د امریکا متحده ایالاتو ولسمشر پر هغو هېوادونو د احتمالي مالي بندیز ګواښ کړی چې د ده په خبره هم د امریکا پیسې اخلي او همیې پر ضد درېږي.
ډونالد ټرمپ ویلي، هر هغه هېواد چې د پنجشنبې په ورځ «۱۳۹۶ کال د لیندۍ ۳۰» د ملګرو ملتونو په عمومي اسامبله کې د امریکا له لوري د اسرائیلو د پلازمېنې په توګه د بیتالمقدس په رسمیت پېژندلو د پرېکړې پر ضد رأیه ورکړي، د امریکا مالي مرسته به ورباندې بنده شي.
ولسمشر ټرمپ تېر ماښام په واشنګټن کې د کابینې په غونډه کې د وینا پر مهال وویل:
"دوی سلګونه میلیونه او حتی میلیاردونه ډالره اخلي او بیا زموږ په وړاندې رأیه ورکوي. موږ دغو رأیو ته ګورو، پرېږدئ چې زموږ پر ضد رأیه ورکړي، موږ به ډېر څه وسپموو. پروا یې نهلرو."
د ملګرو ملتونو عمومي اسامبله نن پنجشنبه «۱۳۹۶ کال د لیندۍ ۳۰» د امریکا د ولسمشر ډونالد ټرمپ د هغې پرېکړې په اړه بېړنۍ غونډه جوړوي چې بیتالمقدسیې د اسرائیل د پلازمېنې په توګه په رسمیت وپېژانده.
دا غونډه د اسلامي هېوادونو په غوښتنه دایرېږي.
په ملګرو ملتونو کې د فلسطین استازي ریاض منصور وویل، د عمومي اسامبلې ۱۹۳ غړي به د هغه پرېکړهلیک مسودې ته رأیه ورکړي چې له ولسمشر ټرمپ څخه غواړي خپله پرېکړه بېرته واخلي.
منصور هیله وښوده چې د ملګرو ملتونو غړي به په لوی اکثریت دا پرېکړهلیک تصویب کړي.
د ملګرو ملتونو په امنیت شورا کې یو بل ورته پرېکړهلیک د ډسمبر په ۱۸مه نېټه د امریکا له لوري ویټو شو.
تر دې وړاندې په ملګرو ملتونو کې د امریکا سفیرې نیکي هیلي هم پر خپله ټویټرپاڼه خبرداری ورکړی وو چې متحده ایالات به هغه کسان په یاد ولري چې د دې په خبره د بیتالمقدس په اړه د امریکا د خلکو د انتخاب پر وړاندې رأیه ورکوي.
دا وایي:
"د ډسمبر پر ۲۱مه نېټه به زموږ پر انتخاب انتقاد وشي. امریکا بهیې نومونه واخلي."
د دغې اسامبلې مشر میروسلاو لایچاک "Miroslav Lajcak" د ولسمشر ټرمپ د دغو څرګندونو په اړه له څه ویلو ډډه کړې، خو دا یې ویلي چې دا د ملګرو ملتونو د غړو هېوادونو حق او مسؤلیت دی چې خپل نظرونه څرګند کړي.
دغهراز د ملګرو ملتونو یو شمېر نورو لوړپوړو ډیپلوماتانو د نوم نهښودلو په شرط د نیکي هیلي د دغو څرګندونو په وړاندې غبرګون ښودلی.
د اسلامي هېوادونو یوه ډیپلومات ویلي، متحده ایالات کله چې نورو ته د قناعت ورکولو لپاره بله قانوني لاره نهلري، دا ډول څرګندونې کوي.
یوه لوېدیځ ډیپلومات بیا دا کمزوری تاکتیک بللی دی او یوه بل اروپایي ډیپلومات ویلي چې هیلي پهدې ډول نور هېوادونه نهشي کنټرولولی.
سره له دې چې فلسطین بیتالمقدس د خپل راتلونکي هېواد پلازمېنه ګڼي، خو ټرمپ د ډسمبر پر شپږمه بیتالمقدس د اسرائیلو د پلازمېنې په توګه په رسمیت وپېژانده او دا پرېکړه له پراخو انتقادونو سره مخامخ شوه.
