د غزني ولایتي شورا او فعالان وايي، په دغه ولایت کې وسلهوال طالبان په سپینه ورځ او په عام ډول په ښار او کلیو کې له کروندګرو او سوداګرو څخه د دولت تر ولکې لاندې سیمو کې مالیه راټولوي.
په دغه ولایت کې د ولایتي شورا یوه غړي امانالله کامراني ازادي راډيو ته وویل، ټول هغه سوداګر او شرکتونه چې دولت ترې مالیه راټولوي د طالبانو له لوري هم ورڅخه مالیه اخیستل کېږي چې خلکيې له ستونزو سره مخ کړي.
نوموړی وايي چې طالبان له همدې لارې زیاتې پیسې لاسته راوړي او دولتيې باید مخه ونیسي.
ښاغلی کامراني وايي:
"په غزني ښار کې چې کوم څوک دوکان لري او یا هم کوم کسب کوي له هغو ټولو وسلهوال طالبان مالیه اخلي او دغهراز په کلیو کې له کروندګرو څخه چې باغونه لري او یا بل کوم کښتيې کړای وي، وسلهوال طالبان ورڅخه په منظم ډول مالیه ټولوي."
ښاغلی کامراني وايي، په غزني ولایت کې د طالبانو نفوس زیات شوی چې لامليې د ولایتي ادارې کمزورې رهبري ده.
له دې سره مدني فعالان هم ورته څرګندونې لري.
دوی وايي، نهیوازې وسلهوال طالبان دغلته په ښار کې له سوداګرو او په کلیو کې له کروندګرو مالیه ټولوي، بلکې د سیمهییزو رسنیو څخهيې هم اخلي.
د دوی له ډلې یو هم ژورنالېست اسدالله جلالزی دی چې ازادي راډيو تهيې وویل:
"د غزني په ښار کې وسلهوال طالبان سوادګرو ته خطونه استوي او پهکې لیکلي يې وي چې مالیه راکړه، که نه موږ دې تور لېست ته اچوو، نو هغه سوداګر مجبوره دی چې مالیه ورکړي ځکه امنیتيې نهدی خوندي او رسنۍ هم مجبوره دي چې طالبانو ته مالیه ورکړي."
د غزني په ښار کې که څه هم هټۍوال او سوداګر دا مني چې طالبانو ته مالیه ورکوي، خو هغوی د دولت او وسلهوالو طالبانو له وېرې له څه ویلو ډډه کوي، خو کروندګر وايي، که وسلهوالو طالبانو ته مالیه ورنهکړي، نو د امنیت د نشتوالي له املهيې ژوند په خطر کې دی.
د دغه ولایت د دهیک ولسوالۍ یوه تن ازادي راډيو ته وویل:
"محمد نعیم یم، په دهیک ولسوالۍ کې وسلهوال طالبان هر کروندګر ته د شپې خطونه لېږي، د درېیو او یا هم څلور زرو افغانیو غوښتنه کوي، نو موږ هم له وېرې دغه پیسې ورکوو. ځکه کهيې ور نهکړو ژوند مو په خطر کې دی او ټول مال او جایداد مو راڅخه اخلي."
په غزني ولایت کې د غزنويانو په نوم د خصوصي ټلوېزیون مشر هم وايي چې دوی اړ دي څو طالبانو ته مالیه ورکړي.
له دې ټولو سره سره د غزني ولایت والي انجنیر عبدالکریم متین که څه هم دا مني چې طالبان په غزني ښار کې له خلکو مالیه ټولوي، خو وايي چې مخنیوی يې د دوی تر وس پورته خبره ده.
ښاغلی متین وايي، تر دې مهالهیې یو شمېر هغه کسان هم نیولي چې وسلهوالو طالبانو تهيې مالیه ټولوله.
د غزني ولایت والي انجینیر عبدالکریم متین
ښاغلي متین وویل:
"تر ما پورې دا ډول شکایتونه راغلي چې وسلهوال طالبان له خلکو مالیه اخلي، خو ځیني کسان مو نیولي چې طالبانو تهيې مالیه ټولوله. موږ دې ته مالیه نهشو ویلی، مالیه هغه څه ته وايي چې دولتيې راټولوي او بېرته بیتالمال ته جمع کېږي."
وسلهوال طالبان بیا وايي چې دوی نهیوازې په غزني کې، بلکې په ټولو ولایتونو کې په منظم ډول له خلکو او سوداګرو مالیه راټولوي.
د یادونې وړ ده چې غزني د افغانستان له ناامنه ولایتونو څخه یو ولایت دی چې زیات شمېر سیمې يې د وسلهوالو طالبانو تر ولکې لاندې دي او د جګړې ډګر پهکې تود دی.
راپور: شریفالله شرافت
