د لاسرسۍ وړ لېنکونه

تازه خبر
جمعه ۱۰ وری ۱۴۰۳ کابل ۰۳:۳۴

اجرائیه ریاست: تر ۲۰۳۰ له "م. م" سره د ښځو د پیاوړتیا ژمنه شوې، باید پوره شي


د افغان حکومت اجرائیه رئیس وايي، د هېواد دوامداره پراختیا د ښځو له ګډون پرته نیمګړې ده، د دې له امله د ټولو دولتي او غیر دولتي بنسټونو دنده ده چې د ښځو د پیاوړتیا لپاره جدي هڅې وکړي.

اجرائیه رئیس عبدالله عبدالله وايي، افغان حکومت، مدني ټولنې، خصوصي سکټور او خلکو ته په‎کار ده چې د ښځو د پیاوړتیا لپاره تر ۲۰۳۰ میلادي کال پورې، د ملګرو ملتونو د سازمان له سپارښتنو او ټینګار سره سم، هڅې چټکې کړي.

اجرائیه رئیس دا خبره د سې شنبې په ورځ «۱۳۹۶ کال د لیندۍ ۰۷» د افغانستان د دوامداره پرمختیايي هدف په رڼا کې د ښځو د پیاوړتیا تر نامه لاندې په یوه کنفرانس کې وکړه.

ده وویل، افغان حکومت د ښځو د پیاوړتیا لپاره تر ۲۰۳۰م میلادي کال پورې له ملګرو ملتونو سره ژمنه کړې او باید دغه ژمنې تر ډېره حده پوره شي.

اجرائیه رئیس عبدالله عبدالله
اجرائیه رئیس عبدالله عبدالله

نوموړی وايي:

"یوازې دا نه چې موږ یوه نړیواله ژمنه کړې بلکې، په هېواد کې هم یوې دوامدارې پیاوړتیا ته اړتیا لرو. کوم هدفونه چې په لومړیتوبونو کې راغلي هغه د بې‎وزلۍ له‌منځه وړل، روغتیا د ټولو لپاره، کیفیت لرونکې زده‎کړه، جنسیتي برابري او د ښځو او نجونو پیاوړتیا او داسې نورو ته باید پام وشي."

د ښځو چارو وزارت د معلوماتو له مخې د ملګرو ملتونو سازمان په ۲۰۱۵ میلادي کال کې د ښځو د پیاوړتیا لپاره، یوه نړیواله موضوع تصویب کړه او د دغه سازمان ټول غړي هېوادونه‌یې په عملي کېدو مکلف وګڼل شول.

د ښځو چارو د وزارت مسؤلینو وویل، افغانستان ژمنه کړې چې تر ۲۰۳۰ میلادي کال پورې د دغې نړیوالې موضوع ۱۷ هدفونه چې د ښځو د پیاوړتیا، حقونو، تعلیم، روغتیا او په سیاسي، فرهنګي او اقتصادي برخو کې د دوی د مشارکت موضوع‌ګانې په‌کې شاملې دي، تر ډېره ځایه عملي کړي.

د ښځو د پیاوړتیا لپاره تر ۲۰۳۰ پورې، د ملګرو ملتونو د سازمان له سپارښتنو او ټینګار سره سم، هڅې چټکې کړي.

د ښځو چارو وزیرې دلبر نظري وویل، په دې برخه کې یې پلانونه ترتیب کړي او له ټولو دولتي او غیر دولتي بنسټونو سره‌یې شریک کړي چې د ښځو د پیاوړتیا لپاره پلانونه ترتیب او عملي کړي.

مېرمن نظري وویل، د ښځو د پیاوړتیا لپاره باید د ملګرو ملتونو ۱۷ واړو هدفونو ته یو شان کار وشي.

د ښځو چارو وزیره دلبر نظري
د ښځو چارو وزیره دلبر نظري

نوموړې وايي:

"د دوامداره پرمختیا اووم هدف جنسیتي برابري او د ښځو پیاوړتیا ده. دا چې څنګه هدف ته رسېږو، زیات کار او دقت ته ضرورت لرو. زموږ په نظر که د بې‎وزلۍ ورک کولو ته پام ونه‌شي، نور هدفونه به هم ترلاسه نه‎شي."

دې وویل، دم‎ګړۍ د هېواد په سیاسي، فرهنګي اقتصادي او داسې نورو ټولنیزو چارو او دولتي بنسټونو کې د ښځو وڼده تر ۳۰ فیصدو پورې رسیدلې، خو کافي نه‎ده او هڅې کېږي چې دغه ونډه نوره هم زیاته شي.

دا په داسې حال کې ده چې اوس د هېواد په ځینو سیمو کې ښځې او نجونې له تعلیم، عدلي ارګانونو ته د لاسرسي، روغتیا، سیاست، اقتصادي چارو او داسې نورو ښېګنو څخه بې‌برخې دي.

سربېره پر دې د هېواد په ځینو سیمو کې اوس هم ښځې د نارینه‌وو له ګڼو تاوتریخوالو سره مخې دي او حتی په ځینو حالاتو کې وهل ټکول او وژل کېږي هم.

د ښځو چارو وزارت وايي، د دوی د ستونزو د کمولو لپاره‌یې پلانونه ترتیب کړي او د دیني عالمانو او د چارو د ولایتي دفترونو له لارې پلي کېږي.

راپور: خان محمد سیند

XS
SM
MD
LG