د ملګرو ملتو عمومي اسامبله پرون په خپله بې ساري بېړنۍ غونډه کې چې تر ډېره د امریکا د ولسمشر ډونالډ ټرمپ پر ضد د یو سخت غبرګون بڼه یې لرله، د اسرائیل د پلازمېنې په توګه د بیتالمقدس د رسمیت پېژندو پرضد د پریکړهلیک مسوده تائید کړه.
دا پریکړهلیک چې طرح یې د مصر لهخوا وړاندې شوې وه، د ۹ منفي رأیو په وړاندې د افغانستان په ګډون د ۱۲۸ هېوادونو په مثبتو رأیو تائید شو.
پریکړهلیک د ملګرو ملتونو له غړو غوښتنه کړې وه چې د متحد ایالاتو لهخوا د اسرائیل د پلازمېنې په توګه د بیتالمقدس له رسمیت پېژندو سره خپل مخالفت اعلان کړي.
دې پریکړهلیک ته د برېتانیا، فرانسې، جرمني او جاپان په ګډون د متحد ایالاتو ډېرو نژدې متحدانو د تائید رأیې ورکړې.
د روسیې رأیه هم مثبته وه، خو ځینو نورو لکه استرالیا، کاناډا، مکسیکو او فیلیپین مستنکفې رأیې ورکړې.
په ملګرو ملتونو کې د امریکا سفیرې نېکي هېلي په عمومي اسامبله کې د رأیو له اخېستو مخکې وویل، متحد ایالات به هغه هېوادونه په یاد وساتي چې د امریکا د ارادې خلاف رأیه ورکوي.
نوموړې وايي:
"امریکا به خپل سفارت بیتالمقدس ته ولېږدوي. د امریکا خلک له موږه همدا تمه لري او دا پرځای کار دی. په ملګرو ملتونو کې هېڅ راز رأیه به په دې برخه کې بدلون رانهولي، خو دا رأیه به د ملګرو ملتونو او هغو هېوادونو په اړه چې په ملګرو ملتونو کې موږ ته درناوی نهکوي د امریکایانو نظر بدل کړي او د هغو رأیه به په یاد پاتې شي."
د فلسطینۍ ادارې مشر محمودعباس دا پریکړه د فلسطینیانو لپاره بریا وبلله، خو د اسرائیلو استازي په دې برخه کې د ولسمشر ټرمپ د قاطع دریځ مننه وکړه.
د صدراعظم بنیامین نتانیاهو د دفتر لهخوا په خپره شوې خبرپاڼه کې ویل شوي دي چې اسرائیل د دې پریکړهلیک د مخالفو هېوادونو له شمېره راضي دی.
پر متحدایالاتو او اسرائیل سربېره اوو نورو هېوادونو- ګواتیمالا، هاندوراس، مارشال ټاپوګانو، مایکرونیسیا، ناورو، پالاو او توګو د پریکړهلیک پرضد رأی ورکړې.
