلخ والي دی په عادي ډول دفتر ته ځي او خپل کار کوي.
دی وايي:
"د افغانستان د اسلامي جمعیت ګوند مقابل لوری ارګ دی او فکر کوم دا د سیمهییزو ارګانونو له صلاحیته پورته موضوع ده. زموږ لوری ارګ دی او له ارګ سره خبرې کوو. د سیمهییزو ارګانونو خپلواکه اداره کولای شي چې له خپلو مأمورینو سره دغهشان چلند وکړي."
د سیمهییزو ارګانونو د خپلواکې ادارې ویاندې منیرې يوسفزاده د دوشنبې په ورځ «۱۳۹۶ کال د مرغومې ۰۴» ازادي راډیو ته ویلي و چې د بلخ د نوي والي په تړاو د ولسمشر حکم عملي کېږي او دوی به انجنیر محمد داوود د بلخ د نوي والي په توګه معرفي کړي.
اغلې يوسفزاده عطا محمد نور د بلخ استعفا شوی والي ياد کړ.
ولسمشرۍ ماڼۍ يوه اوونۍ مخکې اعلان وکړ چې د عطا محمد نور استعفا يې منظور کړې او انجنیر محمد داوود د هغه ځای ناستی ټاکل شوی.
عطا محمد نور د بلخ والي دی په عادي ډول دفتر ته ځي او خپل کار کوي.
دغه اعلان د جمعیت اسلامي ګوند سخت غبرګون راوپاروه او ښاغلي نور وویل چې د ده استعفا ورته د منلو نهده.
خو اجرائیه رئیس عبدالله عبدالله د دوشنبې په ورځ «۱۳۹۶ کال د مرغومې ۰۴» د وزیرانو شورا تر غوندې دمخه رسنیو ته وویل چې د جمعیت اسلامي ګوند مشرتابه هم په دغې پرېکړه کې له دوی سره و.
په ورته وخت کې د سیمهییزو ارګانونو د خپلواکې ادارې ویاندې منیرې يوسفزاده د سې شنبې په ورځ «۱۳۹۶ کال د مرغومې ۰۵» ازادي راډیو ته وویل، عطا محمد نور د بلخ د والي په توګه نور رسمیت نهلري.
اغلې يوسفزاده وايي، د نوي والي تر معرفي کېدو پورې به د بلخ ولایت چارې د دغه ولایت د والي د مرستیال لهخوا پر مخ وړل کېږي.
دا زیاتوي:
"له کوم وخته چې د استاد عطا استعفا منظور شوې، د نوي والي تقرر په رسمي توګه اعلان شوی دی. د نوي والي تر معرفي کېدو پورې به د سیمهییزو ارګانونو د پالېسۍ له مخې چارې د مرستیال لهخوا پر مخ وړل کېږي."
خو جمعیت اسلامي ګوند عطا محمد نور اوس هم د بلخ برحاله والي ګڼي.
د دغه ګوند مرستیال ویاند ذبیحالله فطرت وايي، ښاغلی نور اوس هم د بلخ د والي په توګه رسمي پاڼې او مکتوبونه لاسلیک کوي.
راپور: واصل وصال
